ജൻഡർ സ്റ്റഡീസ് എന്ന പഠന ശാഖയെക്കുറിച്ച് അറിയേണ്ടതെല്ലാം
അടുത്തകാലത്തായി ഏറ്റവും കൂടുതൽ പറഞ്ഞു കേൾക്കുന്ന ഒന്നാണ് ജൻഡർ സ്റ്റഡീസ്. ഇതിനെകുറിച്ച് കൂടുതൽ അറിയുന്നവർ ചുരുക്കമാണ്.ജൻഡർ സ്റ്റഡീസിൽ ബിരുദാനന്തര ബിരുദം, ഗവേഷണം എന്നിവയെക്കുറിച്ച് ധാരാളം സംശയങ്ങൾ പലരും ചോദിക്കാറുണ്ട്.
ജൻഡർ സ്റ്റഡീസും വുമൺ സ്റ്റഡീസും ഒന്ന് തന്നെയാണോ? ഫെമിനിസം ആണോ ജെണ്ടർ സ്റ്റഡീസിൽ പഠിപ്പിക്കുന്നത്? എന്തൊക്കെയാണ് ജോലി സാധ്യതകൾ? തുടങ്ങി നിരവധി സംശയങ്ങൾക്കുള്ള മറുപടിയാണ് ഇവിടെ പറയുന്നത്
യുജിസിയുടെ പ്രത്യേക നിർദേശ പ്രകാരം ഇന്ത്യയിലെ നിരവധി സർവകലാശാലകളിലും വിദ്യാഭ്യാസ സ്ഥാപനങ്ങളിലും വുമൺസ് സ്റ്റഡീസ് വർഷങ്ങളായി നിലവിലുണ്ട്. പക്ഷെ പലയിടത്തും മറ്റൊരു പഠന മേഖലയുടെ ഭാഗമോ ഗവേഷണവിഭാഗമോ മാത്രമായി ജെൻഡർ സ്റ്റഡീസ് ചുരുങ്ങാറാണ് പതിവ്. എങ്കിലും പല പ്രശസ്തമായ സർവകലാശാലകളും ജൻഡർ സ്റ്റഡീസ്/വിമൻസ് സ്റ്റഡീസിൽ ബിരുദാനന്തര ബിരുദ പഠനം ഒരുക്കുന്നുണ്ട്.
സിലബസുകളിൽ ചില വ്യത്യാസങ്ങളൊഴിച്ചാൽ വിമൻസ് സ്റ്റഡീസും ജൻഡർ സ്റ്റഡീസും ലക്ഷ്യമാക്കുന്നത് ലിംഗ സമത്വവും ശാക്തീകരണവും ലിംഗാവബോധവും നീതിയും തന്നെയാണ്..
ചെന്നൈക്കടുത്ത് ശ്രീപെരുമ്പത്തൂരിൽ ഉള്ള രാജീവ് ഗാന്ധി നാഷണൽ ഇൻസ്റ്റിറ്റ്യൂട്ട് ഓഫ് യൂത്ത് ഡവലപ്മെന്റ് (R G N I Y D) എം എ ജൻഡർ സ്റ്റഡീസ് ഉൾപ്പെടെ ആറ് വ്യത്യസ്ത പിജി കോഴ്സുകൾ നടത്തുന്നുണ്ട്. കേന്ദ്ര യുവജനകായിക മന്ത്രാലത്തിനു കീഴിൽ നേരിട്ട് പ്രവർത്തിക്കുന്ന ഈ കേന്ദ്ര സർക്കാർ വിദ്യാഭ്യാസ സ്ഥാപനം ആണ് രാജീവ് ഗാന്ധി നാഷണൽ ഇൻസ്റ്റിറ്റ്യൂട്ട് ഓഫ് യൂത്ത് ഡവലപ്മെന്റ്
തിയറി ക്ലാസുകൾക്കൊപ്പം തന്നെ ഫീൽഡ് വിസിറ്റും ഇന്റേൺഷിപ്പും ഡെസർട്ടേഷനും അടങ്ങുന്ന നാല് സെമസ്റ്റർ കോഴ്സുകളാണ് ജൻഡർ സ്റ്റഡീസിൽ ഉൾപ്പെടുത്തിയിരിക്കുന്നത്
ലിംഗബോധം , നീതി, മാനവിക ചരിത്രവും വളർച്ചയും ആശയങ്ങളും, മുഖ്യശ്രേണിയിൽ നിന്ന് പുറം തള്ളപ്പെടുന്ന സ്ത്രീകളുടെയും കുഞ്ഞുങ്ങളുടെയും ഭിന്നലിംഗക്കാരുടെയും അവശ വിഭാഗങ്ങളുടെയും അവകാശങ്ങളും കാഴ്ചപ്പാടുകളും തുടങ്ങിയവയെല്ലാം വികസനാധിഷ്ഠിതമായി അവതരിപ്പിക്കുന്ന കോഴ്സാണ് എംഎ ജൻഡർ സ്റ്റഡീസ്.
ഫെമിനിസ്റ്റ് തിയറി, ഫെമിനിസ്റ്റ് മൂവ്മെന്റ്സ്, ജൻഡർ ട്രെയിനിംഗ്, ജൻഡർ മെയിൻ സ്ട്രീമിംഗ്, ജൻഡർ ആൻഡ് സൊസൈറ്റി തുടങ്ങി വികസനം, ആരോഗ്യം, നിയമം, അതിക്രമങ്ങൾ, ഭരണനിർവഹണം എന്നിങ്ങനെ വിവിധ വശങ്ങളുമായി ജൻഡറിനെ അപഗ്രഥനം ചെയ്യുന്ന പേപ്പറുകൾ പഠനവിഷയങ്ങളായുണ്ട്.
കൂടാതെ ഇവയുമായി ബന്ധപ്പെട്ട ഫീൽഡ് വിസിറ്റ്, ഭാവി ജോലി സാധ്യതകളുള്ള തരത്തിൽ ഇന്റേൺഷിപ്, ഗവേഷണ പ്രാഗല്ഭ്യത്തിനായി ഡെസർട്ടേഷൻ വർക്ക് എന്നിവയിലും വിദ്യാർത്ഥികൾ പങ്കെടുക്കണം.
ഇന്ത്യയിലും വിദേശത്തും നടക്കുന്ന സ്റ്റുഡന്റ് എക്സ്ചേഞ്ച് പ്രോഗ്രാമുകളിൽ പങ്കെടുക്കാനുള്ള അവസരം, യുഎൻ ഉൾപ്പെടെയുള്ള അന്താരാഷ്ട്ര സംഘടനകളിൽ പരിശീലനത്തിനും ജോലിക്കുമുള്ള സാധ്യതകൾ, അന്താരാഷ്ട്ര നിലവാരമുള്ള ലൈബ്രറി, സ്മാർട് ക്ലാസ്റൂമുകൾ, അതിമനോഹരമായ കാമ്പസ് തുടങ്ങിയവ R G N I Y D യുടെ പ്രത്യേകതയാണ്.
ജൻഡർ സ്റ്റഡീസിൽ ബിരുദാനന്തര ബിരുദം ഉള്ളവർക്ക് സർക്കാർ/എൻജിഓ സ്ഥാപനങ്ങളിലെ ജൻഡർ അനലിസ്റ്റ്, പ്രൊജക്റ്റ് മാനേജർ, റിസേർച് അസിസ്റ്റന്റ്, സെൻസിറ്റൈസേഷൻ പ്രോഗ്രാം ഓഫീസർ തുടങ്ങിയ തസ്തികകളിലേക്കുള്ള തെരഞ്ഞെടുപ്പിൽ മുൻഗണനയുണ്ട്.
അത് പോലെ വിമൺ സ്റ്റഡീസ് സെന്ററുകളിലെ അധ്യാപക/ഗവേഷക/പോസ്റ്റ്ഡോക്ടറൽ തസ്തികകളും. ജൻഡർ സ്റ്റഡീസ് ഇന്റർ ഡിസിപ്ലിനറി ആയതിനാൽ ഏതു അക്കാഡമിക പാഠ്യവിഷയവുമായി ബന്ധപ്പെട്ടും ഈ വിഷയം പ്രസക്തമാണെന്നതിനാൽ അധ്യാപക ജോലികൾക്കും ജൻഡർ സ്റ്റഡീസിൽ ബിരുദാനന്തര ബിരുദമുള്ളവർക്ക് അപേക്ഷിക്കാവുന്നതാണ്
https://www.facebook.com/Malayalivartha