നടന്‍ പൃഥ്വിരാജിന്റെ പുത്തന്‍ ലുക്ക് സോഷ്യല്‍ മീഡിയയില്‍ വൈറലാണ്. ക്ലീന്‍ ഷേവ് ചെയ്ത ലുക്കിലുള്ള ചിത്രം പൃഥ്വിരാജ് തന്നെയാണ് തന്റെ ഇന്‍സ്റ്റഗ്രാമിലൂടെ പങ്കുവെച്ചത്. സംവിധാനം ചെയ്ത സിനിമ പൂര്‍ത്തിയായെന്നും ഇനി നടനെന്ന നിലയില്‍ പുതിയ രൂപമാണെന്നുമാണ് പൃഥ്വിരാജ് പോസ്റ്റിന് താഴെ കുറിച്ചിരിക്കുന്നത്. ചിത്രം അതിവേഗമാണ് വൈറലായത്. നായകനായും സംവിധായകനായും പൃഥ്വിരാജിന്റേതായി ഒരുപിടി ചിത്രങ്ങളാണ് പുറത്തിറങ്ങാനിരിക്കുന്നത്. മോഹന്‍ലാലിനെ നായകനാക്കി പൃഥ്വിരാജ് സംവിധാനം ചെയ്യുന്ന എമ്പുരാനാണ് അക്കൂട്ടത്തില്‍ ആരാധകര്‍ ഏറ്റവും ആകാംക്ഷയോടെ കാത്തിരിക്കുന്നത്.

ലൂസിഫറിന്റെ രണ്ടാം ഭാഗമായ എമ്പുരാന്‍ മാര്‍ച്ച് 27നാണ് തിയേറ്ററുകളില്‍ എത്തുന്നത്. ചിത്രത്തിന്റെ ഒരോ അപ്‌ഡേറ്റും വളരെ ആവേശത്തോടെയാണ് സോഷ്യല്‍ മീഡിയ കാണുന്നത്. എന്നാല്‍ പൃഥ്വിരാജിന്റെ പുതിയ ലുക്കാണ് ഇപ്പോഴത്തെ ചര്‍ച്ചാവിഷയം.

എന്നാല്‍ പൃഥ്വിരാജിന്റെ ഭാര്യ സുപ്രിയ മേനോന്റെ കമന്റാണ് ശ്രദ്ധനേടുന്നത്. ഭാര്യയും മോളുമുണ്ടെന്ന് ഓര്‍മ വേണം എന്നായിരുന്നു സുപ്രിയയുടെ കമന്റ്. നിരവധി പേരാണ് സുപ്രിയയുടെ കമന്റിന് താഴെ പ്രതികരണവുമായി എത്തിയത്.

ഹോളിവുഡ് താരങ്ങള്‍ അടക്കം വന്‍ താരനിരയുമായാണ് എമ്പുരാന്‍ എത്തുന്നത്. ചിത്രത്തിലെ കഥാപാത്രങ്ങളെ പരിചയപ്പെടുത്തുന്ന വിഡിയോകള്‍ വലിയ രീതിയില്‍ ശ്രദ്ധനേടിയിരുന്നു. മലയാളത്തിന് പുറമെ തമിഴ്, തെലുങ്ക്, കന്നഡ, ഹിന്ദി ഭാഷകളിലും എമ്പുരാന്‍ തിയേറ്ററുകളില്‍ എത്തും.