ആവേശകരമായ സമരം പെട്ടന്ന് നിര്ത്തിയതില് പാര്ട്ടി പ്രവര്ത്തകര്ക്ക് ആശങ്ക, ഉള്ളുകളികളെപ്പറ്റി വിമര്ശനം, അണികളെ കൂടെ നിര്ത്താനായി വിശദീകരണ യോഗങ്ങള്
ആവേശകരമായി നടത്തിവന്ന ഒരു ജനകീയ പ്രക്ഷോഭത്തെ പെട്ടന്ന് അവസാനിപ്പിച്ചതിലെ ഉള്ളുകളികളെ പറ്റി സിപിഎം പാര്ട്ടി അണികള്ക്ക് വ്യാപക പരാതി. ഉമ്മന്ചാണ്ടിയുടെ രാജിയില് കലാശിക്കുമായിരുന്ന സമരം ഇടയ്ക്ക്വച്ച് നിര്ത്തിയതിന്റെ ഉത്തരവാദിത്വം ആരെന്നാണ് പാര്ട്ടി പ്രവര്ത്തകരുടെ ചോദ്യം. മുഖ്യമന്ത്രിയുള്പ്പെടാത്ത ജുഡീഷ്യല് അന്വേഷണത്തിന് പാര്ട്ടി നേതാക്കള് എന്തിന് വഴങ്ങി എന്നാണ് പ്രവര്ത്തകര് ചോദിക്കുന്നത്. ഇങ്ങനെയൊരു ഒത്തുതീര്പ്പിനാണോ പ്രവര്ത്തകരെ കേരളത്തിന്റെ നാനാ ഭാഗങ്ങളില് നിന്നും വിളിച്ച് കൊണ്ടുവന്നതെന്നാണ് പലര്ക്കും സംശയം.
അര്ക്കും നാട്ടില് ഇറങ്ങാന് പോലും പറ്റുന്നില്ല. എല്ലായിടത്തും ഉപരോധസമരത്തെ കളിയാക്കിക്കൊണ്ടുള്ള പോസ്റ്ററുകള് മാത്രം. എല്ലായിടത്തും ഇപ്പോള് ധീരനായത് ഉമ്മന് ചാണ്ടിയാണ്. ലക്ഷപേരെ തോല്പ്പിക്കാന് അര ചാണ്ടിയെന്നാണ് ഇപ്പോള് പൊതുവേ കളിയാക്കി പറയുന്നത്.
എന്നാല് സര്വ്വ പ്രവര്ത്തകരുടേയും ആത്മവിശ്വാസം കെടുത്തുന്നതായിരുന്നു പെട്ടന്നുള്ള സമരം നിര്ത്തല്. ഒരേസമയം ഉമ്മന് ചാണ്ടിയുടെ രാജി ആവശ്യപ്പെടുകയും അതേസമയം തന്നെ ഉമ്മന് ചാണ്ടി ഇപ്പോള് രാജിവയ്ക്കേണ്ടെന്ന നേതൃത്വത്തിന്റെ തീരുമാനവുമാണ് പാര്ട്ടി പ്രവര്ത്തകരെ കുഴയ്ക്കുന്നത്.
വിജയക്കൊടി പാറിച്ച് തിരിച്ചു വരാനായി ചെണ്ടമേളത്തോടെ യാത്രയായവരെ തിരിച്ചു വന്നപ്പോള് സ്വീകരിക്കാന് ആരുമില്ല. നാട്ടുകാരായ കോണ്ഗ്രസുകാരുടെ കളിയാക്കല് മാത്രം മിച്ചം.
എല്ലാപ്രവര്ത്തകരുടെ മനസിലും ഒരു വല്ലായ്മ, ഒരു മരവിപ്പ്. പാര്ട്ടിക്കു വേണ്ടി ലക്ഷക്കണക്കിന് ആള്ക്കാര് സര്വ്വവും ഉപേക്ഷിച്ച് വന്നപ്പോള് തങ്ങളോടൊന്ന് ആലോചിക്കാതെ പെട്ടെന്ന് സമരം പിന്വലിച്ചു.
ഇടയ്ക്ക് ഉമ്മന് ചാണ്ടി ചര്ച്ചയ്ക്ക് വേണ്ടി വിളിച്ചപ്പോഴും രാജിയുടെ മുഹൂര്ത്തം അറിയിക്കാനാണ് കോടിയേരി ബാലകൃഷ്ണന് ആവശ്യപ്പെട്ടത്. അതാകട്ടെ സമരക്കാര്ക്ക് വീര്യവുമായി.
എന്നാല് കോടിയേരി ഇക്കാര്യം പറഞ്ഞ് മണിക്കൂറിനകമാണ് സമരത്തിന്റെ അന്ത്യം കുറിച്ച മുഹൂര്ത്തമായത്.
ജുഡീഷ്യല് അന്വേഷണം പ്രഖ്യാപിക്കുന്നത് നേതൃത്വത്തിന് മുന്കൂട്ടി അറിയാമെന്നതു പോലെയാണ് എല്ഡിഎഫ് യോഗം ചേര്ന്ന് സമരം പെട്ടെന്ന് പിന്വലിച്ചത്.
ഇങ്ങനെ പാര്ട്ടി പ്രവര്ത്തകരുടെ ആശങ്ക നിരവധിയാണ്. ഈ ആശങ്കയ്ക്കും അവരുന്നയിക്കുന്ന ചോദ്യങ്ങള്ക്കും ഉത്തരം കണ്ടെത്താന് ശ്രമിക്കുകയാണ് പാര്ട്ടി നേതൃത്വം. അതിനായി പാര്ട്ടിക്കുള്ളില് വിശദീകരണ യോഗങ്ങള് നടത്താനൊരുങ്ങുകയാണ് സിപിഎം. സമരം അവലോകനം ചെയ്യാന് എല്ലാ ജില്ലാ കമ്മിറ്റികളും വിളിച്ചുചേര്ക്കാന് സിപിഎം തീരുമാനിച്ചു. ഏരിയാതല റിപ്പോര്ട്ടിംഗും നടത്തും. താഴെതട്ടിലുള്ള അണികളെക്കൂടി വിശ്വാസത്തിലെടുത്തായിരിക്കും യോഗങ്ങള് നടത്തുക.
https://www.facebook.com/Malayalivartha