ബോളിവുഡിലും തെന്നിന്ത്യയിലും ഒരുപോലെ ആരാധകരുളള താരമാണ് എമി ജാക്‌സണ്‍. സോഷ്യല്‍ മീഡിയയില്‍ സജീവ സാന്നിധ്യമാണ് എമി ജാക്‌സണ്‍ ചിത്രങ്ങളും വീഡിയോകളുമെല്ലാം പ്രേക്ഷകര്‍ക്കായി പങ്കുവെയ്ക്കാറുണ്ട്. കഴിഞ്ഞ കുറച്ചു നാളുകള്‍ പ്രസവകാലം ആഘോഷമാക്കുകയായിരുന്നു താരം. ഇതിന്റെ ചിത്രങ്ങളും വീഡിയോകളും സോഷ്യല്‍ മീഡിയയില്‍ ട്രെന്റിങ്ങായിരുന്നു.

ആകാംഷയ്ക്കും കാത്തിരിപ്പിനുമൊടുവില്‍ സെപ്റ്റംബര്‍ 26 ന് താരത്തിന് ആണ്‍കുഞ്ഞ് ജനിക്കുകയായിരുന്നു. ആന്‍ഡ്രിയാസ് എന്നാണ് കുഞ്ഞിന് പേരിട്ടിരിക്കുന്നത്. പ്രതിശ്രുത വരന്‍ ജോര്‍ജ് പനയോട്ടിനും കുഞ്ഞിനുമൊപ്പമുളള ചിത്രമാണ് എമി പങ്കുവെച്ചിരിക്കുന്നത്.
കുഞ്ഞ് ആന്‍ഡ്രിയാസിന് പാലുട്ടുന്ന ചിത്രമാണ് താരം സമൂഹമാധ്യമങ്ങളില്‍ പങ്കുവെച്ചിരിക്കുന്നത്. 'എന്റെ മകനും ഞാനും' എന്ന തലക്കെട്ടോടെ നടി ഇന്‍സ്റ്റഗ്രാമില്‍ പേസ്റ്റ് ചെയ്ത ചിത്രമാണ് ഇപ്പോള്‍ വൈറലായിരിക്കുന്നത്. ബോറടിപ്പിക്കുന്ന മമ്മിയായി താനും മാറുകയാണ്. ഇതില്‍ ആദ്യം സോറി പറയുന്നു. എന്റെ മകന്‍ അത്രയ്ക്ക് ക്യൂട്ടാണ്... മൂലയൂട്ടുന്ന ചിത്രത്തിനോടൊപ്പം താരം കുറിച്ചു. അതു കണ്ട് ഈ ചിത്രത്തില്‍ ബോറടിപ്പിക്കുന്നതായി ഒന്നുമില്ലല്ലോ എന്നു ബ്രിട്ടീഷ് മോഡലും എമിയുടെ സുഹ്യത്തുമായ റോക്‌സി ഹോര്‍ണര്‍ ചോദിക്കുന്നുണ്ട്. ഏറ്റവും മനോഹരവും ദൈവികവുമായ ചിത്രമെന്നാണ് ആരാധകര്‍ പറയുന്നത്.
ജോര്‍ജുമായുളള വിവാഹ നിശ്ചയം കഴിഞ്ഞ് ഏതാനും മാസങ്ങള്‍ക്കു ശേഷമാണ് താന്‍ അമ്മയാകുന്നു എന്ന വാര്‍ത്ത താരം ആരാധകരെ അറിയിക്കുന്നത്. വലിയ വയറും വയറിലെ സ്‌ട്രെച്ച് മാര്‍ക്കും ശരീരത്തിന്റെ ഭാരം വര്‍ധിക്കുന്നതുമെല്ലാം എമി കൃത്യമായി തന്റെ ആരാധകരെ അറിയിക്കുകയും ചെയ്യാറുണ്ട്.
പ്രസവത്തിനു ശേഷം വിവാഹത്തിനായി തയ്യാറെടുക്കുകയാണ് താരം. പ്രതിശ്രുത വരന്‍ ജോര്‍ജുമായുളള വിവാഹം പ്രസവാനന്തരമുണ്ടാക്കുമെന്ന് താരം നേരത്തെ തന്നെ വെളിപ്പെടുത്തിയിരുന്നു. കഴിഞ്ഞ പ്രണയദിനത്തിലായിരുന്നു ജോര്‍ജുമായുളള പ്രണയത്തെ കുറിച്ച് താരം വെളിപ്പെടുത്തിയത്. ഇനി വിവാഹത്തിനായുളള തയ്യാറെടുപ്പിലാണ് താരം. ലിവര്‍ പൂളിലായിരിക്കും താര വിവാഹത്തിന് വേദിയാവുക.