ശരത് ഒളിവിൽ തന്നെ... പൂട്ടാനൊരുങ്ങി അന്വേഷണ സംഘം; കേസിലെ മുഖ്യപ്രതിയായ പൾസർ സുനിയെ ചോദ്യം ചെയ്യാനുള്ള ക്രൈംബ്രാഞ്ച് ഹർജി നാളെ കോടതി പരിഗണിക്കും... സുപ്രീം കോടതി നിർദേശമനുസരിച്ച് ഫെബ്രുവരി 16ന് വിചാരണ അവസാനിപ്പിച്ച് വിധി പറയണം.
നടി ആക്രമിക്കപ്പെട്ട കേസിലെ വിഐപി ദിലീപിന്റെ സുഹൃത്ത് ശരത് ജി നായര് തന്നെയാണെന്ന് കഴിഞ്ഞ ദിവസമാണ് അന്വേഷണ സംഘം ഉറപ്പിച്ചത്. ശരത്തിന്റെ ആലുവയിലെ വീട്ടിലെ റെയ്ഡിന് ശേഷമാണ് പൊലീസ് ഉദ്യോഗസ്ഥര് ഇക്കാര്യം വ്യക്തമാക്കിയത്. എന്നാൽ അന്വേഷണ സംഘം കോടതിയിൽ തുടരന്വേഷണ പുരോഗതി റിപ്പോർട്ട് സമർപ്പിക്കേണ്ടത് നാളെ. സുപ്രീം കോടതി നിർദേശമനുസരിച്ച് ഫെബ്രുവരി 16ന് വിചാരണ അവസാനിപ്പിച്ച് വിധി പറയണം. കേസുമായി ബന്ധപ്പെട്ട് പുതിയ വെളിപ്പെടുത്തലുകൾ പുറത്തുവന്ന സാഹചര്യത്തിൽ കൂടുതൽ പേരുടെ മൊഴി രേഖപ്പെടുത്തേണ്ടതുണ്ട്. അതിനാൽത്തന്നെ റിപ്പോർട്ട് സമർപ്പിക്കാൻ അന്വേഷണ സംഘം കൂടുതൽ സമയം ചോദിച്ചേക്കും.
കേസിലെ മുഖ്യപ്രതിയായ പൾസർ സുനിയെ ചോദ്യം ചെയ്യാനുള്ള ക്രൈംബ്രാഞ്ച് ഹർജി നാളെയാണ് കോടതി പരിഗണിക്കുന്നത്. സംവിധായകൻ ബാലചന്ദ്രകുമാർ പറഞ്ഞ 'വിഐപി' ദിലീപിന്റെ സുഹൃത്ത് ശരത്താണെന്ന് കഴിഞ്ഞ ദിവസം സ്ഥിരീകരിച്ചിരുന്നു. ഒളിവിൽ പോയ ഇയാളെ കണ്ടെത്താനായി തെരച്ചിൽ ഊർജിതമാക്കിയിരിക്കുകയാണ് അന്വേഷണ സംഘം.
കേസിലെ നിര്ണായക തുമ്പാവുമെന്ന് അന്വേഷണ സംഘം കരുതുന്നയാളാണ് വിഐപി. നടിയെ ആക്രമിച്ച കേസില് തുടക്കം മുതല് വിഐപിക്ക് പങ്കുണ്ടെന്നാണ് ഇതുവരെ പുറത്തു വന്ന വിവരങ്ങള് വ്യക്തമാക്കുന്നത്. നടിയെ ആക്രമിച്ച കേസില് പ്രതിപ്പട്ടികയിലുള്ള ദിലീപിനൊപ്പം നിന്ന നിര്ണായക സാന്നിധ്യം, സാക്ഷികളെ സ്വാധീനിച്ചു, അന്വേഷണ ഉദ്യോഗസ്ഥരെ വകവരുത്താന് പദ്ധതിയിട്ടു, നടിയെ ആക്രമിച്ച ദൃശ്യങ്ങള് ദിലീപിന് എത്തിച്ച് നല്കി തുടങ്ങി നിരവധി വെളിപ്പെടുത്തലുകളാണ് ഇതിനകം വിഐപിക്കെതിരെ പുറത്തു വന്നിട്ടുള്ളത്.
എന്നാൽ കേസിലെ വിഐപി ശരത്താണെന്ന നിഗമനത്തിലാണ് അന്വേഷണസംഘം കഴിഞ്ഞ ദിവസം അദ്ദേഹത്തിന്റെ വീട്ടില് റെയ്ഡ് നടത്തിയത്. ഹോട്ടല്, ട്രാവല് ഏജന്സി ബിസിനസ് നടത്തുന്ന ശരത്ത് ദിലീപിന്റെ അടുത്ത സുഹൃത്ത് കൂടിയാണ്. ഇയാളെ ചോദ്യം ചെയ്യാന് പൊലീസ് വിളിച്ചിരുന്നെങ്കിലും ഹാജരായിരുന്നില്ല. ഇതിന് പിന്നാലെയാണ് റെയ്ഡ് നടത്തിയത്. ശരതിന്റെ ഫോണ് കുറച്ച് ദിവസങ്ങളായി സ്വിച്ച് ഓഫ് ആയിരുന്നു. ഇക്കാര്യം ശരത്തിന്റെ സ്ഥാപനത്തിലെ ജീവനക്കാരും സ്ഥിരീകരിച്ചിരുന്നു. അറസ്റ്റ് ഭയന്ന് ഇയാള് മുന്കൂര് ജാമ്യാപേക്ഷയുമായി കോടതിയെ സമീപിച്ചിട്ടുണ്ട്.
താന് വിഐപിയെന്ന് സംശയിക്കുന്നവരില് ശരത്തിന്റെ പേരും ബാലചന്ദ്രകുമാര് പറഞ്ഞിരുന്നു. ദിലീപിന്റെ സഹോദരന് അനൂപ് നിര്മിച്ച സിനിമയുടെ ധനസഹായ പങ്കാളി കൂടിയായിരുന്നു ശരത്ത്. ദിലീപിന്റെ കുടുംബവുമായി വളരെ അടുത്ത ബന്ധമുള്ളയാളാണ് വിഐപിയെന്നാണ് സംവിധായകന് ബാലചന്ദ്രകുമാര് പറഞ്ഞിരുന്നത്. കാവ്യ മാധവന് അദ്ദേഹത്തെ 'ഇക്ക' എന്നാണ് വിളിച്ചിരുന്നതെന്നും ബാലചന്ദ്രകുമാര് റിപ്പോര്ട്ടര് ടിവിയോട് പറഞ്ഞിരുന്നു. മാത്രമല്ല, ദിലീപിന്റെ സഹോദരിയുടെ മകന് ശരത് അങ്കിള് വന്നിട്ടുണ്ടെന്നു പറയുന്നത് താന് കേട്ടിട്ടുണ്ടെന്നും ബാലചന്ദ്രകുമാര് പറഞ്ഞിരുന്നു.
https://www.facebook.com/Malayalivartha