കള്ളന്മാരില് നിന്ന് രക്ഷനേടാന് എ.ടി.എം പിന്നമ്പര് തലതിരിച്ചടിച്ചിട്ട് കാര്യമില്ല; സോഷ്യല് മീഡിയകള് വഴി പ്രചരിക്കുന്നത് വ്യാജ സന്ദേശം
ബാംഗ്ലൂരില് മലയാളി യുവതി എ.ടി.എമ്മില് ആക്രമിക്കപ്പെട്ടതിനെ തുടര്ന്ന് സോഷ്യല് മീഡിയകള് വഴി പ്രചരിക്കാന് തുടങ്ങിയ ഒരു വ്യാജ സന്ദേശത്തെക്കുറിച്ചാണ് ഇവിടെ പറയുന്നത്. നിങ്ങളോ നിങ്ങളുടെ സുഹൃത്തുക്കളോ ഷെയര് ചെയ്ത ഒരു പോസ്ററാണ് കളളന്മാരില് നിന്ന് രക്ഷനേടാന് എ.ടി.എം പിന് നമ്പര് തലതിരിച്ച് അടിക്കുക എന്നത്. എന്നാല് ഇത്തരം ഒരു സാങ്കേതിക വിദ്യയെക്കുറിച്ച് തൊട്ടടുത്ത ബാങ്കില് അന്വേഷിച്ചാല് അറിയാം ഇത് പ്രചാരത്തില് ഇല്ലാത്ത ഒന്നാണെന്ന്.
‘ഒരു മോഷ്ടാവ് നമ്മോട് എടി എമ്മില് നിന്ന് പണം എടുത്തു നല്കാന് ആവശ്യപ്പെട്ടാല് എതിര്ത്തുനില്ക്കാന് ശ്രമിക്കരുത്, കാരണം അയാള് എന്താണ് ചെയ്യാന് പോകുന്നത് എന്ന് നമുക്ക് അറിയില്ല. അതുകൊണ്ട് എ.ടി.എമ്മില് പിന് നമ്പര് കൊടുക്കുമ്പോള് തലതിരിച്ച്കൊടുക്കുക. (ഉദാ: നിങ്ങളുടെ പിന് നമ്പര് 1234 ആണെങ്കില് 4321 എന്ന് കൊടുക്കുക). അപ്പോള് മെഷീനില് നിന്ന് പണം വരുമെങ്കിലും അത് പകുതി വന്ന് നില്ക്കും മാത്രമല്ല മെഷീന് തന്നെ പോലീസിനെ വിവരം അറിയിച്ചുകൊള്ളും. എല്ലാ എ.ടി.എമ്മിലും ഈ സംവിധാനം ഉണ്ട്. പക്ഷെ എല്ലാവര്ക്കും ഇത് അറിയില്ല. അതുകൊണ്ട് നിങ്ങള്ക്ക് ഇത് പ്രധാനമായി തോന്നുന്നുണ്ടെങ്കില് ദയവായി ഷെയര് ചെയ്യുക’.
ഇതാണ് സോഷ്യല് മീഡിയകളിലൂടെ പ്രചരിക്കുന്ന വാര്ത്തയുടെ പൂര്ണരൂപം. ഇതിനെക്കുറിച്ച് അന്വേഷിക്കാന് പോലും നില്ക്കാതെയാണ് നമ്മള് എല്ലാവരും ആ വാര്ത്ത കൂട്ടത്തോടെ ഷെയര് ചെയ്തത്. എന്നാല് ഒരു നിമിഷം ആലോചിച്ചാല് തന്നെ നമുക്ക് മനസിലാകും ഇത് തെറ്റായ സന്ദേശമാണെന്ന്. കാരണം നേരെവായിച്ചാലും തിരിച്ചുവായിച്ചാലും ഒരേപോലെ ഉള്ള സംഖ്യകള് വരുന്ന അവസരത്തില് ഇതെങ്ങനെ സാധ്യമാകും? 1221,8998,5555 തുടങ്ങിയ സംഖ്യകള് വരുമ്പോഴത്തെ കാര്യമാണ് പറയുന്നത്.
1994ല് അമേരിക്കയില് ജോസഫ് സിംഗര് എന്നയാള് ഇത്തരത്തില് ഒരു സാങ്കേതിക വിദ്യകൊണ്ടു വന്നിരുന്നു. എന്നാല് ഒരു ബാങ്കും ഇത് സ്വീകരിക്കാന് തയ്യാറായില്ല. കാരണം മേല്പറഞ്ഞ സംഖ്യാപ്രശ്നം തന്നെ.
ഇത്തരത്തില് എന്തെങ്കിലും സുരക്ഷാ നടപടികള് ഉണ്ടെങ്കില് ബാങ്കുകള് തന്നെ അക്കാര്യം ഉപഭോക്താക്കളെ അറിയിക്കില്ലെ എന്നാണ് തിരുവനന്തപുരത്തെ ഒരു പ്രശസ്ത ബാങ്കിന്റെ മാനേജര് 'മലയാളി വാര്ത്ത'യോട് പറഞ്ഞത്. തീര്ച്ചയായിട്ടും അതു തന്നെയാണ് വസ്തുത, ഏത് ബാങ്കുകളും ഇത്തരം ഒരു സുരക്ഷാ നിര്ദേശം ഉണ്ടെങ്കില് അത് ആദ്യം തന്നെ ഉപഭോക്താക്കളെ അറിയിക്കും.
ഇതുപോലെ അനേകം തെറ്റിദ്ധരിപ്പിക്കുന്ന വാര്ത്തകള് സോഷ്യാല് മീഡിയകളില് പ്രചരിക്കുന്നുണ്ട്. ഇങ്ങനെയുള്ള മെസേജ് ലഭിക്കുമ്പോള് അതിനെക്കുറിച്ച് അന്വേഷിച്ച ശേഷം മാത്രം ഷെയര് ചെയ്യണമോ വേണ്ടയോ എന്ന തീരുമാനം എടുക്കുക.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha