പത്രാധിപരുടെ സ്വാതന്ത്ര്യം നിര്‍വചിക്കണമെന്ന്‌ പ്രഭാവര്‍മ്മ
പത്രാധിപന്‍മാരുടെ സ്വാതന്ത്ര്യം നിര്‍വചിക്കാന്‍ സമയമായെന്ന്‌ കവിയും ഇക്കൊല്ലത്തെ വയലാര്‍ അവാര്‍ഡ്‌ ജോതാവും ദേശാഭിമാനി പത്രാധിപരുമായ പ്രഭാവര്‍മ്മ മലയാളിവാര്‍ത്തയോട്‌: വയലാര്‍ അവാര്‍ഡിന്‌ അര്‍ഹമായ തന്റെ 'ശ്യാമമാധവം' എന്ന കാവ്യം മലയാളം വാരികയുടെ പത്രാധിപരായിരിക്കെ എസ്.ജയചന്ദ്രന്‍നായര്‍ പ്രസിദ്ധീകരണം നിര്‍ത്തി വച്ചതിനെ കുറിച്ച് പ്രതികരിക്കുകയായിരുന്നു വര്‍മ്മ.
'തന്റെ അഭിപ്രായം പത്രാധിപര്‍ മറ്റൊരു എഴുത്തുകാരനില്‍ അടിച്ചേല്‌പിക്കാന്‍ പാടില്ല. എതിരഭിപ്രായമുണ്ടെങ്കില്‍ രേഖപ്പെടുത്താം. നമ്മുടെ അഭിപ്രായം മറ്റൊരാള്‍ പിന്തുടരണമെന്ന്‌ പറഞ്ഞാല്‍ എം.എഫ്‌ ഹുസൈന്‌ ചിത്രം വരക്കാനും തസ്‌ലീമ നസീറിന്‌ രചന നിര്‍വഹിക്കാനും കഴിയില്ല' പ്രഭാവര്‍മ്മ പറഞ്ഞു.
ടി.പി.ചന്ദ്രശേഖരനോടുള്ള സ്‌നേഹമല്ല പകരം കമ്മ്യൂണിസ്റ്റ്‌ പാര്‍ട്ടിയോടുള്ള അലര്‍ജിയാണ്‌ പത്രാധിപര്‍ക്കുള്ളതെന്ന്‌ പ്രഭാവര്‍മ്മ പറഞ്ഞു.
'ടി.പി.ചന്ദ്രശേഖരനെ കുറിച്ചുള്ള എന്റെ നിലപാടില്‍ യാതൊരു മാറ്റവുമില്ല. ആ മരണത്തെ ഞാന്‍ അനുകൂലിച്ചിട്ടില്ല. ഒരു കൊലപാതകത്തിന്റെ പേരു പറഞ്ഞ് കേരളത്തെ ഇന്നത്തെ നിലയിലാക്കിയ ഒരു പ്രസ്ഥാനത്തെ അപകീര്‍ത്തിപ്പെടുത്തരുത്‌ എന്നാണ്‌ ഞാന്‍ അന്ന്‌ പറഞ്ഞത്‌. ആ നിലപാടില്‍ ഇന്നും ഞാന്‍ ഉറച്ചും നില്‍ക്കുന്നു'.
എഴുത്തുകാരന്റെ രാഷ്‌ട്രീയ നിലപാട് നോക്കി അയാളുടെ കൃതിയെ വിലയിരുത്തരുതെന്നും പ്രഭാവര്‍മ്മ പറഞ്ഞു. ' എഴുത്തുകാരന്‍ ഒരു രചന നിര്‍വഹിക്കുമ്പോള്‍ അയാള്‍ അനുഭവിക്കുന്ന ദുഖം പറഞ്ഞറിയിക്കാന്‍ കഴിയുന്നതല്ല. അത്തരമൊരു ദുഖം അനുഭവിക്കുന്ന ഒരാളെ ആദരിച്ചില്ലെങ്കിലും അനാദരിക്കരുത്‌. ഒരു കവിത നിര്‍ത്തിവയ്‌ക്കുമ്പോള്‍ എഴുത്തുകാരനുണ്ടാവുന്ന മാനസിക വിഷമം പത്രാധിപര്‍ മനസ്സിലാക്കണം'. പ്രഭാവര്‍മ്മ പറഞ്ഞു. ഒക്‌ടോബര്‍ 27 ന് വര്‍മ്മ അവാര്‍ഡ്‌ ഏറ്റുവാങ്ങും.
https://www.facebook.com/Malayalivartha
