മേടം രാശി (അശ്വതി, ഭരണി, കാർത്തിക ആദ്യ കാൽഭാഗം): ഈ വാരം സമ്മിശ്ര ഫലങ്ങൾ  കുടുംബാംഗങ്ങളുമായും ബന്ധുക്കളുമായും ചില അഭിപ്രായ വ്യത്യാസങ്ങൾ ഉടലെടുക്കാം. കൂടാതെ ആരോഗ്യപരമായ ചെറിയ ബുദ്ധിമുട്ടുകളും നേരിടാൻ സാധ്യതയുണ്ട്. എന്നാൽ വാരം അവസാനത്തോടെ വളരെക്കാലമായി കാണാതിരുന്ന ബന്ധുക്കളെ കണ്ടുമുട്ടാനും അവരുമായി ചേർന്ന് വിശേഷപ്പെട്ട ചടങ്ങുകളിലോ പുണ്യസ്ഥലങ്ങളിലോ യാത്ര ചെയ്യാനും അവസരമുണ്ടാകും. രോഗങ്ങളിൽ നിന്ന് മോചനം ലഭിക്കുകയും കുടുംബത്തിൽ സമാധാനവും സന്തോഷവും കൈവരികയും ചെയ്യും. അപ്രതീക്ഷിത സമ്മാനങ്ങൾ ലഭിക്കാനും സമൂഹത്തിൽ ആദരവും അംഗീകാരവും നേടാനും സാധ്യത കാണുന്നു.

ഇടവം രാശി (കാർത്തിക അവസാന മുക്കാൽ ഭാഗം, രോഹിണി, മകയിര്യം ആദ്യ പകുതിഭാഗം): വാരത്തിന്റെ തുടക്കത്തിൽ സ്ത്രീകളുമായി സൗഹൃദം സ്ഥാപിക്കാനും മനസ്സിന് സന്തോഷം നൽകുന്ന കാര്യങ്ങളിൽ ഏർപ്പെടാനും അവസരം ലഭിക്കും. കീർത്തി, ധനലാഭം, തൊഴിൽ വിജയം എന്നിവയും ഉണ്ടാകും. എന്നാൽ വാരമധ്യത്തോടെ കുടുംബ സൗഖ്യക്കുറവ്, ഉറക്കമില്ലായ്മ എന്നിവ അനുഭവപ്പെടാം. വാരം അവസാനിക്കുമ്പോൾ കുടുംബ കലഹങ്ങൾ മാനസിക പ്രശ്നങ്ങൾക്ക് വഴി വെച്ചേക്കാം. മനോദുഃഖം ഉണ്ടാകാനും ഭക്ഷണക്രമത്തിലെ താളപ്പിഴകൾ കാരണം ഉദരസംബന്ധമായ പ്രശ്‌നങ്ങൾ ഉടലെടുക്കാനും സാധ്യതയുണ്ട്. ശത്രുക്കളുടെ ഇടപെടൽ കാരണം പല നല്ല അവസരങ്ങളും നഷ്ടമാകാൻ ഇടയുണ്ട്. കോടതി കേസുകളിൽ പ്രതികൂലമായ നിലപാടുകൾ നേരിടേണ്ടി വരികയും അപമാനിക്കപ്പെടുന്ന സാഹചര്യങ്ങൾ ഉണ്ടായേക്കാം.

മിഥുനം രാശി (മകയിര്യം അവസാന പകുതിഭാഗം, തിരുവാതിര, പുണർതം ആദ്യ മുക്കാൽഭാഗം): വളരെക്കാലമായി അലട്ടിയിരുന്ന അസുഖങ്ങളിൽ നിന്ന് മോചനം ലഭിക്കുകയും ആരോഗ്യം മെച്ചപ്പെടുകയും ചെയ്യും. മാനസിക പ്രശ്‌നങ്ങൾ പരിഹരിക്കപ്പെടും. സന്താനങ്ങളെക്കുറിച്ച് അഭിമാനിക്കാൻ അവസരമുണ്ടാകും. കുടുംബസമേതം പുണ്യസ്ഥലങ്ങൾ സന്ദർശിക്കാൻ സാധിക്കും. സമൂഹത്തിലെ ഉന്നതരുമായി സൗഹൃദം സ്ഥാപിക്കാൻ അവസരമുണ്ടാകും. ധനലാഭം, കാര്യവിജയം, നല്ല ഭക്ഷണം എന്നിവ അനുഭവത്തിൽ വരും. എന്നാൽ വാരത്തിന്റെ അവസാനത്തോടെ തൊഴിൽപരമായ ക്ലേശങ്ങളും മാനസിക-ശാരീരിക അസ്വസ്ഥതകളും നേരിടേണ്ടി വന്നേക്കാം. വളർത്തുമൃഗങ്ങളെ ശ്രദ്ധയോടെ പരിപാലിച്ചില്ലെങ്കിൽ അവയിൽ നിന്ന് ദോഷഫലങ്ങൾ ഉണ്ടാകാനോ ഇഴ ജന്തുക്കളിൽ നിന്നും ഉപദ്രവം ഉണ്ടാകുവാനോ ഇടയുണ്ട്.

കർക്കിടകം രാശി (പുണർതം അവസാന കാൽഭാഗം, പൂയം, ആയില്യം): വാരത്തിന്റെ തുടക്കത്തിൽ തൊഴിൽ തടസ്സങ്ങൾ, സാമ്പത്തിക ബുദ്ധിമുട്ടുകൾ, രോഗദുരിതങ്ങൾ, വാഹന ദുരിതം എന്നിവ അലട്ടാൻ സാധ്യതയുണ്ട്. അനാവശ്യ കൂട്ടുകെട്ടുകൾ വഴി ദുഷ്പ്രവർത്തികളിൽ ഏർപ്പെടാനും അത് മാനഹാനിക്കും ധനനഷ്ടത്തിനും വഴിവെക്കാനും ഇടയുണ്ട്. അന്യസ്ത്രീബന്ധം, വരവിൽ കവിഞ്ഞ ചെലവ്, കുടുംബാംഗങ്ങളുമായും ബന്ധുക്കളുമായും അഭിപ്രായ വ്യത്യാസങ്ങൾ എന്നിവയും ഉണ്ടാകും. എന്നാൽ വാരമധ്യത്തോടെ ദാമ്പത്യ ഐക്യം മെച്ചപ്പെടുകയും തൊഴിൽ രംഗത്ത് വിജയം നേടുകയും ചെയ്യും. സമൂഹത്തിലെ പ്രമുഖ വ്യക്തികളെ പരിചയപ്പെടാനും അവരോടൊപ്പം സമയം ചെലവഴിക്കാനും അവസരം ലഭിക്കും. ശത്രുക്കൾ ആയിരുന്നവർ മിത്രങ്ങളായി മാറും.

ചിങ്ങം രാശി (മകം, പൂരം, ഉത്രം ആദ്യ കാൽഭാഗം): വാരത്തിന്റെ തുടക്കത്തിൽ ബന്ധുക്കളിൽ നിന്നുള്ള ഉപദ്രവം, വ്യവഹാരങ്ങളിൽ പരാജയം, ഉദരരോഗങ്ങൾ എന്നിവ അലട്ടാൻ സാധ്യതയുണ്ട്. സർക്കാർ സംബന്ധമായ കാര്യങ്ങളിൽ ദോഷാനുഭവങ്ങളും കാര്യതടസ്സങ്ങളും ഉണ്ടാകും. കുടുംബാംഗങ്ങളുമായും അയൽക്കാരുമായും അഭിപ്രായ വ്യത്യാസങ്ങൾ ഉടലെടുക്കാൻ സാധ്യതയുണ്ട്. എന്നാൽ വാരം അവസാനത്തോടെ കുടുംബത്തിൽ മംഗളകർമ്മങ്ങൾ നടക്കാൻ സാധ്യതയുണ്ട്. ഉയർന്ന പദവികളും സമൂഹത്തിൽ ആദരവും ലഭിക്കും. ബിസിനസ്സ് രംഗത്തുള്ളവർക്ക് പുതിയ പ്രോജക്റ്റുകൾ ലഭിക്കും. സർക്കാർ ജോലി ചെയ്യുന്നവർക്ക് അർഹമായ സ്ഥാനക്കയറ്റം ലഭിക്കും.

കന്നി രാശി (ഉത്രം അവസാന മുക്കാൽഭാഗം, അത്തം, ചിത്തിര ആദ്യ പകുതിഭാഗം): ഈ വാരം ഗുണദോഷ സമ്മിശ്രമായിരിക്കും. തുടക്കത്തിൽ പ്രണയ ബന്ധങ്ങളിൽ വിജയം, പുതിയ വീട് വാങ്ങാനോ വീട് പുതുക്കി പണിയാനോ ഉള്ള സാധ്യത, സർക്കാർ ജോലി എന്നിവയ്ക്ക് സാധ്യത കാണുന്നു. വാരമധ്യത്തോടെ കുടുംബാംഗങ്ങളുമായി അഭിപ്രായ വ്യത്യാസങ്ങൾ, രോഗദുരിതങ്ങൾ എന്നിവ അലട്ടാൻ സാധ്യതയുണ്ട്. പ്രത്യേകിച്ചും ഹൃദയ സംബന്ധമായ രോഗങ്ങളുള്ളവർ ജാഗ്രത പാലിക്കണം. സർക്കാർ സംബന്ധമായ ദോഷാനുഭവങ്ങൾ, ശത്രുഭയം, കാര്യതടസ്സങ്ങൾ, കേസുകൾ എന്നിവയും നേരിടേണ്ടി വരാം. അന്യരിൽ നിന്ന് മോശമായ അനുഭവങ്ങൾ, അന്യസ്ത്രീബന്ധം, അഗ്നി മൂലം ദോഷഫലങ്ങൾ എന്നിവയും ഉണ്ടാവാൻ സാധ്യതയുണ്ട്.

തുലാം രാശി (ചിത്തിര അവസാന പകുതിഭാഗം, ചോതി, വിശാഖം ആദ്യ മുക്കാൽഭാഗം): ആഴ്ചയുടെ തുടക്കത്തിൽ തൊഴിൽപരമായ ബുദ്ധിമുട്ടുകളും മാനസിക പിരിമുറുക്കങ്ങളും സാമ്പത്തിക പ്രശ്നങ്ങളും ഉണ്ടാകാൻ സാധ്യതയുണ്ട്. എന്നാൽ ആഴ്ചയുടെ മധ്യത്തോടെ ഈ പ്രശ്നങ്ങളെല്ലാം മാറുകയും ആരോഗ്യം മെച്ചപ്പെടുകയും ചെയ്യും. ഇത് വലിയ ഊർജ്ജസ്വലത നൽകും. ചില പ്രമുഖ വ്യക്തികളുമായി പരിചയപ്പെടാനും അവരുമായി ചേർന്ന് പ്രവർത്തിക്കാനും അവസരം ലഭിക്കും. പ്രിയപ്പെട്ടവരുമായി ഒത്തുചേരാനും ഇഷ്ടഭക്ഷണങ്ങൾ കഴിക്കാനും സാധ്യതയുണ്ട്. ജീവിതത്തിൽ ചില സുപ്രധാന തീരുമാനങ്ങൾ എടുക്കാനും അവയിൽ വിജയിക്കാനും ഈ സമയം അനുകൂലമാണ്.

വൃശ്ചികം രാശി (വിശാഖം അവസാന കാൽഭാഗം, അനിഴം, തൃക്കേട്ട): ഈ ആഴ്ച ഗുണവും ദോഷവും കലർന്ന ഫലങ്ങൾ നൽകും. ആഴ്ചയുടെ തുടക്കത്തിൽ ആരോഗ്യപരമായ കാര്യങ്ങളിൽ പുരോഗതി ഉണ്ടാകും. ലോട്ടറി, നറുക്കെടുപ്പ് തുടങ്ങിയവയിൽ വിജയിക്കാനും അപ്രതീക്ഷിതമായ സമ്മാനങ്ങൾ ലഭിക്കാനും സാധ്യതയുണ്ട്. എന്നാൽ ആഴ്ചയുടെ മധ്യത്തോടെ മോശം സൗഹൃദങ്ങൾ കാരണം ധനനഷ്ടത്തിനും മാനഹാനിക്കും സാധ്യതയുണ്ട്. അതിനാൽ സൗഹൃദങ്ങൾ തിരഞ്ഞെടുക്കുമ്പോൾ ശ്രദ്ധിക്കണം. ദാമ്പത്യബന്ധത്തിൽ ചില അസ്വാരസ്യങ്ങൾ ഉണ്ടാകാൻ സാധ്യതയുണ്ടെങ്കിലും ആഴ്ചയുടെ അവസാനത്തോടെ കാര്യങ്ങൾ നല്ല രീതിയിൽ മാറും. ഈ സമയം പ്രിയപ്പെട്ടവരുമായി തീർത്ഥയാത്രകൾക്കോ ഉല്ലാസയാത്രകൾക്കോ പോകാൻ അവസരം ലഭിക്കും.

ധനു രാശി (മൂലം, പൂരാടം, ഉത്രാടം ആദ്യ കാൽഭാഗം): ആഴ്ചയുടെ തുടക്കത്തിൽ ചില പ്രതിസന്ധികളും ആരോഗ്യപ്രശ്നങ്ങളും ഉണ്ടാകാൻ സാധ്യതയുണ്ട്. എന്നാൽ ആഴ്ചയുടെ മധ്യത്തോടെ ഈ പ്രശ്നങ്ങളെല്ലാം മാറും. വളരെക്കാലമായി അനുഭവിച്ച മാനസിക ദുരിതങ്ങളിൽ നിന്ന് മോചനം ലഭിക്കുകയും ജീവിതത്തിൽ സന്തോഷിക്കാനുള്ള നിരവധി അവസരങ്ങൾ വന്നുചേരുകയും ചെയ്യും. തൊഴിൽപരമായ കാര്യങ്ങളിൽ ഉണ്ടായിരുന്ന തടസ്സങ്ങൾ നീങ്ങുകയും പുതിയതും ഉന്നതവുമായ ജോലികളിൽ പ്രവേശിക്കാൻ അവസരം ലഭിക്കുകയും ചെയ്യും. ബന്ധുക്കളിൽ നിന്ന് അപ്രതീക്ഷിതമായ സഹായം ലഭിക്കും. കുടുംബത്തിൽ മംഗളകർമ്മങ്ങൾ നടക്കാൻ സാധ്യതയുണ്ട്. അകന്നു കഴിഞ്ഞിരുന്ന ബന്ധുക്കളെയും സുഹൃത്തുക്കളെയും കണ്ടുമുട്ടാൻ അവസരം ലഭിക്കും.

മകരം രാശി (ഉത്രാടം അവസാന മുക്കാൽഭാഗം, തിരുവോണം, അവിട്ടം ആദ്യ പകുതിഭാഗം): ഈ ആഴ്ച ഗുണദോഷ സമ്മിശ്രമായ ഫലങ്ങൾ നൽകാൻ സാധ്യതയുണ്ട്. ആഴ്ചയുടെ തുടക്കത്തിൽ ദാമ്പത്യബന്ധത്തിൽ ഐക്യവും എവിടെയും ബഹുമാനവും അംഗീകാരവും ലഭിക്കും. എന്നാൽ ആഴ്ചയുടെ മധ്യത്തോടെ മോശം സൗഹൃദങ്ങൾ കാരണം പ്രശ്നങ്ങളിൽ അകപ്പെടാനും അപമാനം നേരിടാനും സാധ്യതയുണ്ട്. ആരോടാണ് ഇടപഴകുന്നത് എന്നതിൽ അതീവ ശ്രദ്ധ പുലർത്തണം. അപ്രതീക്ഷിത സംഭവങ്ങൾ ഉണ്ടാകാൻ സാധ്യതയുള്ളതുകൊണ്ട് ജാഗ്രത പാലിക്കുക. എന്നാൽ ആഴ്ചയുടെ അവസാനത്തോടെ കാര്യങ്ങൾ മെച്ചപ്പെടുകയും ജോലിയിൽ അംഗീകാരവും പ്രശംസയും ലഭിക്കുകയും ചെയ്യും. ധനലാഭം, കീർത്തി, ദാമ്പത്യബന്ധത്തിൽ ഐക്യം എന്നിവ ഉണ്ടാകും.

കുംഭം രാശി (അവിട്ടം അവസാന പകുതിഭാഗം, ചതയം, പൂരൂരുട്ടാതി ആദ്യ മുക്കാൽഭാഗം): ഈ ആഴ്ച വളരെ അനുകൂലമായ സമയമാണ്. ശത്രുക്കളെ അതിജീവിക്കാനും കീർത്തിയും ധനലാഭവും നേടാനും സാധിക്കും. വാഹനഭാഗ്യം ഉണ്ടാകാനും സാധ്യതയുണ്ട്. ജോലിസ്ഥലത്തോ ബിസിനസ്സിലോ അപ്രതീക്ഷിതമായി വരുമാനം വർദ്ധിക്കാൻ സാധ്യതയുണ്ട്. ദാമ്പത്യ ജീവിതത്തിൽ ഐക്യവും സന്തോഷവും വർദ്ധിക്കും. പങ്കാളിയുടെ ആത്മാർത്ഥമായ പിന്തുണയും സ്നേഹവും ലഭിക്കും. പ്രണയിക്കുന്നവർക്ക് വീട്ടുകാരുടെ അനുഗ്രഹത്തോടെ വിവാഹം നടക്കാൻ സാധ്യതയുണ്ട്. രാഷ്ട്രീയത്തിൽ പ്രവർത്തിക്കുന്നവർക്ക് സമൂഹത്തിൽ പേരും പ്രശസ്തിയും നേടാൻ സാധിക്കും.

മീനം രാശി (പൂരൂരുട്ടാതി അവസാന കാൽഭാഗം, ഉതൃട്ടാതി, രേവതി): ഈ ആഴ്ച ഗുണകരവും ദോഷകരവുമായ ഫലങ്ങൾ നൽകാൻ സാധ്യതയുണ്ട്. ആഴ്ചയുടെ തുടക്കത്തിൽ ചില നിയമപരമായ പ്രശ്നങ്ങളിൽ പരാജയപ്പെടാനോ ശത്രുക്കളുടെ ശല്യം കാരണം ബുദ്ധിമുട്ടുകൾ ഉണ്ടാകാനോ സാധ്യതയുണ്ട്. മറ്റുള്ളവരെ സഹായിക്കാൻ താല്പര്യം കാണിക്കുമെങ്കിലും അതിൽ നിന്ന് തിരിച്ചടികൾ നേരിടേണ്ടി വന്നേക്കാം. കുടുംബാംഗങ്ങളുമായി ചെറിയ കാര്യങ്ങൾക്ക് പോലും തർക്കങ്ങൾ ഉണ്ടാകാൻ സാധ്യതയുണ്ട്. എന്നാൽ ആഴ്ചയുടെ അവസാനത്തോടെ ഈ അവസ്ഥ മാറും. കുടുംബത്തിൽ ഐക്യവും സന്തോഷവും ഉണ്ടാകും. തൊഴിൽപരമായ കാര്യങ്ങളിൽ വിജയം നേടാനും ധനലാഭം ഉണ്ടാകാനും സാധ്യതയുണ്ട്. പുതിയ വസ്ത്രങ്ങളും ആഭരണങ്ങളും ലഭിക്കാനും യോഗമുണ്ട്.

ജ്യോതിഷസംബന്ധമായ നിങ്ങളുടെ സംശയങ്ങൾക്കും പരിഹാരങ്ങൾക്കും  ജയറാണി ഇ വി 9746812212