സ്ത്രീകളിൽ ചിലരിലെങ്കിലും ഉണ്ടാകുന്ന പ്രശ്‌നമാണ് ഒരു മാസത്തിൽ രണ്ടു തവണ ആർത്തവം വരുന്നത്. ഈ സമയത്ത് ബ്ലീഡിങ്ങും വളരെ കൂടുതലാണ് ഉണ്ടാകുന്നത്. ക്രമരഹിതമായ ആർത്തവം എന്തെങ്കിലും അസുഖമാണോ എന്ന് ചിന്തിക്കുന്നവരും ഉണ്ട്. ഇതിന്റെ പ്രതിവിധിയും കാരണവും ഉണ്ട്.

സാധാരണയായി ഒരു പീരിയഡിന്റെ ആദ്യ ദിവസം മുതൽ അടുത്ത പീരിയഡിന്റെ ആദ്യം ദിവസം വരെയുള്ള സമയമാണ് ആർത്തവചക്രത്തിന്റെ കാലയളവായി കണക്കാക്കി പറയുന്നത്. 28 ദിവസമാണ് പൊതുവെ ഇത് കണക്കാക്കുന്നത്. എങ്കിലും 24 മുതൽ 38 ദിവസം വരെ വ്യത്യാസം ഉണ്ടാകാമെന്നാണ് ഡോക്ടർമാർ പറയുന്നത്. മാസത്തിൽ രണ്ടു തവണ പീരിയഡ് വന്നാലും ഇത് 24 ദിവസത്തെ വ്യത്യാസത്തിൽ ആണെങ്കിൽ പേടിക്കേണ്ടതില്ല.

സാധാരണ ആർത്തവകാലത്തെ ബ്ലീഡിങ് രണ്ടു മുതൽ ഏഴു ദിവസം വരെയാണ്. അതിൽ നിന്നു വ്യത്യാസപ്പെട്ടു വരുമ്പോഴാണ് ശ്രദ്ധിക്കേണ്ടത്. മാനസിക സമ്മർദവും ഉത്കണ്ഠയുമുള്ളവർക്ക് ആർത്തവചക്രത്തിന്റെ ക്രമം തെറ്റാറുണ്ട്. ശരീരഭാരത്തിലുള്ള വ്യതിയാനങ്ങൾ. അതുമൂലം സംഭവിക്കുന്ന ഹോർമോണൽ പ്രശ്നങ്ങളും ആർത്തവചക്രത്തെ ബാധിക്കാറുണ്ട്.

തൈറോയ്ഡ് പ്രശ്നങ്ങൾ, പെൽവിക് ഇൻഫ്ലമേറ്ററി ഡിസീസ് ഗർഭപാത്രത്തിൽ മുഴ എന്നിവയുണ്ടെങ്കിലും ആർത്തവചക്രം ക്രമരഹിതമാകാറുണ്ട്. പ്രത്യേകിച്ച് പിസിഒഡി ഉള്ളവർക്കും ക്രമരഹിതമായ ആർത്തവമുണ്ടാകാറുണ്ട്. ഓവുലേഷൻ കൃത്യമായി നടക്കാത്തതുകൊണ്ടാണ് ഇങ്ങനെ സംഭവിക്കുന്നത്. പൊതുവായുള്ള കാരണങ്ങൾ സ്ട്രെസും ഉത്കണ്ഠയും ഹോർമോണൽ പ്രശ്നങ്ങളുമാണ്.

അതിനാൽ തന്നെ കൃത്യമായ വ്യായാമം, ഭക്ഷണം, ഉറക്കം എന്നിവ ഉറപ്പാക്കാൻ ശ്രദ്ധിക്കുക. കൂടാതെ യോഗ ചെയ്യുന്നതും മാനസിക സമ്മർദം കുറയ്ക്കാൻ സഹായിക്കുന്ന ഒന്നാണ്. ഇനി ബ്ലീഡിങ് കൂടുതലുള്ള സാഹചര്യമാണെങ്കിൽ രക്തക്കുറവുണ്ടോ എന്നു പരിശോധിക്കുകയും തൈറോയ്ഡിന്റെ പ്രവർത്തനം ശരിയായ രീതിയിലാണോ എന്ന് പരിശോധിക്കുകയും ചെയ്യേണ്ടത് അനിവാര്യമാണ്. ഗൈനക്കോളജിസ്റ്റിനെ കണ്ട് പരിശോധിപ്പിക്കുകയും സ്കാനിങ് ചെയ്യുകയും വേണം. അതിന്റെ അടിസ്ഥാനത്തിലാണ് ചികിത്സ നിശ്ചയിക്കുന്നത്.