നേതാജി ഉപയോഗിച്ചിരുന്ന കാര്‍ കാണാന്‍ സന്ദര്‍ശകരുടെ തിരക്ക്
ഇന്ത്യന്‍ സ്വാതന്ത്ര്യസമര നായകന്‍ നേതാജി സുഭാഷ്‌ ചന്ദ്രബോസ്‌ 1930 കളില്‍ ഉപയോഗിച്ചിരുന്ന ഫോര്‍ഡ്‌ സൂപ്പര്‍ ഡീലക്‌സ്‌ കാര്‍ കാണാന്‍ സന്ദര്‍ശകരുടെ തിരക്ക്.
പുക്‌തി ബലിഹാരയില്‍ ഭാരത്‌ കോക്കിംഗ്‌ കോള്‍ ലിമിറ്റഡിന്റെ ബരാരി കോക്ക്‌ പ്ലാന്റിലെ അടഞ്ഞുകിടന്ന വെയര്‍ഹൗസിലാണ്‌ രണ്ടാഴ്‌ച മുമ്പ്‌ കാര്‍ കണ്ടെത്തിയതെന്നു പുക്‌തി ബലിഹാര ഖനി മാനേജര്‍ കെ. സി. മിശ്ര പറഞ്ഞു. ഇതിന്റെ ചരിത്രപ്രാധാന്യം മനസിലാക്കി കോയ്‌ല നഗറിലെ ഗസ്റ്റ്‌ ഹൗസിലേക്ക്‌ മാറ്റി.
1930ലും 1940ലും നേതാജി ഈ കാര്‍ ഉപയോഗിച്ചിരുന്നതായി പ്രദേശത്തെ പഴമക്കാര്‍ പറഞ്ഞിട്ടുള്ളതായി മിശ്ര അറിയിച്ചു. അന്ന്‌ അദ്ദേഹം ടാറ്റാ ലേബര്‍ അസോസിയേഷന്റെ പ്രസിഡന്റായിരുന്നു. നേതാജിയുടെ അമ്മാവനും ബരാരി കോക്ക്‌ പ്ലാന്റിലെ കെമിക്കല്‍ എന്‍ജിനിയറുമായിരുന്ന അശോക്‌ ബോസിന്റേതായിരുന്നു കാര്‍. ബി ആര്‍ ആര്‍ 3201 എന്നതാണു രജിസ്‌ട്രേഷന്‍ നമ്പര്‍.
1972-73 കാലയളവിലാണ്‌ രജിസ്‌ട്രേഷന്‍ ആരംഭിച്ചതെന്നു ജില്ലാ ട്രാന്‍സ്‌പോര്‍ട്ട്‌ ഓഫീസര്‍ ആര്‍. ആര്‍. ശര്‍മ പറഞ്ഞു. അതിനു മുമ്പ്‌ പോലീസ്‌ സൂപ്രണ്ട്‌ ഓഫീസിലായിരുന്നു അതു രജിസ്റ്റര്‍ ചെയ്‌തിരുന്നത്‌.
1956 ഒക്‌ടോബറിലാണു ധന്‍ബാദ്‌ ജില്ലയായത്‌. പുരുളിയ ആയിരുന്നു ആസ്ഥാനം.
ഈ കാറിലായിരുന്നു നേതാജിയുടെ യാത്രയെന്ന്‌ ആളുകള്‍ പറയുന്നുണ്ടെങ്കിലും അതിന്റെ ചരിത്രപരമായ വസ്‌തുത കമ്പനി ഇതുവരെ പരിശോധിച്ചിട്ടില്ലെന്നു ചെയര്‍മാന്‍ കം മാനേജിംഗ്‌ ഡയറക്‌‌ടര്‍ ടി. കെ. ലാഹിരി പറഞ്ഞു.
https://www.facebook.com/Malayalivartha
