ജിമിക്കി ഇനി നമ്മുടെ വിരല്‍ തുമ്പില്‍
ജിമിക്കി ഇട്ട മലയാളി പെണ്‍കൊടികളെ കാണാനുള്ള സുഖം ഒന്ന്‌ വേറെ തന്നെ. എന്നാല്‍ റെഡിമെയ്‌ഡ്‌ ആഭരണങ്ങളുടെ കടന്നു വരവോടെ ജിമിക്കിയുടെ ഡിമാന്‍ഡിന്‌ അല്‍പം മങ്ങലേറ്റു. പലരും തങ്ങളണിയുന്ന വസ്‌ത്രത്തിന്‌ മാച്ചായ ഫാന്‍സി കമ്മലുകളുടെ പുറകിലായി. ഇതിനിടയ്‌ക്കായിരുന്നു പേപ്പര്‍ കമ്മലുകളുടെ കടന്നു വരവ്‌. എത്‌ നിറത്തിലുമുള്ള ജിമിക്കി കമ്മലുകള്‍ ലഭ്യമായതോടെ ജിമിക്കി ഒരു ട്രെന്‍ഡായി.
50 രൂപ മുതല്‍ 500 രൂപവരെയുള്ള പേപ്പര്‍ കമ്മലുകള്‍ വിപണിയില്‍ ലഭ്യമാണ്‌. ഈ പേപ്പര്‍ കമ്മല്‍ കണ്ടിട്ട്‌ പലരും ചിന്തിച്ചിട്ടുണ്ടാവും ഇതെങ്ങനയാ ഉണ്ടാക്കുന്നതെന്ന്‌. പേപ്പര്‍ കൊണ്ട്‌ ജിമിക്കി മാത്രമല്ല പല വിധത്തിലുള്ള പൂക്കളും വളയങ്ങളും രൂപപ്പെടുത്തി മിടുക്കികള്‍ കാതില്‍ അണിയാറുണ്ട്‌. നമ്മള്‍ വായിക്കുന്ന പത്രക്കടലാസ്‌ ഉപയോഗിച്ചും കമ്മല്‍ നിര്‍മിക്കാം. അധികം കഴിവൊന്നും ഇല്ലാതെ തന്നെ ആര്‍ക്കും ഈ പേപ്പര്‍ കമ്മല്‍ പെട്ടെന്ന്‌ ഉണ്ടാക്കാവുന്നതേ ഉള്ളൂ.
ജിമിക്കി സീക്രട്ട്‌
പേപ്പര്‍ വട്ടത്തില്‍ ചുറ്റിയെടുത്ത്‌ കൈ കൊണ്ട്‌ പതിയെ ഉള്ളിലേക്ക്‌ അമര്‍ത്തി പശവച്ച്‌ ഒട്ടിച്ച്‌ കൊളുത്തും (ഐ പിന്‍) ഘടിപ്പിച്ച്‌ ഇയര്‍ ഹുക്കില്‍ കൊളുത്തി ഇട്ടാല്‍ ജിമിക്കി റെഡി.
5 മില്ലിമീറ്റര്‍ അല്ലെങ്കില്‍ 3 മില്ലിമീറ്റര്‍ വീതിയുള്ള ക്വില്ലിങ്‌ പേപ്പര്‍ പല നിറത്തില്‍ കടകളില്‍ വാങ്ങിക്കാന്‍ കിട്ടും. നിങ്ങളുടെ വസ്‌ത്രത്തിന്‌ ചേരുന്ന രണ്ടോ മൂന്നോ കളര്‍ പേപ്പറുകള്‍ ഇടകലര്‍ത്തി ചുറ്റിയെടുത്താല്‍ മറ്റാര്‍ക്കും ഇല്ലാത്ത അടിപൊളി ഡിസൈന്‍ കാതില്‍ കിടക്കും. 
പിന്നെ ഡ്രസിന്‌ മാച്ചു ചെയ്യുന്ന കമ്മല്‍ തേടി ലേഡീസ്‌ സ്‌റ്റോര്‍ അലച്ചിലും വേണ്ട. ഇനി ഇത്‌ തീരെ സിംപിളായിപ്പോയി എന്ന്‌ പരിഭവിക്കുന്നവര്‍ക്ക്‌ ഒട്ടിച്ചു വയ്‌ക്കാവുന്ന കല്ലുകളും മുത്തുകളും ഉപയോഗിച്ച്‌ ജിമിക്കിയുടെ ആര്‍ഭാടം കൂട്ടുകയുമാവാം. പൂര്‍ണതയ്‌ക്കായി ട്രാന്‍സ്‌പരന്റ്‌ നെയില്‍ പോളിഷ്‌ മീതെ കൊടുക്കാം.
പേപ്പര്‍ കമ്മല്‍ ഉണ്ടാക്കുന്നതിനാവശ്യമുള്ള പേപ്പറും പശയും കാതില്‍ ഘടിപ്പിക്കാനുള്ള കൊളുത്തും എല്ലാം പ്രമുഖ ഫാന്‍സി കടകളിലെല്ലാം ലഭ്യമാണ്‌.
ഇതേ രീതിയില്‍ നമ്മുടെ ടേസ്റ്റനുസരിച്ച്‌ ഡ്രസ്സിന്‌ മാച്ചായ ഏത്‌ കമ്മല്‍ വേണമെങ്കിലും ഇനി തുച്ഛമായ മുതല്‍ മുടക്കില്‍ ഉണ്ടാക്കാം. പ്രാഗത്ഭ്യമുള്ളവര്‍ക്ക്‌ നല്ല വരുമാനവുമുണ്ടാക്കാം.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
