സോളാര്‍ വിവാദം; മമ്മൂട്ടിയെ കൈരളിയില്‍ നിന്ന് മാറ്റിയേക്കും
സോളാര്‍ വിവാദത്തിനെതിരെ സി.പി.എം ശക്തമായ നടപടി എടുത്തിരിക്കെ നടന്‍ മമ്മൂട്ടിയെ കൈരളി ചാനലിന്റെ ചുമതലയില്‍ നിന്ന് നീക്കിയേക്കുമെന്ന്‌ പാര്‍ട്ടി വൃത്തങ്ങള്‍ സൂചിപ്പിച്ചു. സരിതയില്‍ നിന്നും മമ്മൂട്ടി പത്ത്‌ ലക്ഷം വാങ്ങിയെന്ന്‌ ബിജു രാധാകൃഷ്‌ണന്‍ മൊഴി നല്‍കിയിരുന്നു. അതിനാല്‍ അന്വേഷണ സംഘം താമസിക്കാതെ മമ്മൂട്ടിയെ ചോദ്യം ചെയ്യും. ഈ പശ്ചാത്തലത്തിലാണ്‌ അദ്ദേഹത്തെ മാറ്റാന്‍ ആലോചിക്കുന്നത്‌. സോളാര്‍ വിവാദം ആദ്യം പുറത്തുവിട്ട കൈരളി ഇതുവരെ മമ്മൂട്ടിക്കെതിരായ വാര്‍ത്ത നല്‍കിയിട്ടില്ല. ഇത്‌ സംബന്ധിച്ച്‌ മാധ്യമപ്രവര്‍ത്തകരോട്‌ സംസാരിക്കാനും അദ്ദേഹം തയ്യാറായിട്ടില്ല. ഷൂട്ടിംഗ്‌ സെറ്റിലും വീട്ടിലും മാധ്യമപ്രവര്‍ത്തകരെ കയറ്റരുതെന്ന്‌ മമ്മൂട്ടി കര്‍ശന നിര്‍ദ്ദേശം നല്‍കിയിട്ടുണ്ട്‌.
തട്ടിപ്പ്‌ സംഘത്തിന്റെ പണം വാങ്ങിയത്‌ മാത്രമല്ല പാര്‍ട്ടി തെറ്റായി കാണുന്നത്‌. ടീം സോളാറിന്റെ പരിപാടിയില്‍ പങ്കെടുത്തത്‌ വഴി പൊതുജനങ്ങളില്‍ വിശ്വാസ്യത ഉണ്ടാക്കുകയും ചെയ്‌തു എന്നാണ്‌ പാര്‍ട്ടി നേതൃത്വത്തിന്റെ വിലയിരുത്തല്‍. അതേസമയം താന്‍ 25000 രൂപയേ വാങ്ങിയുള്ളൂ എന്നും അത് മടക്കി നല്‍കുമെന്നുമാണ്‌ മമ്മൂട്ടി പറയുന്നത്‌. പക്ഷെ, ഒന്‍പതേ മുക്കാല്‍ ലക്ഷം രൂപ മമ്മൂട്ടി ലിക്വുഡ്‌ ക്യാഷായാണ്‌ നല്‍കിയതെന്ന്‌ ബിജു രാധാകൃഷ്‌ണന്‍ മൊഴി നല്‍കിയിട്ടുണ്ട്‌. മുമ്പ് നികുതി വെട്ടിപ്പ്‌ കേസ്‌ മമ്മൂട്ടിക്കെതിരെ ഉണ്ടായപ്പോഴും ഇതേ രീതിയിലാണ്‌ താരം നിര്‍മാതാക്കളില്‍ നിന്ന് പണം വാങ്ങിയിരുന്നെന്ന്‌ കണ്ടെത്തിയിരുന്നു.
താരങ്ങള്‍ സ്റ്റേജ്‌ ഷോയ്‌ക്കും ഉദ്‌ഘാടന പരിപാടികള്‍ക്കും പങ്കെടുക്കുമ്പോള്‍ വാങ്ങേണ്ട തുകയെക്കുറിച്ച്‌ താരസംഘടനയായ അമ്മ നിര്‍ദ്ദേശം നല്‍കിയിട്ടുണ്ട്‌. സൂപ്പര്‍ താരങ്ങള്‍ക്ക്‌ ലക്ഷങ്ങള്‍ നല്‍കണം. അങ്ങനെ വരുമ്പോള്‍ മമ്മൂട്ടി പറയുന്നത്‌ മുഖവിലയ്‌ക്കെടുക്കാനാകുന്നില്ല. കൈരളിയില്‍ തിരിച്ചെത്തിയ ജോണ്‍ ബ്രിട്ടാസ്‌ മമ്മൂട്ടിക്ക്‌ പിന്തുണയുമായി രംഗത്തുണ്ട്‌. എന്ത്‌ സംഭവിക്കുമെന്ന്‌ മൊഴി നല്‍കിയ ശേഷം അറിയാം.
https://www.facebook.com/Malayalivartha
