നമ്മള്‍ കഴിക്കുന്ന ഓരോ ഭക്ഷണസാധനങ്ങളും നമുക്ക് പ്രയോജനപ്പെടുക ഓരോ രീതിയിലാണ്. അത് പഴങ്ങളായാലും പച്ചക്കറികളായാലും. ഇക്കൂട്ടത്തില്‍ പഴങ്ങള്‍ വാങ്ങിക്കഴിക്കുമ്പോള്‍ മിക്കവരും പതിവായി തെരഞ്ഞെടുക്കുന്ന ഒന്നാണ് പൈനാപ്പിള്‍.

പൈനാപ്പിള്‍ കാര്യമായും ദഹനത്തിന് നല്ലതാണെന്ന രീതിയിലാണ് ഏവരും കഴിക്കാറ്. എന്നാല്‍ ഇത് മാത്രമല്ല പൈനാപ്പിളിനുള്ള ഗുണം.
പൈനാപ്പിള്‍ കഴിക്കുന്നത് എല്ലുകളുടെ ആരോഗ്യം മെച്ചപ്പെടുത്തുന്നതിന് സഹായകരമാണ്. പൈനാപ്പിളില്‍ അടങ്ങിയിരിക്കുന്ന മാംഗനീസ് എന്ന ഘടകമാണ് ഇതിന് സഹായിക്കുന്നത്. ശരീരഭാരം കൃത്യമായി സൂക്ഷിക്കുന്നവരിലാണ് ഇത് ഏറെയും പ്രയോജനപ്പെടുക.

പൈനാപ്പിളിന്റെ ഏറ്റവും അറിയപ്പെടുന്നൊരു ഗുണം ദഹനം കൂട്ടാന്‍ ഉപകരിക്കുമെന്നതാണ്. പ്രത്യേകിച്ചും അളവിലധികം ഭക്ഷണം കഴിച്ചുപോയാല്‍ എല്ലാമാണ് പൈനാപ്പിള്‍ കഴിക്കുമ്പോള്‍ പെട്ടെന്ന് ആശ്വാസം അനുഭവപ്പെടുക. പൈനാപ്പിളില്‍ അടങ്ങിയിരിക്കുന്ന 'ബ്രോമെലയ്ന്‍', 'ഡയറ്ററി ഫൈബര്‍', വൈറ്റമിന്‍സി എന്നിവയാണിതിന് സഹായിക്കുന്നത്.

വായയുടെ ആരോഗ്യം മെച്ചപ്പെടുത്തുന്നതിനും പൈനാപ്പിള്‍ സഹായിക്കുന്നു. പൈനാപ്പിളില്‍ ഉള്ള കാത്സ്യം ആണിതിന് സഹായിക്കുന്നത്. ഇതിന് പുറമെ മാംഗനീസ് എന്ന ഘടകം എല്ലുകളെ മെച്ചപ്പെടുത്തുന്നത് പോലെ തന്നെ പല്ലുകളുടെ ആരോഗ്യത്തെയും മെച്ചപ്പെടുത്തുന്നു.
ബിപി അഥവാ രക്തസമ്മര്‍ദ്ദം കുറയ്ക്കുന്നതിനും പൈനാപ്പിള്‍ സഹായിക്കുന്നു. പൈനാപ്പിളില്‍ പൊട്ടാസ്യത്തിന്റെ അളവ് കൂടുതലും സോഡിയം വളരെ കുറവുമാണ്. ഇതിനാലാണ് ബിപി നിയന്ത്രിക്കുന്നതിന് അനുയോജ്യമായ പഴമായി പൈനാപ്പിള്‍ മാറുന്നത്.

മാനസികസമ്മര്‍ദ്ദം അഥവാ സ്‌ട്രെസ് കുറയ്ക്കുന്നതിനും സഹായകമായൊരു ഫ്രൂട്ട് ആണ് പൈനാപ്പിള്‍. കാരണം പൈനാപ്പിളില്‍ ഇതിന് സഹായകമായ 'സെറട്ടോണിന്‍' കാണപ്പെടുന്നു. പൈനാപ്പിളില്‍ വൈറ്റമിന്‍സി കാര്യമായി അടങ്ങിയിരിക്കുന്നു. അതിനാല്‍ തന്നെ ഇത് മുടിയുടെ ആരോഗ്യത്തിനും ഏറെ നല്ലതാണ്. ധാരാളം ആന്റിഓക്‌സിഡന്റുകള്‍ അടങ്ങിയിട്ടുണ്ട് എന്നതിനാല്‍ മുടിക്കുണ്ടാകുന്ന ചില പ്രശ്‌നങ്ങളെ പ്രതിരോധിക്കാനും പൈനാപ്പിള്‍ സഹായിക്കുന്നു. മുടിക്ക് കട്ടി കൂട്ടാനും മുടി കൂടുതല്‍ മിനുസം വന്ന് ഭംഗിയുള്ളതാക്കാനുമെല്ലാം വൈറ്റമിന്‍സി വേണം.