സൗദിയില്‍ കൊവിഡ് രോഗികളുടെ എണ്ണം കൂടുന്നതായി റിപ്പോർട്ട്. സൗദിയില്‍ പ്രതിദിന രോഗികളുടെ എണ്ണം ആയിരത്തിനടുത്ത് എത്തിനിൽക്കുകയാണ്. കഴിഞ്ഞ ആഴ്ച കുറവ് കേസുകള്‍ ആണ് റിപ്പോര്‍ട്ട് ചെയ്തിരുന്നെങ്കിലും ഇന്നലെ കൂടുകയായിരുന്നു. പുതുതായി 985 പേർക്കാണ് ഇന്നലെ കൊവിഡ് റിപ്പോര്‍ട്ട് ചെയ്തത്. 24 മണിക്കൂറിനുള്ളിൽ രോഗമുക്തി നേടിയവരുടെ എണ്ണം 661 ആണ്. 10 മരണങ്ങള്‍ ആണ് ഇന്നലെ തന്നെ റിപ്പോര്‍ട്ട് ചെയ്യുകയുണ്ടായി. ഇപ്പോള്‍ സൗദിയില്‍ കഴിഞ്ഞ ദിവസത്തേക്കാളും രോഗികളുടെ എണ്ണവും മരണ നിരക്കും കൂടിയിരിക്കുകയാണ് .

9249 രോഗികൾ സൗദിയിലെ ആശുപത്രിയില്‍ കഴിയുന്നുണ്ടെന്നാണ് പുറത്തുവരുന്ന റിപ്പോര്‍ട്ടുകള്‍. റിയാദിലാണ് രോഗം ബാധിച്ചവരുടെ എണ്ണം കൂടുതല്‍. ഇന്നലെ റിയാദില്‍ 463 പേർക്ക് രോഗം സ്ഥിരീകരിച്ചു. മക്കയിൽ 201 പേര്‍ക്കാണ് ഇന്നലെ രോഗം സ്ഥിരീകരിച്ചത്. സൗദിയുടെ കിഴക്കന്‍ പ്രവിശ്യകളിലും രോഗ വ്യാപനം കൂടുതല്‍ ആണ്. വിവിധ പ്രവിശ്യകളില്‍ പുതുതായി റിപ്പോര്‍ട്ട് ചെയ്ത രോഗികളുടെ എണ്ണം: റിയാദ് 463, മക്ക 164, കിഴക്കന്‍ പ്രവിശ്യ 140, അല്‍ ഖസീം 37, അസീര്‍ 34, ഹായില്‍ 33, മദീന 30, ജീസാന്‍ 21, തബൂക്ക് 20, നജ്‌റാന്‍ 16, വടക്കന്‍ അതിര്‍ത്തി മേഖല 11, അല്‍ബാഹ 10, അല്‍ ജൗഫ് 6.

സൗദിയില്‍ ആകെ കൊവിഡ് ബാധിച്ചവരുടെ എണ്ണം 402142 പേര്‍ ആണ്. രോഗമുക്തി നേടിയവര്‍ 386102 പേര്‍ വരും. 6791 പേര്‍ ആണ് ഇതുവരെ രോഗം ബാധിച്ച് മരിച്ചത്. 45843 പേര്‍ക്ക് പുതുതായി രോഗം ബാധിച്ചു. കൊവിഡ് പ്രതിരോധ വാക്സീൻ സ്വീകരിച്ചവർ 6607384 പേര്‍. വരും ദിവസങ്ങളില്‍ വാക്സിന്‍ വിതരണം ശക്തമാക്കാന്‍ ആണ് അധികൃതരുടെ തീരുമാനം.

അതേസമയം സൗദിയില്‍ കോവിഡ് വാക്സിന്‍ രണ്ടാം ഡോസ് നല്‍കുന്നത് നീട്ടിവച്ചു.സമൂഹത്തിലെ എല്ലാവര്‍ക്കും ഒന്നാമത്തെ ഡോസ് വാക്സിന്‍ ലഭിച്ചുവെന്ന് ഉറപ്പാക്കുന്നതിനാണ് രണ്ടാമത്തെ ഡോസ് നീട്ടിവെക്കുന്നതെന്ന് മന്ത്രാലയം നേരത്തെ അറിയിച്ചിരുന്നു. ആദ്യ ഡോസ് വാക്സിന്‍ വിതരണം വിപുലമാക്കാനും രണ്ടാം ഡോസ് അപ്പോയിന്റ്മെന്റുകള്‍ നീട്ടിവെക്കാനുമാണ് സമയക്രമം മാറ്റുന്നതെന്ന് മന്ത്രാലയം പറഞ്ഞു.

എന്നാൽ കോവിഡ് വാക്സിന്‍ പൂര്‍ത്തിയാക്കി നാട്ടില്‍ അവധിക്കു പോകാനിരുന്ന പ്രവാസികളെ പുതിയ തീരുമാനം ആശങ്കയിലാക്കി. വിമാന യാത്രയ്ക്ക് കോവിഡ് വാക്സിന്‍ നിര്‍ബന്ധമാക്കുമെന്ന നേരത്തേ റിപോര്‍ട്ടുകള്‍ പുറത്തുവന്നിരുന്നു. നാട്ടില്‍നിന്ന് രണ്ടാമത്തെ ഡോസ് എടുക്കാനാകുമോ എന്ന് പലരും സംശയം ഉന്നയിക്കുന്നുണ്ട്.