ആ വാര്‍ത്ത എനിക്കും ഒരു സര്‍പ്രൈസ് ആയിരുന്നു, എന്നാണ് വിവാഹം എന്ന് ചോദിക്കുന്നവരോട് കീര്‍ത്തി സുരേഷ് പറയുന്നു
സിനിമയുമായി ബന്ധപ്പെട്ട കാര്യങ്ങള്‍ മാത്രമല്ല താരങ്ങളുടെ വ്യക്തി ജീവിതത്തിലെ വിശേഷങ്ങളും ശ്രദ്ധ നേടാറുണ്ട്. പ്രണയവും വിവാഹത്തെക്കുറിച്ചും കുഞ്ഞതിഥികളുടെ വരവുമൊക്കെ വാര്‍ത്തയായി മാറാറുമുണ്ട്. ബാലതാരത്തില്‍ നിന്നും നായികയായി മാറിയ കീര്‍ത്തി സുരേഷിന്റെ വിവാഹ വാര്‍ത്തയായിരുന്നു കഴിഞ്ഞ ദിവസം വൈറലായി മാറിയത്. പ്രമുഖ ബിസിനസുകാരനുമായി താരപുത്രിയുടെ വിവാഹം തീരുമാനിച്ചുവെന്നും, വിവാഹത്തീയതി ഉള്‍പ്പടെയുള്ള വിശദാംശങ്ങള്‍ വൈകാതെ തന്നെ പുറത്തുവിട്ടേക്കുമെന്ന തരത്തിലുമായിരുന്നു വാര്‍ത്തകള്‍. എന്നാലിപ്പോള്‍ അഭ്യൂഹങ്ങള്‍ക്ക് വിരാമമിട്ട് വാര്‍ത്തകളോട് പ്രതികരിച്ചിരിക്കുകയാണ് കീര്‍ത്തി..
''ആ വാര്‍ത്ത എനിക്കും ഒരു സര്‍പ്രൈസായിരുന്നു. എങ്ങനെയാണ് അത്തരമൊരു വാര്‍ത്ത പടര്‍ന്നതെന്ന് എനിക്കറിയില്ല. ഒന്നു ഞാന്‍ വ്യക്തമായി പറയാം. അത്തരം പ്ലാനുകളൊന്നും ഇപ്പോള്‍ ഇല്ല. ഉടനെ തന്നെ വിവാഹം കഴിക്കാനും തീരുമാനിച്ചിട്ടില്ല,'' കീര്‍ത്തി പറയുന്നു.
സോഷ്യല്‍ മീഡിയയിലൂടെ നിമിഷനേരം കൊണ്ടായിരുന്നു ഈ സംഭവം വൈറലായി മാറിയത്. നായികയായി നിറഞ്ഞുനില്‍ക്കുന്നതിനിടയില്‍ കീര്‍ത്തിയും വിവാഹ ജീവിതത്തിലേക്ക് പ്രവേശിക്കുകയാണോയെന്നായിരുന്നു ആരാധകരുടെ ചോദ്യം. ആരെയാണ് താരം വിവാഹം ചെയ്യുന്നതെന്ന തരത്തിലുള്ള ചോദ്യങ്ങളും ഉയര്‍ന്നുവന്നിരുന്നു. കുടുംബാംഗങ്ങളാണ് വിവാഹത്തെക്കുറിച്ച് തീരുമാനിച്ചതെന്നും കീര്‍ത്തി അതില്‍ സമ്മതം അറിയിക്കുകയായിരുന്നുവെന്നുമുള്ള വിവരങ്ങളാണ് പുറത്തുവന്നത്. ഈ സംഭവത്തെക്കുറിച്ച് കീര്‍ത്തിയും മാതാപിതാക്കളും പ്രതികരിക്കുന്നതിനായി കാത്തിരിക്കുകയായിരുന്നു എല്ലാവരും.
നിര്‍മാതാവ് സുരേഷിന്റെയും മുന്‍കാല നടി മേനകയുടെയും ഇളയപുത്രിയാണ് കീര്‍ത്തി സുരേഷ്. ഇപ്പോള്‍ തെന്നിന്ത്യയിലെ സൂപ്പര്‍ നായികമാരില്‍ ഒരാളായി വളര്‍ന്ന കീര്‍ത്തിയുടെ വിവാഹ വാര്‍ത്തകളോട് ടൈംസ് ഓഫ് നൗ നടത്തിയഅഭിമുഖത്തിലൂടെയായിരുന്നു താരത്തിന്റെ പ്രതികരണം . കൊറോണ വൈറസിന്റെ പിടിയിലാണ് ലോകം. നിരവധി പ്രശ്‌നങ്ങളിലാണ് രാജ്യം. ആ സമയത്ത് എന്റെ വിവാഹത്തെക്കുറിച്ചുള്ള ഗോസിപ്പ് അല്ല പ്രചരിപ്പിക്കേണ്ടത്. കൊവിഡ് 19 എതിരെയുള്ള പോരാട്ടത്തില്‍ ആയിരിക്കണം ഇപ്പോഴത്തെ ശ്രദ്ധ, അല്ലാതെ ഇത്തരത്തിലുള്ള കിവംവദന്തികളിലല്ലെന്നും താരം പറയുന്നു. സാമൂഹ്യ അകലം പാലിക്കേണ്ടതിനെക്കുറിച്ചും താരം ഓര്‍മ്മപ്പെടുത്തിയിട്ടുണ്ട്.
മലയാളത്തിലൂടെ ബാലതാരമായിട്ടാണ് കീര്‍ത്തി സുരേഷ് വെള്ളിത്തിരയിലെത്തുന്നത്. ശേഷം നായികയായിട്ടും മലയാളത്തില്‍ തന്നെ അരങ്ങേറ്റം നടത്തി. എന്നാല്‍ ശ്രദ്ധിക്കപ്പെടുന്നത് തമിഴ് ചിത്രങ്ങളിലൂടെയായിരുന്നു. തെലുങ്കില്‍ അഭിനയിച്ചതോടെ മികച്ച നടിയ്ക്കുള്ള ദേശീയ പുരസ്‌കാരവും കീര്‍ത്തി സ്വന്തമാക്കിയിരുന്നു. തെന്നിന്ത്യയിലെ മുന്‍കാല നടി സാവിത്രിയുടെ ജീവിതകഥയെ ആസ്പദമാക്കി ഒരുക്കിയ മഹാനടിയിലെ പ്രകടനമായിരുന്നു കീര്‍ത്തിയെ പുരസ്‌കാരത്തിന് അര്‍ഹയാക്കിയത്. ബോളിവുഡിലും നായികയാവാനുള്ള തയ്യാറെടുപ്പിലാണ് കീര്‍ത്തി. നാഗേഷ് കുകുനൂരിന്റെ 'ഗുഡ് ലക്ക് സഖി'യില്‍ അഭിനയിച്ചുവരികയായിരുന്നു കീര്‍ത്തി. ചിത്രത്തില്‍ ഒരു ഷാര്‍പ്പ് ഷൂട്ടറുടെ വേഷത്തിലാണ് കീര്‍ത്തി എത്തുന്നത്.
ബിഗ് ബഡ്ജറ്റ് ചിത്രമായി ഒരുക്കുന്ന 'മരക്കാര്‍ അറബിക്കടലിന്റെ സിംഹമാണ് കീര്‍ത്തിയുടെ മലയാള ചിത്രം. മോഹന്‍ലാലിനെ കേന്ദ്രകഥാപാത്രമാക്കി പ്രിയദര്‍ശന്‍ സംവിധാനം ചെയ്യുന്ന ചിത്രത്തില്‍ ആര്‍ച്ച എന്ന കഥാപാത്രത്തെയാണ് കീര്‍ത്തി അവതരിപ്പിക്കുന്നത്.
https://www.facebook.com/Malayalivartha
