സൗദി കിഴക്കന്‍ പ്രവിശ്യ (ദമ്മാം) മുന്‍ ഗവര്‍ണര്‍ അമീര്‍ മുഹമ്മദ് ബിന്‍ ഫഹദ് ബിന്‍ അബ്ദുല്‍ അസീസ് അല്‍ സഊദ് അന്തരിച്ചു
സൗദി കിഴക്കന്‍ പ്രവിശ്യ (ദമ്മാം) മുന്‍ ഗവര്‍ണര്‍ അമീര്‍ മുഹമ്മദ് ബിന്‍ ഫഹദ് ബിന്‍ അബ്ദുല്‍ അസീസ് അല്‍ സഊദ് (75) അന്തരിച്ചു. റിയാദിലെ ഇമാം തുര്‍ക്കി ബിന്‍ അബ്ദുല്ല പള്ളിയില്‍ ബുധനാഴ്ച ദുഹ്ര്‍ നമസ്‌കാരത്തിന് ശേഷം ജനാസ നമസ്‌കരിച്ചു ഖബറടക്കും.
സൗദി മുന്‍ ഭരണാധികാരി ഫഹദ് ബിന്‍ അബ്ദുല്‍ അസീസ് രാജാവിന്റെ രണ്ടാമത്തെ മകനാണ്. റിയാദില്‍ ജനിച്ച അദ്ദേഹം റിയാദിലെ ക്യാപിറ്റല്‍ മോഡല്‍ ഇന്‍സ്റ്റിറ്റ്യൂട്ടില്‍ നിന്ന് പൊതുവിദ്യാഭ്യാസം നേടിയിട്ടുണ്ട്.
സാന്താ ബാര്‍ബറയിലെ കാലിഫോര്‍ണിയ സര്‍വകലാശാലയില്‍നിന്ന് സാമ്പത്തിക ശാസ്ത്രത്തിലും രാഷ്ട്രമീമാംസയിലും ബിരുദം നേടി. ശേഷം സര്‍ക്കാര്‍ ജോലിയില്‍ ചേരുന്നതിന് മുമ്പ് അദ്ദേഹം സ്വകാര്യ മേഖലയില്‍ ജോലി ചെയ്തു. ആഭ്യന്തര ഉപ മന്ത്രി പദവിയിലാണ് ഔദ്യോഗിക ജീവിതാരംഭം കുറിച്ചത്.
1985 മുതല്‍ 2013 വരെ കിഴക്കന്‍ പ്രവിശ്യാ ഗവര്‍ണര്‍ ആയി സേവനമനുഷ്ഠിച്ചു. നിരവധി മാനുഷികവും സാമൂഹികവുമായ വിഷയങ്ങളില്‍ അദ്ദേഹത്തിന്റെ സംഭാവന സ്മരണീയമാണ്.അമീര്‍ മുഹമ്മദ് ബിന്‍ ഫഹദ് പ്രോഗ്രാം ഫോര്‍ യൂത്ത് ഡെവലപ്മെന്റ് ഉള്‍പ്പെടെ സാമൂഹിക സേവനത്തിനായി അദ്ദേഹം വിവിധ സംരംഭങ്ങളും പരിപാടികളും ആരംഭിച്ചു. അമീര്‍ മുഹമ്മദ് ബിന്‍ ഫഹദ് ഫൗണ്ടേഷന്‍ ഫോര്‍ ഹ്യുമാനിറ്റേറിയന്‍ ഡെവലപ്മെന്റ് അദ്ദേഹം സ്ഥാപിച്ചു. കിഴക്കന്‍ പ്രവിശ്യയില്‍ അന്താരാഷ്ട്ര നിലവാരത്തിലുള്ള ഒരു സ്വകാര്യ സര്‍വകലാശാല എന്നത് അദ്ദേഹത്തിന്റെ ആശയമായിരുന്നു. അങ്ങനെ ആരംഭിച്ച സര്‍വകലാശാലക്ക് ആദരസൂചകമായി അദ്ദേഹത്തിന്റെ പേരാണ് നല്‍കിയിട്ടുള്ളത്.
"
https://www.facebook.com/Malayalivartha
