ചില കാര്യങ്ങള്‍ അങ്ങനെയാണ്‌. പ്രതീക്ഷിക്കാത്ത നേരത്ത്‌ പണികിട്ടും. മന്ത്രി അടൂര്‍പ്രകാശ്‌ തനിക്ക്‌ പിണഞ്ഞ അബദ്ധമോര്‍ത്ത്‌ പശ്ചാത്തപിക്കാത്ത നേരമില്ല.

ഭൂരഹിതരില്ലാത്ത കേരളം മന്ത്രി അടൂര്‍ പ്രകാശിന്റെ പദ്ധതിയാണ്‌. സോണിയാഗാന്ധി ഉദ്‌ഘാടനം ചെയ്‌ത മാസ്‌റ്റര്‍ പ്രോജക്‌ട്‌. ഭൂമിയില്ലാത്തവര്‍ക്ക്‌ ഭൂമി നല്‍കണമെന്ന മന്ത്രിയുടെ ഉദ്ദേശശുദ്ധിയില്‍ ആര്‍ക്കും സംശയമില്ല. എന്നാല്‍ സംഭവം അവിടെ നിന്നുരുന്നെങ്കില്‍ കുഴപ്പമില്ലായിരുന്നു.

തന്റെ പദ്ധതിയെ മാധ്യമങ്ങള്‍ വാതോരാതെ പുകഴ്‌ത്തുന്നത്‌ കണ്ടപ്പോള്‍ മന്ത്രിയുടെ കണ്‍ട്രോള്‍ പോയി. ഭൂരഹിതരില്ലാത്ത കേരളത്തിനുവേണ്ടി അധികം ഭൂമി കൈവശമുള്ളവരെല്ലാം ദാനം ചെയ്യണമെന്ന്‌ മന്ത്രി പ്രഖ്യാപിച്ചു. ഇങ്ങനെയുള്ളവര്‍ക്ക്‌ എല്ലാ ആനുകൂല്യങ്ങളും നല്‍കുമെന്നും മന്ത്രി പ്രഖ്യാപിച്ചു.

പ്രതിപക്ഷ നേതാവ്‌ വി.എസാണ്‌ ആദ്യത്തെ പാരയിറക്കിയത്‌. മന്ത്രിയുടെ കൈവശം 24.74 ഏക്കര്‍ സ്ഥലമുണ്ടെന്ന്‌ വി.എസ്‌. കണ്ടുപിടിച്ചു. സര്‍ക്കാര്‍ വെബ്‌സൈറ്റിലുള്ള കണക്കാണ്‌ വി.എസ്‌ പറഞ്ഞത്‌. ഒരാള്‍ക്ക്‌ പരമാവധി കൈവശം വയ്‌ക്കാവുന്നത്‌ 15 ഏക്കര്‍ മാത്രമാണെന്നും വി.എസ്‌ പറഞ്ഞു. അനധികൃതമായി മന്ത്രി കൈവശം വച്ചിരിക്കുന്ന 9.74 ഏക്കര്‍ സ്ഥലം മിച്ചഭൂമിയായി കരുതി കണ്ടുകെട്ടണമെന്നും വി.എസ്‌.ആവശ്യപ്പെട്ടു.

ഗൗരിയമ്മയാവാനാണ്‌ അടൂര്‍പ്രകാശ്‌ ഇറങ്ങി തിരിച്ചത്‌. ഇല്ലത്തു നിന്നുമിറങ്ങുകയും ചെയ്‌തു അമ്മാത്ത്‌ എത്തിയതുമില്ല എന്ന അവസ്ഥയിലാണ്‌ ഇപ്പോള്‍ മന്ത്രി. ഭൂമി, ദാനം ചെയ്യാന്‍ പറയാതിരുന്നെങ്കില്‍ വിന വരില്ലായിരുന്നു എന്നാണ്‌ മന്ത്രി ഇപ്പോള്‍ ആലോചിക്കുന്നത്‌.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha