കൊറോണ വ്യാപനം മുന്നിൽക്കണ്ട് കൂടുതൽ മുന്കരുതലിന്റെ ഭാഗമായി ഇന്ത്യ ഉൾപ്പടെയുള്ള രാഷ്ട്രങ്ങൾക്ക് ഗൾഫ് രാഷ്ട്രങ്ങൾ ഏർപ്പെടുത്തിയ വിലക്ക് അനിശ്ചിതമായി തന്നെ തുടരുകയാണ്. ഈ ദുരിതങ്ങൾക്കിടയിൽ പ്രവാസികൾക്ക് ചെറിയ ആശ്വാസമായി എത്തിയത് ഖത്തറിന്റെ പ്രഖ്യാപനമാണ്. കടുത്ത നിബന്ധനകളോടെ പ്രവാസികൾക്ക് യാത്രാനുമതി നൽകിയിരിക്കുകയാണ് അധികൃതർ. ഈ സാഹചര്യത്തിൽ കൂടുതൽ മലയാളികൾ സൗദിയിലേക്കും യുഎഇയിലേക്കും എത്തിച്ചേരുകയാണ്....

സൗദിയിലേക്കും യു.എ.ഇയിലേക്കും പോകാനായി ഖത്തറിലെത്തിയ ആദ്യ സംഘങ്ങള്‍ ലക്ഷ്യത്തിലെത്തിയിരിക്കുകയാണ്. ഇത്തരത്തിൽ എത്തിച്ചേരാൻ സാധിക്കുമോ എന്ന ആശങ്കകൾ നിലനിൽക്കെയാണ് പ്രവാസികൾ ലക്ഷ്യസ്ഥാനത്ത് എത്തിച്ചേർന്നത്. ഇത് കൂടുതൽ പ്രവാസികൾക്ക് ആശ്വാസം നൽകുന്ന വാർത്തയായി മാറുകയാണ്. വ്യാഴാഴ്ച രാത്രിയും വെള്ളിയാഴ്ച പുലര്‍ച്ചെയുമായാണ് ഇത്തരത്തിൽ ഖത്തര്‍ വഴിയുള്ള മലയാളികള്‍ സൗദിയിലെത്തിയത്. ഗള്‍ഫിലെ മറ്റെല്ലാ വഴിയും അടഞ്ഞപ്പോള്‍ തുറന്ന ഖത്തര്‍ ഇടത്താവളമാക്കി, 14 ദിവസം ക്വറന്റൈനിൽ കഴിഞ്ഞ ശേഷമാണ് ഇവര്‍ സൗദിയിലെത്തിയത്.

വ്യാഴാഴ്ച രാത്രി 9.10നുള്ള ഖത്തര്‍ എയര്‍വേസ് വിമാനത്തില്‍ ജിദ്ദയിലിറങ്ങിയ കോഴിക്കോട് മുക്കം ചേന്ദമംഗലൂര്‍ സ്വദേശി ജംഷീദ് റഹ്‌മാനാണ് ഖത്തര്‍ മാര്‍ഗം സൗദിയിലെത്തിയ ആദ്യ മലയാളി എന്നത്. ജൂലൈ 14 നാണ് ഇദ്ദേഹം ഓണ്‍ അറൈവല്‍ വിസയില്‍ ഖത്തറിലിറങ്ങിയത് തന്നെ. യാത്രക്ക് 72 മണിക്കൂര്‍ മുമ്പ് ആര്‍.ടി.പി.സി.ആര്‍ പരിശോധന നടത്തി കോവിഡ് ബാധിച്ചിട്ടില്ലെന്ന് ഉറപ്പാക്കിയിരുന്നു. അത് തെളിയിക്കുന്ന നെഗറ്റിവ് സര്‍ട്ടിഫിക്കറ്റ് കൈയില്‍ കരുതുകയും ചെയ്തു. കൂടാതെ സൗദിയുടെ വിദേശികള്‍ക്കുള്ള മുഖീം പോര്‍ട്ടലില്‍ രജിസ്റ്റര്‍ ചെയ്യുകയും തവക്കല്‍നാ ആപ്പില്‍ കോവിഡ് വാക്‌സിനേഷന്‍ പൂര്‍ത്തീകരിച്ചത് അപ്ഡേറ്റ് ചെയ്യുകയും ചെയ്തു.

ഇതോടൊപ്പം തന്നെ ഈ നടപടികളെല്ലാം പൂര്‍ത്തീകരിച്ചത് യാത്ര സുഗമമാക്കിയതായി ജംഷീദ് പറയുകയുണ്ടായി. ജിദ്ദ വിമാനത്താവളത്തില്‍ ഒരു തരത്തിലുമുള്ള പരിശോധനയും നേരിടേണ്ടിവന്നില്ലെന്നും സാധാരണ നടപടിക്രമങ്ങള്‍ മാത്രമേ ഉണ്ടായിരുന്നുള്ളൂവെന്നും ജംഷീദ് വ്യക്തമാക്കി. തവക്കല്‍നയില്‍ ഇമ്യൂണ്‍ സ്റ്റാറ്റസ് അപ്ഡേറ്റ് ചെയ്തിരുന്നതിനാല്‍ നിര്‍ബന്ധിത സമ്പര്‍ക്കവിലക്ക് ഒഴിവായി. മലപ്പുറം കൊട്ടപ്പുറം സ്വദേശി കെ.കെ. അബ്ദുല്‍ റസാഖ്, പാലക്കാട് എടത്തനാട്ടുകര സ്വദേശികളായ ശറഫുദ്ദീന്‍, ബഷീര്‍ എന്നിവരും വെള്ളിയാഴ്ച പുലര്‍െച്ചയോടെ സൗദിയിലെത്തി. ഇനിയുള്ള ദിവസങ്ങളില്‍ ദോഹയില്‍ നിന്ന് കൂടുതല്‍ പേര്‍ സൗദിയിലെ വിവിധ നഗരങ്ങളില്‍ എത്തും. നിലവില്‍ നൂറുകണക്കിന് സൗദി പ്രവാസികളാണ് ഖത്തര്‍ വഴി യാത്രക്കായി ദോഹയിലുള്ളത്.

അതേസമയം ഇത്തരത്തിൽ യാത്ര ചെയ്യാൻ തയ്യാറാകുന്ന പ്രവാസികൾ ശ്രദ്ധിക്കേണ്ട കാര്യങ്ങള്‍ ഇവയൊക്കെയാണ്....

തവക്കല്‍ന ആപ്പില്‍ ഇമ്യൂണ്‍ സ്റ്റാറ്റസ് ഉറപ്പാക്കുക. ശേഷം, ലഭിക്കുന്ന ഹെല്‍ത് പാസ്പോര്‍ട്ട് ഡൗണ്‍ലോഡ് ചെയ്ത് പ്രി‍െന്‍റടുത്ത് കൈയില്‍ സൂക്ഷിക്കുക. മുഖീം പോര്‍ട്ടലിലെ അറൈവല്‍ രജിസ്ട്രേഷന്‍ കോപ്പിയും സൂക്ഷിക്കുക. സൗദി റീ എന്‍ട്രി വിസ കോപ്പി, വാക്സിനേഷന്‍ സര്‍ട്ടിഫിക്കറ്റ് ഇത്രയും രേഖകള്‍ കൈവശം വെക്കല്‍ ദോഹയില്‍ നിന്നുള്ള നടപടികള്‍ പൂര്‍ത്തിയാക്കാന്‍ എളുപ്പമാവും.