ലോകത്തെ ഏറ്റവും പ്രായമേറിയ ആരല്‍ മത്സ്യം നൂറ്റിഅമ്പത്തഞ്ചാം വയസ്സില്‍ യാത്രയായി
ലോകത്തെ ഏറ്റവും പ്രായമേറിയ ആരല്‍മത്സ്യം (ഈല്‍) നൂറ്റിഅമ്പത്തിയഞ്ചാം വയസ്സില്‍ വിടചൊല്ലി. തെക്കന്‍ സ്വീഡനില്‍ ബ്രാന്റവിക്‌ പട്ടണത്തിലെ ഒരു കിണറ്റില്‍ കഴിഞ്ഞിരുന്ന മത്സ്യം ചത്ത കാര്യം അതിന്റെ ഉടമസ്ഥരാണ്‌ അറിയിച്ചത്‌.
ഏല്‍ എന്ന പേരിലറിയപ്പെടുന്ന ആ മത്സ്യം വിടവാങ്ങിയതിനെപ്പറ്റി വലിയ പ്രതികരണമാണ്‌ സോഷ്യല്‍ മീഡിയയില്‍ സ്വീഡന്‍കാരുടെ ഭാഗത്തുനിന്നുണ്ടായത്‌.1859 ല്‍ ഈ മത്സ്യത്തെ ഒരു ബാലനാണ്‌ മത്സ്യബന്ധന പട്ടണമായ ബ്രാന്റവികിലെ കിണറ്റില്‍ നിക്ഷേപിച്ചത്‌.
ആരല്‍ മത്സ്യങ്ങള്‍ക്ക്‌ സാധാരണഗതിയില്‍ 15 മുതല്‍ 60 വര്‍ഷം വരെയാണ്‌ ആയുസ്സ്‌. പക്ഷെ ഏല്‍ അതൊക്കെ പിന്നിട്ട്‌ പോയി. അതില്‍ അത്ഭുതപ്പെടേണ്ടെന്നാണ്‌ നാട്ടുകാര്‍ പറയുന്നത്. കാരണം ആ മത്സ്യത്തിനൊപ്പം കിണര്‍ പങ്കിടുന്ന മറ്റൊരു ആരലിന്റെ പ്രായം 110 വര്‍ഷമാണ്‌.
പണ്ട്‌ കുളങ്ങളിലും കിണറ്റിലും മറ്റും ശുചീകരണത്തിനായി ആരലുകളെ നിക്ഷേപിക്കുന്ന രീതി സ്വീഡനിലുണ്ടായിരുന്നു. വെള്ളത്തിലെ ചെറുപ്രാണികളെയും മറ്റും അവ തിന്നുന്നതിനാല്‍ ജലം ശുദ്ധമാകുമെന്നായിരുന്നു വിശ്വാസം.
ഇത്രയും കാലം ജീവിച്ചിരിക്കുക എന്നത്‌ വിസ്‌മയകരമായ അനുഭവമാണെന്ന്‌ മത്സ്യം പാര്‍ത്തിരുന്ന കിണറിന്റെ ഇപ്പോഴത്തെ ഉടമസ്ഥന്‍ പറഞ്ഞു. 1962 ല്‍ ഇദ്ദേഹം സ്ഥലവും വീടും വാങ്ങിയവേളയില്‍, കിണറ്റിലെ മുതുമുത്തച്ഛന്‍ ആരലിനെ കുറിച്ച്‌ മുന്‍ ഉടമസ്ഥന്‍ വിശദമായി പറഞ്ഞു കൊടുത്തിരുന്നു.
സന്ദര്‍ശകര്‍ക്ക്‌ ഏലിനെ കാണാന്‍ വേണ്ടി കഴിഞ്ഞ ദിവസം കിണറിന്റെ മൂടി നീക്കിയപ്പോഴാണ്‌ അത് ചത്ത കാര്യമറിയുന്നത്‌.
മത്സ്യത്തിന്റെ ശരീരം പരിശോധനകള്‍ നടത്തി അതിന്റെ ദീര്‍ഘായുസ്സിന്റെ രഹസ്യമന്വേഷിക്കാന്‍ വേണ്ടി ഇപ്പോള്‍ ശീതീകരണിയില്‍ സൂക്ഷിച്ചിരിക്കുകയാണ്‌.
https://www.facebook.com/Malayalivartha
