കുഴല്പ്പണത്തിന് പിന്നിലെ ആര്.എസ്.എസ് ബന്ധം തെളിയിക്കാന് പ്രത്യേക സംഘം; പുതിയ നീക്കവുമായി സര്ക്കാര്; കേസില് ഇതുവരെ അറസ്റ്റിലായത് 19 പേര്; രാഷ്ട്രീയ നേതൃത്വത്തെ കുറിച്ച് പൊലീസിന് വ്യക്തമായ വിവരം ലഭിച്ചതായി സൂചന
കൊടകര കുഴല്പ്പണ കവര്ച്ചക്കേസ് പുതിയ വഴിത്തിരിവിലേക്ക്. കേസില് ആര്.എസ്.എസിന്റെ ബന്ധം തെളിയിക്കുക എന്ന ലക്ഷ്യത്തോടെ പ്രത്യേക അന്വേഷണ സംഘത്തിന് രൂപം നല്കിയിരിക്കുകയാണ് പൊലീസ്. തൃശ്ശൂര് റെയ്ഞ്ച് ഡി.ഐ.ജിയുടെ നേതൃത്വത്തിലുളള പ്രത്യേക സംഘമാണ് കേസില് അന്വേഷണം നടത്തുക. ഡി.ജി.പിയുടെ ഉത്തരവിനെ തുടര്ന്നാണ് തീരുമാനം.
കവര്ച്ചാസംഘത്തില് ഉള്പ്പെട്ട എല്ലാവരെയും കഴിഞ്ഞ ദിവസങ്ങളില് പൊലീസ് പിടികൂടിയിരുന്നു. ഇതിനു പിന്നാലെയാണ് പണത്തിന്റെ ഉറവിടം കണ്ടെത്താനുള്പ്പെടെ അന്വേഷണം വ്യാപിപ്പിക്കുന്നത്. പണം കൊടുത്തുവിട്ട കോഴിക്കോട്ടെ അബ്കാരി ധര്മരാജന് ആര്.എസ്.എസ്. ബന്ധമുണ്ടെന്ന് പൊലീസ് നേരത്തെ കണ്ടെത്തിയിരുന്നു. കേസില് കവര്ച്ചാസംഘത്തില് ഉള്പ്പെട്ട 19 പേരെയാണ് പൊലീസ് ഇതുവരെ പിടികൂടിയത്. മുഖ്യപ്രതികളിലൊരാളായ കണ്ണൂര് ഇരിട്ടി സ്വദേശി റഹീമിനെ കഴിഞ്ഞ ദിവസമാണ് അറസ്റ്റ് ചെയ്തത്. ഇയാളില്നിന്ന് മാത്രം 13 ലക്ഷം രൂപ കണ്ടെടുത്തിരുന്നു.
ഏപ്രില് മൂന്നിനാണ് കൊടകരയില് വ്യാജ വാഹനാപകടമുണ്ടാക്കി കുഴല്പ്പണം കവര്ന്നത്. 25 ലക്ഷം രൂപയാണ് കവര്ന്നതെന്നായിരുന്നു ധര്മരാജന്റെയും ഡ്രൈവറായ ഷംജീറിന്റെയും പരാതി. എന്നാല് ഇതിനെക്കാളേറെ പണം കാറിലുണ്ടായിരുന്നതായി പൊലീസ് അന്വേഷണത്തില് കണ്ടെത്തി. ഏകദേശം മൂന്നരക്കോടിയോളം രൂപയാണ് നഷ്ടപ്പെട്ടതെന്നാണ് പൊലീസിന്റെ കണ്ടെത്തല്. പിടികൂടിയ പ്രതികളില്നിന്ന് ഇതുവരെ ഏകദേശം 40 ലക്ഷത്തിലധികം രൂപ കണ്ടെടുത്തിരുന്നു.
കൊടകര കുഴല്പ്പണ കേസില് ഉന്നത ബിജെപി നേതാക്കള്ക്ക് പങ്കുണ്ടെന്ന് സിപിഎം സംസ്ഥാന സെക്രട്ടേറിയറ്റ് നേരത്തെ ആരോപിച്ചിരുന്നു. തൃശൂര് കൊടകര കുഴല്പ്പണ കേസില് ഉന്നത ബിജെപി നേതാക്കളുടെ പങ്ക് കൂടുതല് വെളിപ്പെട്ടിരിക്കുന്നു. ഇതിനകം പുറത്തുവന്ന വിവരങ്ങള് ഞെട്ടിപ്പിക്കുന്നതാണ്. ചെറിയ മീനുകള് മാത്രമാണ് ഇപ്പോള് പിടിയിലായിട്ടുള്ളത്. ഇതിന് പിന്നില് ഉന്നത ബിജെപി നേതാക്കള്ക്ക് പങ്കുണ്ടെന്ന് വ്യക്തമാണ്. തിരഞ്ഞെടുപ്പില് ജനവിധി അട്ടിമറിക്കാന് ലക്ഷ്യമിട്ടാണ് കുഴല്പണം കടത്തിയത്. തീവ്രവര്ഗ്ഗീയ പ്രവര്ത്തനങ്ങള്ക്കും ബിജെപി കുഴല്പണം കടത്തുന്നുണ്ടെന്ന സംശയവും ഉയര്ന്നിട്ടുണ്ടെന്ന് സി.പി.എം പറഞ്ഞു.
സി.പി.എമ്മിന്റെ പ്രസ്താവനക്ക് പിന്നാലെയാണ് പൊലീസ് ആദ്യം ആര്.എസ്.എസ് ബന്ധം സ്ഥിരീകരിച്ചത്. ഇപ്പോള് അന്വേഷണ പുതിയ അന്വേഷണ സംഘത്തെയും നിയോഗിച്ച് ആര്.എസ്.എസ് നേതൃത്വത്തെ പ്രതിസ്ഥാനത്ത് കൊണ്ടുവരാനാണ് സി.പി.എം ശ്രമിക്കുന്നതെന്ന ആരോപണവും ശക്തമാണ്. കേസില് വ്യവസായി ധര്മ്മരാജന്, യുവമോര്ച്ച മുന് സംസ്ഥാന ട്രഷറര് സുനില് നായിക് എന്നിവരെ വീണ്ടും ചോദ്യം ചെയ്യും. കേസില് അറസ്റ്റിലായ ഒന്നാം പ്രതി മുഹമ്മദാലി സാജില്, കസ്റ്റഡിയിലുള്ള അബ്ദുള് റഷീദ് എന്നിവരില് നിന്ന് കിട്ടിയ നിര്ണായക വിവരങ്ങളുടെ അടിസ്ഥാനത്തിലാണ് വീണ്ടും ചോദ്യം ചെയ്യുന്നത്. രാഷ്ട്രീയ ബന്ധമടക്കമുള്ള വിവരങ്ങള് ഇരുവരില് നിന്നും ലഭ്യമായിട്ടുണ്ടെന്നാണ് സൂചന.
https://www.facebook.com/Malayalivartha