സര്ക്കാര് സേവനങ്ങള് ഇനി വിരല്ത്തുമ്പില്
സര്ക്കാറിന്റെ വിവിധ സേവനങ്ങള്ക്കായി ഇനി സര്ക്കാര് ഓഫീസുകള് കയറി ഇറങ്ങുകയോ ക്യൂ നില്ക്കുകയോ വേണ്ട. എല്ലാ സര്ക്കാര് സേവനങ്ങളും ഇനിമുതല് നിങ്ങളുടെ വിരല്ത്തുമ്പില് എത്തിക്കുന്ന ഇ-ഡിസ്ട്രിക്ട് പബ്ലിക് പോര്ട്ടല് 18 മുതല് തുടക്കമാകും.
പോര്ട്ടലിന്റെ ഉദ്ഘാടനം വ്യവസായ, ഐ.ടി വകുപ്പ് മന്ത്രി പി.കെ കുഞ്ഞാലിക്കുട്ടി തിരുവനന്തപുരം മാസ്ക്കറ്റ് ഹോട്ടലില് നിര്വഹിക്കും. ഓണ്ലൈന് ആര്.ടി.ഐ സേവനത്തിന്റെ പരാതി പരിഹാര സേവനത്തിന്റെ ഉദ്ഘാടനം റവന്യൂ വകുപ്പ് മന്ത്രി അടൂര് പ്രകാശ്, ഓണ്ലൈന് പേയ്മെന്റ് സേവനങ്ങളുടെ ഉദ്ഘാടനം ധനകാര്യ വകുപ്പ് മന്ത്രി കെ.എം മാണി മുതലായവര് നിര്വഹിക്കും.
സര്ക്കാറിന്റെ വിവിധ വകുപ്പുകള് നല്കുന്ന സേവനങ്ങള് സുതാര്യമായും, നിഷ്പക്ഷമായും വേഗത്തിലും പൊതുജനങ്ങള്ക്ക് ലഭ്യമാക്കുന്നതിന് വിഭാവനം ചെയ്തതാണ് ഇ-ഡിസ്ട്രിക്ട് പദ്ധതി. ഇതിന്റെ ആദ്യഘട്ടമെന്ന നിലയില് റവന്യൂ വകുപ്പിന്റെ കീഴിലുള്ള 23 ഇനം സര്ട്ടിഫിക്കറ്റുകള് അക്ഷയ കേന്ദ്രങ്ങള് വഴി ഓണ്ലൈനായി ലഭ്യമാക്കിയിരുന്നു. ഈ പദ്ധതിയുടെ തുടര്ച്ചയായി സര്ക്കാറിന്റെ വിവിധ സേവനങ്ങള് ഇ-ഡിസ്ട്രിക്ട് പോര്ട്ടല് (https://edistrict.kerala.gov.in) വഴി പൊതുജനങ്ങള്ക്ക് നേരിട്ട് ലഭ്യമാക്കുക എന്നതാണ് ലക്ഷ്യം.
പൊതുജനങ്ങള്ക്ക് ആവശ്യമായ സര്ക്കാര് സേവനങ്ങള്ക്കായി വേണ്ടിവരുന്ന പണമിടപാടുകള് ഓണ്ലൈനായി അടയ്ക്കാവുന്ന ആധുനിക സംവിധാനമായ ഇ-പേയ്മെന്റ് ഗേറ്റ്വേ സൗകര്യം ഇ-ഡിസ്ട്രിക്ട് പബ്ലിക് പോര്ട്ടലില് ലഭ്യമാക്കിയിട്ടുണ്ട്. ഈ സംവിധാനത്തിലൂടെ പൊതുജനങ്ങള്ക്ക് വിവിധ സര്ക്കാര് സേവനങ്ങള് ലഭ്യമാകുന്നതിലേക്കായി ഇന്റര്നെറ്റ് ബാങ്കിംഗ്, ഡെബിറ്റ് കാര്ഡ്, ക്രെഡിറ്റ് കാര്ഡ് എന്നിവ ഉപയോഗിച്ച് 66ല്പരം ബാങ്കുകള് മുഖേന പണമിടപാടുകള് ഓണ്ലൈനായി നടത്തുന്നതിനുള്ള സൗകര്യം ലഭ്യമാണ്.
നിലവില് ഇ-ഡിസ്ട്രിക്ട് പദ്ധതിയുടെ ഭാഗമായി അക്ഷയ കേന്ദ്രങ്ങള് വഴി പൊതുജനങ്ങള്ക്ക് ലഭ്യമാക്കിവരുന്ന റവന്യൂ വകുപ്പിന്റെ 23 സര്ട്ടിഫിക്കറ്റ് സേവനങ്ങള് ഇ-ഡിസ്ട്രിക്ട് പബ്ലിക് പോര്ട്ടലിലൂടെ ലഭ്യമാക്കുന്നതിനായി ആധാര് നമ്പര്, ഇ-മെയില് ഐ.ഡി, മൊബൈല് നമ്പര് എന്നിവ ആവശ്യമാണ്.
ഇതോടൊപ്പം തന്നെ വിവരാവകാശം, പൊതുജനപരാതി പരിഹാരം, ടെലഫോണ്, വെള്ളം, വൈദ്യുതി തുടങ്ങിയ രണ്ടായിരത്തോളം വിവിധ ബില്ലുകളും ഫീസുകളും അടയ്ക്കുന്നതിനുള്ള സേവനങ്ങള്കൂടി (യൂട്ടിലിറ്റ് പേയ്മെന്റ് സര്വീസുകള്) ഉള്പെടുത്തി ഇ-ഡിസ്ട്രിക്ട് സേവനങ്ങള് പബ്ലിക് പോര്ട്ടല് വഴി വിപുലീകരിച്ചിട്ടുണ്ട്.
https://www.facebook.com/Malayalivartha