ഇന്ധനവില കുതിക്കുന്നു... സാധാരണക്കാര്‍ നെട്ടോട്ടത്തില്‍... പെട്രോളിന് 35 പൈസയും, ഡീസലിന് 36 പൈസയും വര്‍ദ്ധിച്ചു, തിരുവനന്തപുരത്ത് പെട്രോള്‍ വില 110നോടടുക്കുന്നു.

മഴക്കെടുതിയും കോവിഡിനിടയിലും പെട്ട് നട്ടം തിരിയുന്ന സാധാരണക്കാര്‍ക്ക് വന്‍ തിരിച്ചടിയായിരിക്കുകയാണ് ഈ വര്‍ദ്ധനവ്. ജോലിക്കു പോകാനാകാത്തവര്‍ക്കും ജോലി ഇല്ലാത്തവരും അത്യാവശ്യകാര്യത്തിനായി പുറത്തു പോകാന്‍ പോലും പറ്റാത്ത അവസ്ഥ. ദിനം പ്രതി വര്‍ദ്ധിച്ചു കൊണ്ടിരിക്കുന്ന പെട്രോള്‍ ഡീസല്‍ വില എല്ലാപേരേയും ദുരിതത്തിലാക്കുകയാണ്.

തിരുവനന്തപുരത്ത് ഒരു ലിറ്റര്‍ പെട്രോളിന് 109 രൂപ 51 പൈസയും, ഡീസലിന് 103 രൂപ 15 പൈസയുമായി. കൊച്ചിയില്‍ പെട്രോള്‍ ലിറ്ററിന് 107 രൂപ 55 പൈസയും ഡീസലിന് 101 രൂപ 32 പൈസയുമാണ് ഇന്നത്തെ നിരക്ക്.

കോഴിക്കോട് പെട്രോളിന് 107 രൂപ 69 പൈസയും, ഡീസലിന് 101 രൂപ 46 പൈസയുമായി.കഴിഞ്ഞ പത്ത് ദിവസത്തിനിടെ എട്ടാം തവണയാണ് പെട്രോള്‍ വില കൂട്ടുന്നത്.സെപ്തംബര്‍ 24ന് ശേഷം ഒരു ലിറ്റര്‍ പെട്രോളിന് 6 രൂപ 50 പൈസയും, ഡീസലിന് 7 രൂപ 73 പൈസയുമാണ് വര്‍ദ്ധിപ്പിച്ചത്.