മന്ത്രി കെടി ജലീലിന്റെ ഫേസ്ബുക്ക് പോസ്റ്റില്‍ വിമര്‍ശനവുമായി കോളേജ് അദ്ധ്യാപിക. 'ഉന്നത വിദ്യാഭ്യാസ മേഖലയ്ക്ക് 3000 കോടി. വൈജ്ഞാനിക വിസ്ഫോടനത്തിന് കാതോര്‍ത്ത് കേരളം' എന്ന തലക്കെട്ടില്‍ മന്ത്രി ഫേസ്ബുക്കില്‍ പോസ്റ്റ് ചെയ്ത കുറിപ്പിന് താഴെയുള്ള കമന്റ് ബോക്സിലാണ് അദ്ധ്യാപിക വിമര്‍ശനവുമായെത്തിയത്.

പതിനാലു വര്‍ഷം മുന്‍പത്തെ അതായത് 2006 റെഗുലേഷന്‍ പ്രകാരമുള്ള ശമ്പളം വാങ്ങി ജോലി ചെയ്യുന്ന കോളേജ് അധ്യാപകര്‍ക്ക് 2016 റെഗുലേഷന്‍ പ്രകാരമുള്ള ശമ്പളം കൊടുത്തിട്ടുമതി ഈ മേനി പറച്ചില്‍. പിശകില്ലാതെ ഒരു ഉത്തരവ് ഇറക്കാന്‍ കെല്‍പ്പില്ലാത്ത ഒരു വകുപ്പും മന്ത്രിയും വന്നിരിക്കുന്നു. ഉന്നത വിദ്യാഭ്യാസത്തെ നശിപ്പിക്കാന്‍ എന്നാണ് അസ്റ്റന്റ് പ്രൊഫസര്‍ മന്ത്രിയുടെ പോസ്റ്റിന് കമാന്റായി രേഖപ്പെടുത്തിയത്. ഇതിനെ അനുകൂലിച്ചും എതിര്‍ത്തും നിരവധി പേര്‍ വന്നതോടെ മന്ത്രിയുടെ പോസ്റ്റിനെക്കാള്‍ കൂടുതല്‍ അതിന് വന്ന കമന്റ് ചര്‍ച്ചയായി. ഇതോടെയാണ് മന്ത്രി മറുപടിയുമായി രംഗത്ത് വരുകയായിരുന്നു.

അസിസ്റ്റന്റ് പ്രൊഫസര്‍ക്ക് കുറച്ചുകൂടെ മാന്യതയാകാം. കുട്ടികളെ പഠിപ്പിക്കുന്നതും ഇത്തരം ഭാഷയിലാണോ? വിതച്ചതല്ലേ കൊയ്യൂ' എന്നാണ് മന്ത്രി നല്‍കിയ മറുപടി. എന്നാല്‍ താന്‍ പറഞ്ഞതില്‍ വസ്തുതാ വിരുദ്ധമായി എന്തെങ്കിലുമുണ്ടോ എന്ന് അദ്ധ്യാപിക മന്ത്രിയുടെ കമന്റിന് മറുപടിയായി ചോദിക്കുന്നുണ്ട്. മാന്യത വിട്ട് എന്തു പരാമര്‍ശമാണ് കമാന്റിലുള്ളതെന്ന ചോദ്യവും ഉയര്‍ന്നിട്ടുണ്ടെങ്കിലും മന്ത്രി ഇതിനോട് പ്രതികരിച്ചില്ല.

ബജറ്റില്‍ വിദ്യാഭ്യാസ മേഖലക്ക് ലഭിച്ച പരിഗണന ചൂണ്ടികാട്ടിയാണ് മന്ത്രിയുടെ ഫെയ്‌സ്ബുക്ക് പോസ്റ്റ്. സംസ്ഥാനത്തെ സര്‍വ്വകലാശാലകളെയും ഉന്നതവിദ്യാഭ്യാസ സ്ഥാപനങ്ങളെയും അന്തര്‍ദേശീയ നിലവാരത്തിലെത്തിക്കാന്‍ ലക്ഷ്യം വച്ചുള്ള ബജറ്റാണ് പിണറായി സര്‍ക്കാറിനു വേണ്ടി ഡോ: തോമസ് ഐസക് അവതരിപ്പിച്ചിരിക്കുന്നതെന്ന് കെ.ടി ജലീല്‍ തന്റെ പോസ്റ്റില്‍ പറയുന്നു. ഉന്നത വിദ്യാഭ്യാസം സാര്‍വത്രികമാക്കുന്നതോടൊപ്പം മികവുറ്റതും ലോകോത്തരവുമാക്കുന്നതിന് സാധ്യമായതെല്ലാം ബജറ്റ് വിഭാവന ചെയ്യുന്നുണ്ട്. വരും വര്‍ഷങ്ങളില്‍ നമ്മുടെ സര്‍വകലാശാലകള്‍ക്ക് ലോക റാങ്കിംഗുകളില്‍ മെച്ചപ്പെട്ട സ്ഥാനം കൈവരിക്കാന്‍ ഉതകുംവിധമുള്ള പദ്ധതികളാണ് ധനകാര്യ വകുപ്പ് മന്ത്രി 2021-22 ബജറ്റിലൂടെ മുന്നോട്ടു വയ്ക്കുന്നത്.

സര്‍വകലാശാലകളും ഗവ:, എയ്ഡഡ് കോളേജുകളും അഫിലിയേറ്റഡ് സ്വാശ്രയ കോളേജുകളും സാങ്കേതിക സ്ഥാപനങ്ങളും ഉള്‍പ്പെടുന്ന നമ്മുടെ ഉന്നത വിദ്യാഭ്യാസ മേഖലയില്‍ പഠനത്തോടൊപ്പം ഗവേഷണത്തിനും പ്രാമുഖ്യം നല്‍കുന്നതിന്റെ പ്രാധാന്യം പിണറായി സര്‍ക്കാരിന്റെ ബജറ്റ് എടുത്തു കാട്ടുന്നു. നിലവിലുള്ള പരമ്പരാഗത പാഠ്യ രീതികളിലും ഗവേഷണ സമീപനങ്ങളിലും കാലാനുസൃതമായ മാറ്റവും മൂല്യ വര്‍ദ്ധനവും നമ്മുടെ ഉന്നത വിദ്യാഭ്യാസ സ്ഥാപനങ്ങളെ മുന്‍പന്തിയില്‍ എത്തിക്കുന്നതിനാവശ്യമാണെന്ന് ചൂണ്ടികാണിക്കുന്ന ബജറ്റ്, ഉന്നത വിദ്യാഭ്യാസ മേഖലയിലെ ഗ്രോസ്സ് എന്റോള്‍മെന്റ് റേഷ്യോ 75% ത്തില്‍ എത്തിക്കുമെന്ന് ഉറപ്പ് നല്‍കുകയും ചെയ്യുന്നു. ഇത്തരമൊരു ആശയം രാജ്യത്ത് മുന്നോട്ട് വെക്കുന്ന ആദ്യ സംസ്ഥാനമായി കേരളം മാറുകയാമെന്നും മന്ത്രി പോസ്റ്റില്‍ അവകാശപ്പെട്ടു.