പ്രധാനമന്ത്രിയുടെ അഭിനന്ദനത്തിന് പിന്നാലെ നാടിന്റെ അഭിനന്ദന പ്രവാഹം; മുംതാസിനെ സ്വീകരിക്കാന്‍ നാടൊരുങ്ങി; രാജ്യാന്തരപ്രശസ്തി നേടി അരുവിത്തുറ സെന്റ് ജോര്‍ജ് കോളേജും; പ്രധാനമന്ത്രിയെ അത്ഭുതപ്പെടുത്തിയ ഹിന്ദിയിലെ പ്രസംഗം ഇങ്ങനെ
പ്രധാനമന്ത്രി നരേന്ദ്രമോദി ട്വിറ്ററിലൂടെ അഭിനന്ദിച്ച അരുവിത്തുറ സെന്റ് ജോര്‍ജ് കോളേജിലെ മൂന്നാം വര്‍ഷ ഇംഗ്ലീഷ് വിഭാഗം വിദ്യാര്‍ഥിനി എസ്.മുംതാസിന് അഭിനന്ദനപ്രവാഹം. ഡല്‍ഹിയില്‍ നടന്ന ദേശീയ യൂത്ത് പാര്‍ലമെന്റിലെ പ്രസംഗമികവിനാണ് പ്രധാനമന്ത്രിയുടെ കൈയടി ലഭിച്ചത്. സര്‍വത്രിക വാര്‍ഷിക വരുമാനം എന്ന വിഷയത്തിലാണ് യൂത്ത് പാര്‍ലമെന്റില്‍ മുംതാസിന്റെ പ്രസംഗം. അതും ഹിന്ദിയില്‍. ദക്ഷിണണേന്ത്യയില്‍ നിന്നും ഹിന്ദി ഇതരസംസ്ഥാനങ്ങളില്‍ നിന്നും വരുന്ന കുട്ടികള്‍ ഇംഗ്ലീഷ് ഭാഷ തെരഞ്ഞെടുക്കുമ്പോള്‍ മുംതാസ് ഇവിടെയും വ്യത്യസ്ത പുലര്‍ത്തി. പിന്നെ വ്യക്തവും കൃത്യവുമായ ഹിന്ദി ഭാഷയിലുള്ള പ്രസംഗം പ്രധാനമന്ത്രി ശ്രദ്ധിച്ചില്ലെങ്കിലെ അത്ഭുതപ്പെടേണ്ടതായിട്ടുള്ളു. ആറാം ക്ലാസ് മുതല്‍ തന്നെ പ്രസംഗകല മുംതാസ് അഭ്യസിച്ചിയിരുന്നു. സൈനികനായ അച്ഛന്റെ സ്വാധീനം ഹിന്ദി ഭാഷയിലും മുംതാസിനെ തല്‍പരയാക്കി. പാര്‍ലമെന്റ് മന്ദിരത്തിന്റെ വേദിയില്‍ വി.വി.ഐ.പികളെ ഉള്‍ക്കൊള്ളുന്ന ഹാളില്‍ പ്രസംഗ നടത്തുമ്പോള്‍ പരിഭ്രമമല്ല അഭിമാനമാണ് തോന്നിതെന്ന് മുംതാസ് മലയാളി വാര്‍ത്തയോട് പ്രതികരിച്ചു.
എന്‍.എസ്.എസ്. വൊളന്റിയറായി കേരളത്തെ പ്രതിനിധീകരിച്ച് 2020-ലെ റിപ്പബ്ലിക് ദിന പരേഡില്‍ മുംതാസ് പങ്കെടുത്തിട്ടുണ്ട്. എം.ജി.സര്‍വകലാശാലയിലെ മികച്ച എന്‍.എസ്.എസ്. വൊളന്റിയറായും തിരഞ്ഞെടുക്കപ്പെട്ടിട്ടുണ്ട്. നെഹ്റു യുവകേന്ദ്രയുടെ ആഭിമുഖ്യത്തില്‍ കേരളത്തില്‍ നടന്ന മത്സരത്തില്‍ ഒന്നാം സ്ഥാനം ലഭിച്ചതിലൂടെയാണ് പാര്‍ലമെന്റിലെ സെന്‍ട്രല്‍ ഹാളില്‍ നടന്ന മത്സരത്തില്‍ പങ്കെടുക്കാന്‍ മുംതാസിന് അവസരം ലഭിച്ചത്. മുംതാസിനൊപ്പം കേരളത്തെ പ്രതിനിധികരിച്ച് വേറെ രണ്ടു വിദ്യാര്‍ഥികള്‍ കൂടിയുണ്ടായിരുന്നു. എന്നാല്‍ അവര്‍ക്കൊന്നും ലഭിക്കാത്ത ഭാഗമാണ് മുംതാസിനെ തേടിയെത്തിയത്. മുംതാസ് നടത്തിയ പ്രസംഗത്തിന്റെ വീഡിയോ പ്രധാനമന്ത്രി ട്വീറ്റ് ചെയ്തതിലൂടെയും മുംതാസിനും അരുവിത്തുറ സെന്റ് ജോര്‍ജ് കോളേജിനും രാജ്യാന്തരപ്രശസ്തി ലഭിച്ചു.
മുംതാസിന്റെ മികവിലൂടെ അരുവിത്തുറ കോളേജിന് അന്തര്‍ദേശീയ അംഗീകാരം ലഭിച്ചതിന്റെ സന്തോഷം പങ്കുവെച്ച് കോളേജ് മാനേജര്‍ റവ. ഡോ. അഗസ്റ്റിന്‍ പാലക്കാപറമ്പില്‍ ഡല്‍ഹിയിലുള്ള മുംതാസിനെ വിളിച്ച് അഭിനന്ദനം അറിയിച്ചു. കോളേജിലെ ഏറ്റവും മിടുക്കിയായ വിദ്യാര്‍ഥിനിയാണ് മുംതാസ് എന്നും ഇനിയും ഉയരങ്ങളില്‍ ഈ വിദ്യാര്‍ഥിനി എത്തുമെന്നും പ്രിന്‍സിപ്പല്‍ ഡോ. റെജി വര്‍ഗീസ് മേക്കാടന്‍ തന്റെ അനുമോദനസന്ദേശത്തില്‍ അറിയിച്ചു. സ്‌കൂളിന്റെ എന്‍.എസ്.എസിന്റെ പ്രവര്‍ത്തനങ്ങളില്‍ സജീവ സാനിധ്യമായ മുംതാസ് കോളേജിന്റെ പ്രിയങ്കരിയാണ്. കോളേജില്‍ എത്തുന്ന മുംതാസിന് വന്‍ സ്വീകരണം നല്‍കാനുള്ള തയ്യാറെടുപ്പിലാണ് തങ്ങളെന്ന് ഡോ റെജി വര്‍ഗ്ഗീസ് മലയാളി വാര്‍ത്തയോട് പറഞ്ഞു.
പത്തനംതിട്ട മുണ്ടപ്ലാക്കുഴിയില്‍ എം.ഇ.ഷാജി-റഷീദ ദമ്പതിമാരുടെ മകളാണ് മുംതാസ് ഇന്ന് ഡല്‍ഹിയില്‍ നിന്നും കേരളത്തില്‍ മടങ്ങിയെത്തി. പത്തനംതിട്ട എംപി ആന്റോ ആന്റണി, പി.സി ജോര്‍ജ് എം.എല്‍.എ തുടങ്ങിയവര്‍ മുംതാസിനെ ഫോണില്‍ വിളിച്ച് അഭിനന്ദിച്ചു. സ്വന്തം നാട്ടുക്കാരുടെയും കോളേജിന്റെയും അഭിനന്ദനം ഏറ്റവുവാങ്ങുന്ന തിരക്കിലാണ് ഈ മിടുക്കി ഇപ്പോള്‍.
https://www.facebook.com/Malayalivartha
