മൂന്നു പതിറ്റാണ്ടായി തന്റെ കൂടെ നിഴലായി നടക്കുന്ന, പ്രിയപ്പെട്ട ചങ്ങാതിയ്ക്ക് പിറന്നാള്‍ ആശംസകള്‍ നേരുകയാണ് മമ്മൂട്ടി. 1991 മുതല്‍ മമ്മൂട്ടിയ്ക്ക് ഒപ്പം ജോര്‍ജുണ്ട്. ഐ.വി. ശശി ചിത്രമായ 'നീലഗിരി' എന്ന സിനിമയുടെ മേക്കപ്പ് മാനായാണ് മമ്മൂട്ടിയ്ക്ക് ഒപ്പമുള്ള ജോര്‍ജിന്റെ യാത്ര തുടങ്ങുന്നത്. പിന്നീടിങ്ങോട്ട് എത്രയോ സിനിമകള്‍. അണിയറയില്‍ ഒരുങ്ങുന്ന 'പുഴു' എന്ന ചിത്രത്തിലും മമ്മൂട്ടിയുടെ പേഴ്‌സണല്‍ മേക്കപ്പ്മാന്‍ ആയി ജോര്‍ജ് ഉണ്ട്.മമ്മൂട്ടി കുടുംബാംഗം പോലെ കരുതുന്ന ഒരാള്‍ കൂടിയാണ് ജോര്‍ജ്. മൂന്നുവര്‍ഷം മുന്‍പ് 'മാമാങ്കം' സിനിമയുടെ ലൊക്കേഷനില്‍ വെച്ച് മമ്മൂട്ടി ജോര്‍ജിനായി ഒരുക്കിയ സര്‍പ്രൈസ് പാര്‍ട്ടിയും അന്നേറെ ശ്രദ്ധിക്കപ്പെട്ടിരുന്നു. മേക്കപ്പ്മാന്‍ മാത്രമല്ല, മലയാളസിനിമയിലെ ഒരു നിര്‍മാതാവ് കൂടിയാണ് ജോര്‍ജ് ഇന്ന്. മമ്മൂട്ടി നായകനായി എത്തിയ മായാവി എന്ന ചിത്രത്തിന്റെ എക്‌സിക്യൂട്ടീവ് പ്രൊഡ്യൂസറായിരുന്നു ജോര്‍ജ്. മമ്മൂട്ടിയെ നായകനാക്കി ലാല്‍ ജോസ് സംവിധാനം ചെയ്ത 'ഇമ്മാനുവല്‍' എന്ന ചിത്രത്തിന്റെ പ്രൊഡ്യൂസറും ജോര്‍ജായിരുന്നു.