പുതുച്ചേരിയില് കോണ്ഗ്രസിന് നഷ്ടമായത് മന്ത്രിസഭയിലെ രണ്ടാമനെ; നമശ്ശിവായം 27ന് ബി.ജെ.പിയില് ചേരും; ആദ്യം ലഫ്. ഗവര്ണറെ ഇറക്കി എം.എല്.എമാരെ സ്വന്തമാക്കി; പിന്നലെ മന്ത്രിസഭയില് നിന്നു തന്നെ ആളെ ചാടിച്ച് ഒപ്പം കൂട്ടി; വരുന്ന പുതുച്ചേരി നിയമസഭാ തിരഞ്ഞെടുപ്പിന് ബി.ജെ.പി തയ്യാറെടുക്കുന്നത് ഇങ്ങനെ
പുതുച്ചേരി മന്ത്രിസഭയില് നിന്നും രാജി വച്ച് ബി.ജെ.പി അംഗത്വം എടുക്കുന്നതിനായി കാത്തു നില്ക്കുന്ന നമശ്ശിവായം ചില്ലറക്കാരനല്ല. പാര്ട്ടിയിലെയും മന്ത്രിസഭയിലെയും രണ്ടാംസ്ഥാനക്കാരനാണ് നമശ്ശിവായം പൊതുമരാമത്ത് വകുപ്പാണ് കൈകാര്യം ചെയ്യുന്നത്. പുതുച്ചേരി കോണ്ഗ്രസ് സംസ്ഥാന മുന് അധ്യക്ഷന് കൂടിയായ നമശിവായം നിലവിലുള്ള വി. നാരായണസാമി മന്ത്രിസഭയില് രണ്ടാമനാണ്. 2016 തിരഞ്ഞെടുപ്പില് കോണ്ഗ്രസ് വിജയിച്ചതോടെ മുഖ്യമന്ത്രി സ്ഥാനത്തേക്ക് പരിഗണിക്കപ്പെട്ടിരുന്നു. എന്നാല് പാര്ട്ടി ഹൈക്കമാന്ഡില് സ്വാധീനമുള്ള വി. നാരായണസാമിക്കാണ് അന്ന് മുഖ്യമന്ത്രി സ്ഥാനം ലഭിച്ചത്. പകരം നമശിവായത്തിന് മന്ത്രിസ്ഥാനം ലഭിച്ചു. ഇത്തവണയും മുഖ്യമന്ത്രി സ്ഥാനത്തേക്ക് നമശിവായത്തിന് നോട്ടമുണ്ടായിരുന്നുവെങ്കിലും നാരായണസാമി തടസ്സമാണെന്ന് ഉറപ്പായതോടെയാണ് വിമതനീക്കങ്ങള് ആരംഭിച്ചത്.
മുഖ്യമന്ത്രി വി. നാരായണ സ്വാമിയുമായുള്ള തര്ക്കമാണ് പാര്ട്ടി വിടുന്ന സാഹചര്യത്തിലേക്ക് നമശ്ശിവായത്തെ നയിച്ചതെന്നാണ് റിപ്പോര്ട്ട്. പാര്ട്ടി വിരുദ്ധ പ്രവര്ത്തനങ്ങളുടെ പേരില് നമശ്ശിവായത്തെ പാര്ട്ടിയില്നിന്ന് പുറത്താക്കുന്നതായി പുതുച്ചേരി കോണ്ഗ്രസ് വ്യക്തമാക്കിയിട്ടുണ്ട്. നാലര വര്ഷമായി ജനങ്ങള്ക്കുവേണ്ടി ഒന്നും ചെയ്യാന് കഴിഞ്ഞില്ലെന്ന് നമശ്ശിവായം പറഞ്ഞു. നാല്പത് അംഗ പിസിസി ഭാരവാഹികളുടെ പട്ടിക നേതൃത്വത്തിന് കൊടുത്തിട്ട് അത് നടപ്പാക്കാന് പോലും കഴിഞ്ഞില്ല. ഈ സാഹചര്യത്തില് മന്ത്രിസ്ഥാനവും എംഎല്എ സ്ഥാനവും രാജിവെക്കുകയാണെന്ന് നമശ്ശിവായം മാധ്യമങ്ങളോട് പറഞ്ഞത്.
പാര്ട്ടി വിടാനുള്ള തീരുമാനം കഴിഞ്ഞ ദിവസം തന്നെ അദ്ദേഹം പ്രഖ്യാപിച്ചിരുന്നു. നമശ്ശിവായം 27ന് ഡല്ഹിയിലേക്ക് പോകുമെന്നും അന്ന് ബിജെപിയില് അംഗമാകുമെന്നുമാണ് ഇപ്പോള് പുറത്തുവരുന്ന വിവരം. മൂന്ന് മുതല് അഞ്ച് എംഎല്എമാരെ തന്റെ കൂടെ കൊണ്ടുപോകാനുള്ള ശ്രമം നമശ്ശിവായം നടത്തുന്നുണ്ട്. രണ്ടുമാസത്തിനപ്പുറം പുതുച്ചേരിയില് നിയമസഭ തിരഞ്ഞെടുപ്പ് നടക്കാനിരിക്കുകയാണ്. പുതുച്ചേരിയില് നടക്കാനിരിക്കുന്ന തിരഞ്ഞെടുപ്പില് നേട്ടമുണ്ടാക്കാനുള്ള ബിജെപിയുടെ ശ്രമങ്ങളുടെ ഭാഗമായാണ് പുതിയ നീക്കമെന്നാണ് സൂചന.
കഴിഞ്ഞ നിയമസഭാതിരഞ്ഞെടുപ്പില് തനിച്ച് മത്സരിച്ച ബി.ജെ.പി.ക്ക് സംസ്ഥാനത്തെ 30 സീറ്റുകളില് ഒന്നില്പ്പോലും വിജയിക്കാന് സാധിച്ചിരുന്നില്ല. 2.4 ശതമാനം വോട്ടാണ് പാര്ട്ടി ആകെ നേടിയത്. എന്നാല്, പിന്നീട് നാമനിര്ദേശം ചെയ്യപ്പെടുന്ന മൂന്ന് എം.എല്.എ. പദവികള് ലഫ്.ഗവര്ണറുടെ അധികാരം ഉപയോഗിച്ച് ബി.ജെ.പി. നേടി. സംസ്ഥാന സര്ക്കാരിന്റെ ശുപാര്ശ പരിഗണിക്കാതെയാണ് മൂന്ന് ബി.ജെ.പി. നേതാക്കളെ ലഫ്.ഗവര്ണര് കിരണ് ബേദി എം.എല്.എ.മാരായി നാമനിര്ദേശം ചെയ്തത്. ഇത്തവണ എന്.ആര്. കോണ്ഗ്രസ്, എ.ഐ.എ.ഡി.എം.കെ. പാര്ട്ടികളുമായി സഖ്യത്തില് മത്സരിക്കാന് ഒരുങ്ങുന്ന ബി.ജെ.പി. നമശിവായത്തെ ഒപ്പം കൂട്ടുന്നത് വലിയനേട്ടമാകുമെന്ന കണക്കുകൂട്ടലിലാണ്.
https://www.facebook.com/Malayalivartha