ഊരാളുങ്കലിനെക്കുറിച്ചുള്ള ചോദ്യങ്ങള് മുക്കി സി.എം ഓഫീസിലെ സി.എം; ഇ.ഡി കണ്ടെത്തിയത് നിയമസഭാ അംഗങ്ങളുടെ അവകാശലംഘനമോ? മുഖ്യമന്ത്രി ഓഫീസ് ചോദ്യങ്ങള് മുക്കുമ്പോള് കാര്യങ്ങള് പുറത്ത് വന്നത് ജി.സുധാകരന്റെ ഓഫീസ് വഴി
മുഖ്യമന്ത്രിയും മുഖ്യമന്ത്രിയുടെ ഓഫീസും ചേര്ന്ന് ഊരാളുങ്കല് സൊസൈറ്റിക്ക് ചെയ്തു നല്കിയ വഴിവിട്ട സഹായങ്ങള് കേരളം ചര്ച്ചചെയ്യുകയാണ്. ഇതിനിടയിലാണ് ഊരാളുങ്കലിന് വേണ്ടി പിണറായി സര്ക്കാര് നിയമസഭാഗങ്ങളുടെ അവകാശങ്ങള് വരെ ലംഘിച്ചുവെന്ന ഗുരുതര ആരോപണവും ഉയരുന്നത്. ഊരാളുങ്കല് ലേബര് കോണ്ട്രാക്ട് കോ-ഓപറേറ്റീവ് സൊസൈറ്റിയെക്കുറിച്ചുള്ള നിയമസഭാ ചോദ്യങ്ങളുടെ ഉത്തരങ്ങളെല്ലാം മുഖ്യമന്ത്രിയുടെ ഓഫിസില് മുക്കി. ഇതിനു പിന്നില് മുഖ്യമന്ത്രിയുടെ അഡിഷനല് പ്രൈവറ്റ് സെക്രട്ടറി സി.എം. രവീന്ദ്രനാണെന്നാണ് എന്ഫോഴ്സ്മെന്റെ ഡയറക്ടോറ്റ് സംശയിക്കുന്നത്. ഊരാളുങ്കലുമായുള്ള സര്ക്കാരിന്റെ കരാറുകളുടെ വിശദാംശങ്ങള് ശേഖരിച്ച കൂട്ടത്തില് നിയമസഭാ മറുപടികളും ഇഡിക്കു ലഭിച്ചിരുന്നു. ഇതു പരിശോധിച്ചപ്പോഴാണ് വിവരങ്ങള് മറച്ചുവച്ചതായി കണ്ടെത്തിയത്. സിഎം. രവീന്ദ്രനെ ചോദ്യം ചെയ്യുമ്പോള് ഇതേക്കുറിച്ചും ഇഡി ആരായും.
മൂന്നു സമ്മേളനങ്ങളിലായി മുഖ്യമന്ത്രിയോടു മൂന്നു ചോദ്യങ്ങളാണ് പ്രതിപക്ഷാംഗങ്ങള് ഊരാരാളുങ്കലിനെക്കുറിച്ച് ചോദിച്ചത്. ഇതില് ലീഗിലെ ഡോ. എം.കെ. മുനീറിന്റെ ഒരു ചോദ്യത്തിനു മാത്രം മുഖ്യമന്ത്രി മറുപടി നല്കി. അതാകട്ടെ ഊരാളുങ്കലിന് കെഎസ്ആര്ടിസിയുടെ നടത്തിപ്പ് കൈമാറിയിട്ടില്ലെന്ന സര്ക്കാരിനു ഗുണകരമാകുന്ന മറുപടിയും. ഊരാളുങ്കലിനു ടെന്ഡറില്ലാതെ നല്കിയ കരാറുകളെക്കുറിച്ചും മറ്റുമുള്ള ചോദ്യങ്ങളോട് വിവരം ശേഖരിച്ചു വരുന്നു എന്ന മറുപടിയാണു മുഖ്യമന്ത്രി നല്കിയത്.
നിയമസഭയില് അംഗങ്ങള് ആവശ്യപ്പെട്ടുന്ന ചോദ്യങ്ങള്ക്കെല്ലാമുള്ള മറുപടികള് വിവിധ വകുപ്പുകളില് നിന്ന് ഉദ്യോഗസ്ഥര് ശേഖരിച്ച് മുഖ്യമന്ത്രിക്കും മന്ത്രിമാര്ക്കും കൈമാറാറുണ്ട്. അവയില് സര്ക്കാരിനെതിരായി പ്രതിപക്ഷം ഉപയോഗിക്കാന് സാധ്യതയുള്ള മറുപടികള് മന്ത്രിമാരുടെ ഓഫിസുകളില് തടഞ്ഞുവയ്ക്കുന്ന പതിവാണ്. പകരം വിവരം ശേഖരിച്ചു വരുന്നു എന്ന മറുപടി നിയമസഭയ്ക്കു കൈമാറും.
സര്ക്കാരിന്റെ കാലാവധി കഴിയും വരെ പിടിച്ചു വയ്ക്കുന്ന ഇത്തരം ഉത്തരങ്ങള് പലപ്പോഴും അടുത്ത സര്ക്കാര് വന്നാണ് സഭയില് ഹാജരാക്കുക. ഊരാളുങ്കലിനെക്കുറിച്ചുള്ള ഒരു ചോദ്യം ഒന്നര വര്ഷവും മറ്റേ ചോദ്യം ഒന്പതു മാസവുമായി ഉത്തരം കാത്തിരിക്കുകയാണ്. ഊരാളുങ്കലുമായി സി.എം. രവീന്ദ്രനും കുടുംബത്തിനുമുള്ള ബന്ധം കണ്ടെത്തിയതോടെയാണ് ഉത്തരം മുക്കലിലും അദ്ദേഹത്തെ സംശയിക്കുന്നത്.
സര്ക്കാരിന്റെ സ്ഥലമോ സേവനങ്ങളോ വസ്തുക്കളോ ഊരാളുങ്കല് ലേബര് കോണ്ട്രാക്ടിങ് കോ-ഓപറേറ്റീവ് സൊസൈറ്റിയെ ഏല്പ്പിച്ചിട്ടുണ്ടോ? എന്ന പി.കെ. അബ്ദുറബ്ബിന്റെ ഈ വര്ഷം ഫെബ്രുവരിയില് ചോദിച്ച ചോദ്യത്തിന് മുഖ്യമന്ത്രിയുടെ മറുപടി വിവരം ശേഖരിച്ചു വരുന്നു എന്നു മാത്രമാണ്. കഴിഞ്ഞ വര്ഷം മേയ് 28 കെ.എസ്. ശബരീനാഥ് ചോദിച്ചത് ഈ സര്ക്കാര് ഊരാളുങ്കല് സൊസൈറ്റിക്കു ആകെ എത്ര കോടി രൂപയുടെ കരാര് നല്കി എന്നാണ്. ഇതിനും വിവരം ശേഖരിക്കുന്നവെന്നാണ് മുഖ്യമന്ത്രിയുടെ മറുപടി
അതെ സമയം മന്ത്രി ജി. സുധാകരന്റെ ഓഫിസില് ആരും ഊരാളുങ്കലിനെക്കുറിച്ചുള്ള ഉത്തരം മുക്കിയില്ല. ടെന്ഡറില്ലാതെ പൊതുമരാമത്ത് ഏല്പ്പിച്ച പ്രവൃത്തികള് സംബന്ധിച്ച് കഴിഞ്ഞ വര്ഷം ജൂണ് 11ന് ലീഗിലെ എന്. ഷംസുദ്ദീനാണ് മന്ത്രിയോട് ചോദ്യമുന്നയിച്ചത്. ഊരാളുങ്കലിനു നല്കിയ കരാറുകളുടെ മുഴുവന് വിവരങ്ങളും മന്ത്രി ഉത്തരത്തില് വിശദീകരിച്ചു. അതിലൂടെയാണ് ഊരാളുങ്കലിനു നല്കിയ പദ്ധതികളുടെയും കരാറുകളുടെയും വിശദാംശങ്ങള് ആദ്യമായി പുറത്തുവന്നത്. എന്നാല്, പൊതുമരാമത്ത് വകുപ്പ് നല്കിയ കരാറുകളുടെ സംബന്ധിച്ച വിവരങ്ങളേ മന്ത്രി സുധാകരനു നല്കാനാകൂ. വിവിധ വകുപ്പുകള് നല്കിയ ഒട്ടേറെ കരാറുകള് വേറെയുമുണ്ട്. അവയുടെ ക്രോഡീകരിച്ച വിവരം മുഖ്യമന്ത്രി വഴിയാണു കിട്ടുക. നിയമസഭാംഗങ്ങളുടെ ചോദ്യങ്ങള്ക്ക് സര്ക്കാര് മറുപടി നല്കാതിരിക്കുന്നത് അംഗങ്ങളുടെ അവകാശലംഘനത്തിന്റെ പരിധിയില് വരുന്നതാണ്.
https://www.facebook.com/Malayalivartha