യു.എ.ഇ.യിലെ പുതിയ വിസാനിയമം നിലവിൽ വന്നു. ഈ നിയമം പ്രകാരം ഇനി സന്ദർശക വിസയിൽ എത്തുന്നവർക്ക് രാജ്യം വിടാതെ തന്നെ പുതിയ വിസയ്ക്ക് അപേക്ഷകൾ നൽകാം. വിസ പരിഷ്‌കാരങ്ങള്‍ കുടുംബത്തോടൊപ്പം താമസിക്കുന്നവര്‍ക്ക് ഗുണകരമാകും.

30 ദിവസത്തേക്കുള്ള സന്ദർശക വിസ രണ്ടുതവണ യു.എ.ഇ.യിൽ നിന്നുകൊണ്ടുതന്നെ പുതുക്കാം
600 ദിർഹമാണ് (ഏതാണ്ട് 11994 രൂപ) ഈടാക്കുക. വിസാ കാലാവധി കഴിഞ്ഞും യു.എ.ഇ.യിൽ കഴിയേണ്ടി വന്നാൽ 10 ദിവസത്തിനുശേഷം പ്രതിദിനം 100 ദിർഹം പിഴയടക്കണം

സ്ത്രീകൾക്കും വിദ്യാർഥികൾക്കും സന്ദർശക വിസയിലെത്തുന്നവർക്കുമുള്ള വിസാ നടപടിക്രമങ്ങൾ നിയമം കൂടുതൽ എളുപ്പമാക്കും. വിധവകൾക്കും വിവാഹബന്ധം വേർപെടുത്തിയവർക്കും സ്പോൺസർ ഇല്ലാതെ തന്നെ ഒരു വർഷത്തേക്കുള്ള താമസ വിസ അനുവദിക്കും. പങ്കാളിയുടെ മരണത്തിന്റെയോ വിവാഹബന്ധം വേർപെടുത്തിയതിന്റെയോ അന്നുമുതൽ ഒരു വർഷക്കാലമാണ് അനുമതി. യു.എ.ഇ.യിലുള്ള അവരുടെ കുട്ടികൾക്കും ആനുകൂല്യം സഹായകകരമാണ്. നിലവിലെ വിസ റദ്ദ് ചെയ്യാനും പുതിയ ഒരു വർഷത്തെ താമസ വിസയ്ക്ക് അപേക്ഷിക്കാനും 100 ദിർഹം വീതമാണ് ഫീസ്.

വിദ്യാർഥികളുടെ സർവകലാശാല, സെക്കൻഡറി സ്കൂൾ പഠനത്തിന് ശേഷമോ 18 വയസ്സ് പൂർത്തിയായതിന് ശേഷമോ ഒരു വർഷത്തെ താമസ വിസ ലഭ്യമാക്കും. ഇത് ഒരു വർഷത്തിന് ശേഷം വീണ്ടും പുതുക്കാവുന്നതാണ്. 100 ദിർഹം അതായത് ഏകദേശം 2000 രൂപയാണ് ഫീസ്

കുട്ടികള്‍ക്ക് സര്‍വകലാശാലാ വിദ്യാഭ്യാസം നേടാനും തുടര്‍ന്ന് ഇവിടെത്തന്നെ ജോലിക്ക് ശ്രമിക്കാനും ഇതുമൂലം അവസരം ലഭിക്കും.

തൊഴില്‍ വിസ ലഭിക്കാന്‍ ഇതുവരെ 3000 ദിര്‍ഹം നിക്ഷേപം ആയി നകണമായിരുന്നു. ഇനി മുതൽ അത് ആവശ്യമില്ല ,പകരം ഓരോ തൊഴിലാളിക്കും 60 ദിര്‍ഹം വാര്‍ഷികവരിസംഖ്യയുള്ള ഇന്‍ഷുറന്‍സ് എടുത്താൽ മതി. ഇതനുസരിച്ച് തൊഴിലാളിക്ക് 20,000 ദിര്‍ഹാം ഇൻഷുറൻസ് പരിരക്ഷ ലഭിക്കും.

ഏറ്റവും ആകർഷകമായ മറ്റൊന്ന് ഇനി മുതൽ ട്രാന്‍സിറ്റ് യാത്രക്കാര്‍ക്ക് 48 മണിക്കൂര്‍ രാജ്യത്ത് തങ്ങാന്‍ ഫീസ് നല്‍കേണ്ട എന്നതാണ് . മാത്രമല്ല വീണ്ടുമൊരു 48 മണിക്കൂര്‍കൂടി തങ്ങണമെങ്കില്‍ 50 ദിര്‍ഹം അടച്ചാൽ മതി.

തൊഴിലന്വേഷണത്തിനെത്തി വിസ കാലാവധി കഴിഞ്ഞും ഇവിടെ തുടരുന്നവര്‍ക്ക്, ആറ് മാസത്തെ താത്കാലികവിസ നല്‍കും. തൊഴില്‍വിപണിയില്‍ പ്രത്യേക പരിചരണം ആവശ്യമുള്ളവര്‍ക്ക് തുല്യമായ പരിഗണനയും അവസരങ്ങളും നിയമം നൽകുന്നുണ്ട്.