തിരഞ്ഞെടുപ്പ് പരാജയത്തിന്റെ ഉത്തരവാദിത്വം കെ.പി.സി.സി പ്രസിഡന്റിനും പ്രതിപക്ഷ നേതാവിനുമാണെന്ന് യൂത്ത് കോണ്‍ഗ്രസ്. ഉത്തരവാദിത്വം ഏറ്റെടുത്തുവെന്ന് പറയുമ്പോഴും രാജി വച്ച് ഒഴിയാന്‍ ഇരുവരും തയ്യാറാകുന്നില്ല. ഈ സാഹചര്യത്തില്‍ ഇവരെ ഹൈകമാന്റ് ഇടപെട്ട് നീക്കമെന്ന് ആവശ്യപ്പെട്ട് യൂത്ത് കോണ്‍ഗ്രസ് രംഗത്ത്. ഈ ആവശ്യം ഉന്നയിച്ച് കോണ്‍ഗ്രസ് ഇടക്കാല അധ്യക്ഷ സോണിയ ഗാന്ധിക്ക് യൂത്ത് കോണ്‍ഗ്രസിന്റെ കത്ത് നല്‍കി. യൂത്ത് കോണ്‍ഗ്രസിന്റെ 24 സംസ്ഥാന ഭാരവാഹികളാണ് സോണിയാ ഗാന്ധിക്ക് കത്ത് നല്‍കിയത്.

യുഡിഎഫ് കണ്‍വീണറെ മാറ്റണമെന്നും കത്തില്‍ ആവശ്യപ്പെടുന്നുണ്ട്. ജംബോ കെപിസിസിയും ഡിസിസികളും പിരിച്ചു വിടണം, കെ എസ് യു, യൂത്ത് കോണ്‍ഗ്രസ് സംസ്ഥാന കമ്മിറ്റികള്‍ പിരിച്ചുവിടണം തുടങ്ങിയവയാണ് കത്തിലെ മറ്റ് ആവശ്യങ്ങള്‍. നേതൃമാറ്റം എന്ന ആവശ്യം പാര്‍ട്ടി പ്രവര്‍ത്തകര്‍ക്കിടയില്‍ ഉയര്‍ന്നെങ്കിലും ഇതുമായി ബന്ധപ്പെട്ട് സജീവമായ ചര്‍ച്ചകളിലേക്ക് കോണ്‍ഗ്രസ് നേതൃത്വം കടന്നിരുന്നില്ല. കഴിഞ്ഞ ദിവസം ചേര്‍ന്ന രാഷ്ട്രീയകാര്യ സമിതിയിലും തീരുമാനിച്ചത് നേതൃമാറ്റം പോലെയുള്ള കാര്യങ്ങള്‍ വളരെ ആലോചിച്ച് സാവധാനം മതി എന്നായിരുന്നു.

ഈ സാഹചര്യത്തിലാണ് സമ്മര്‍ദ്ദവുമായി യൂത്ത് കോണ്‍ഗ്രസ് രംഗത്തെത്തിയിരിക്കുന്നത്. യൂത്ത് കോണ്‍ഗ്രസ് സംസ്ഥാന വൈസ് പ്രസിഡന്റിന്റെ നേതൃത്വത്തിലാണ് ഇപ്പോള്‍ കത്തയച്ചിരിക്കുന്നത്. പുനസംഘടന നടത്തിയില്ലെങ്കില്‍ പാര്‍ട്ടി എന്നെന്നേക്കുമായി ഇരുട്ടിലേക്ക് പോകുമെന്നും അതുകൊണ്ട് അടിയന്തരമായി നടപടി സ്വീകരിക്കണമെന്നുമാണ് കത്തില്‍ പറയുന്നത്.

നിയമസഭാ തിരഞ്ഞെടുപ്പിനെക്കുറിച്ചുള്ള മലയാളിയുടെ ഓര്‍മ്മ ഭരണമാറ്റത്തെക്കുറിച്ചുള്ള ഓര്‍മ്മ കൂടിയാണ്. ഇടതും വലതും മാറിമാറി വരുന്നതിന്റെ ഇടതടവില്ലാത്ത തുടര്‍ച്ച. അതുകൊണ്ടുതന്നെയാണ് കോണ്‍ഗ്രസ് നേതൃത്വത്തിലുള്ള യുഡിഎഫിനെ പരാജയപ്പെടുത്തി എല്‍ ഡി എഫ് നേടിയ ഭരണത്തുടര്‍ച്ച സമാനതകള്‍ ഇല്ലാത്തതാവുന്നത്.

രമേശ് ചെന്നിത്തലയും മുല്ലപ്പള്ളി രാമചന്ദ്രനും ഉമ്മന്‍ ചാണ്ടിയും അടക്കമുള്ള മുതിര്‍ന്ന കോണ്‍ഗ്രസ് നേതാക്കളെയാണ് ഈ പരാജയം കടുത്ത പ്രതിസന്ധിയിലാക്കുന്നത്. തുടര്‍ച്ചയായി 11 തവണ തന്നെ നിയമസഭയിലേക്ക് എത്തിച്ച പുതുപ്പള്ളിയില്‍ ഉമ്മന്‍ചാണ്ടിയുടെ ഭൂരിപക്ഷം 8504 ആയി കുറഞ്ഞ, യുഡിഎഫിന് ലഭിച്ച ആകെ സീറ്റുകളുടെ എണ്ണം 2016ലെ 47ല്‍ നിന്നും 41 ആയി കുറഞ്ഞ ഈ തിരഞ്ഞെടുപ്പ് ഫലം അതിനാല്‍, കോണ്‍ഗ്രസിനെ സംബന്ധിച്ച് ഒരു തലമുറ മാറ്റത്തിന്റെ സാധ്യതകള്‍ കൂടിയാണ് പറയുന്നത്.

ഗ്രൂപ്പ് രാഷ്ട്രീയത്തിന്റെ തുടര്‍ച്ചയില്‍ നിന്നും പാര്‍ട്ടിയെ മോചിപ്പിച്ച് മാറുന്ന കാലത്തെ അഭിമുഖീകരിച്ചില്ലെങ്കില്‍ നിലനില്‍പ്പ് പ്രതിസന്ധിയിലാവുന്ന വിലയിരുത്തലാണ് ഉണ്ടാകുന്നത്. നേതാവും അണികളും അവരുടെ ഗ്രൂപ്പും ചേര്‍ന്ന് ഒരു 'പാര്‍ട്ടി' പോലെയും ആ പാര്‍ട്ടികള്‍ ചേര്‍ന്ന് സംസ്ഥാന കോണ്‍ഗ്രസും എന്ന മാതൃകയ്ക്ക് ഇനി ആയുസ് ഉണ്ടാവില്ലെന്ന കൃത്യമായ സന്ദേശമാണ് ഇത്തവണത്തെ തിരഞ്ഞെടുപ്പ് ഫലം നല്‍കുന്നത്. സംഘടനാ തിരഞ്ഞെടുപ്പിലൂടെ ഒരു അഴിച്ചുപണിക്കുള്ള സാധ്യത പോലും പതിറ്റാണ്ടുകളോളം മുടങ്ങിയിരുന്ന കേരളത്തിലെ കോണ്‍ഗ്രസ് നേതൃത്വത്തില്‍ തലമുറമാറ്റമെന്ന ആവശ്യം ശക്തമാകുന്നത്. ഈ പരാജയം നല്‍കുന്ന സന്ദേശങ്ങളെ കോണ്‍ഗ്രസ് രാഷ്ട്രീയമായി എങ്ങനെ അതിജീവിക്കും എന്നത് കേരളത്തിന്റെ രാഷ്ട്രീയഭാവിയെ സംബന്ധിച്ച് ഏറെ നിര്‍ണായകവുമാണ്.

ദേശീയ തലത്തിലും തുടര്‍ച്ചയായി രണ്ടാം തവണയും പ്രതിപക്ഷത്തിരിക്കുകയാണ് കോണ്‍ഗ്രസ്. ആകെ അഞ്ച് സംസ്ഥാനങ്ങളില്‍ മാത്രമാണ് പാര്‍ട്ടി അധികാരത്തിത്തിലള്ളത്. തുടര്‍ച്ചയായി രണ്ടാംതവണയും അധികാരത്തില്‍ എത്തിയതിന്റെ ആത്മവിശ്വാസം പ്രകടിപ്പിക്കുന്ന എന്‍ഡിഎ സര്‍ക്കാരിനു മുന്നില്‍ ശക്തമായ ഒരു പ്രതിപക്ഷമാവാന്‍ കോണ്‍ഗ്രസിന് ആവുന്നില്ല. ബിജെപി എക്കാലവും ഉയര്‍ത്തിയ നയപരിപാടികളോട് ക്രിയാത്മകമായി എതിര്‍പ്പുയര്‍ത്താനോ തങ്ങള്‍ ഒരു ബദല്‍ ആണെന്ന തോന്നല്‍ ജനങ്ങളില്‍ സൃഷ്ടിക്കാനോ അവര്‍ക്ക് സാധിക്കാതെപോകുന്നു വെന്നത് വസ്തുതയാണ്.