ഡോളറിനെതിരെ രൂപയുടെ മുന്നേറ്റം തുടരുന്നു. വ്യാപാരത്തിന്റെ തുടക്കത്തില്‍ രൂപ 44 പൈസയുടെ നേട്ടമാണ് സ്വന്തമാക്കിയത്. 94.92ലേക്കാണ് രൂപ മുന്നേറിയത്. രൂപയുടെ മൂല്യം ഉയര്‍ത്താനായി റിസര്‍വ് ബാങ്ക് സ്വീകരിച്ച നടപടികളാണ് കരുത്തായത്.

ഡോളര്‍ ആവശ്യകത കുറയ്ക്കാനായി ലക്ഷ്യമിട്ടായിരുന്നു റിസര്‍വ് ബാങ്കിന്റെ ഇടപെടല്‍. മൂന്ന് ദിവസത്തിനിടെ രൂപയുടെ മൂല്യത്തില്‍ രണ്ടു ശതമാനത്തിന്റെ വര്‍ധനയാണ് രേഖപ്പെടുത്തിയത്.

രൂപയുടെ വിനിമയത്തിലുള്ള ഊഹക്കച്ചവടം തടയുകയെന്ന ലക്ഷ്യം മുന്‍നിര്‍ത്തിയുമായിരുന്നു റിസര്‍വ് ബാങ്ക് ഇടപെടല്‍. ചൊവ്വാഴ്ച 42 പൈസയുടെ നേട്ടമാണ് രൂപ കരസ്ഥമാക്കിയത്.

അതേസമയം ആഗോള വിപണിയില്‍ എണ്ണവില വർദ്ധിക്കുകയാണ്. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില ബാരലിന് 106 ഡോളറിന് മുകളിലാണ്. സൗദി അറേബ്യയും യെമനിലെ ഇറാന്‍ പിന്തുണയുള്ള ഹൂതി വിമതരും തമ്മിലുള്ള സംഘര്‍ഷം വര്‍ധിച്ചതാണ് എണ്ണവില ഉയരാനുള്ള പ്രധാന കാരണം.
അതേസമയം ഓഹരി വിപണിയില്‍ ഇന്ന് കാര്യമായ മുന്നേറ്റം ഇല്ല. നേരിയ നേട്ടത്തോടെയാണ് ഓഹരി വിപണിയില്‍ വ്യാപാരം തുടരുന്നത്.