ചൈനീസ് സർക്കാർ അച്ചടക്ക നയം കൂടുതൽ കടുപ്പിക്കുകയാണ്. കഴിഞ്ഞ ദിവസം വ്യഭിചാര കുറ്റം ചുമത്തി ചൈനയിലെ പ്രശസ്ത പിയാനിസ്റ്റിനെ അറസ്റ്റ് ചെയ്തതായുള്ള റിപ്പോര്‍ട്ടുകൾ പുറത്ത് വരുകയാണ്. പ്രശസ്ത പിയാനിസ്റ്റായ ലീ യുന്‍ഡിയാണ് ഒരു ലൈംഗിക തൊഴിലാളിക്കൊപ്പം പിടിയിലായതെന്ന് ചൈനീസ് സര്‍ക്കാരിന്റെ ഔദ്യോഗിക മാധ്യമമായ ദ് പീപ്പിള്‍സ് ഡെയ്ലി സാമൂഹിക മാധ്യമത്തില്‍ പോസ്റ്റ് ചെയ്ത റിപ്പോര്‍ട്ടില്‍ വ്യക്തമാക്കുകയുണ്ടായി.

കൂടാതെ ചൈനീസ് സര്‍ക്കാരിന്റെ അച്ചടക്ക നയത്തിന് എതിരായി പ്രവര്‍ത്തിക്കുന്നവര്‍ പ്രത്യാഘാതം നേരിടേണ്ടി വരുമെന്ന് സര്‍ക്കാര്‍ മറ്റ് സിനിമ- വിനോദ മേഖലയിലെ പ്രമുഖര്‍ക്കും മുന്നറിയിപ്പ് നല്‍കിയതായും റിപ്പോര്‍ട്ടില്‍ ചൂണ്ടിക്കാണിക്കുന്നു. ഇത്തരത്തിൽ പ്രവർത്തിക്കുന്ന താരങ്ങൾക്കെതിരെ കൂടുതൽ നടപടികൾ സ്വീകരിക്കാൻ ഒരുങ്ങുകയാണ് അധികൃതർ.

അതോടൊപ്പം തന്നെ സിനിമ-വിനോദ മേഖലകളിലെ ചില പ്രമുഖര്‍ സാമൂഹിക ധാര്‍മികതയെയും ചൈനീസ് നിയമങ്ങളെയും വെല്ലുവിളിക്കുന്ന പ്രവര്‍ത്തനങ്ങളില്‍ ഏര്‍പ്പെടുന്നതായി ചൈനീസ് മാധ്യമമായ സി.സി.ടി.വിയും റിപ്പോര്‍ട്ട് ചെയ്തു. അറസ്റ്റിലായ പിയാനിസ്റ്റിനെ തങ്ങളുടെ സംഘടനയില്‍ നിന്ന് പുറത്താക്കിയതായി ചൈനീസ് മ്യുസിഷ്യന്‍സ് അസോസിയേഷന്‍ വക്താക്കള്‍ വ്യക്തമാക്കി. വിനോദ മേഖലയില്‍ സമ്പൂര്‍ണ ശുദ്ധീകരണം നടത്താനാണ് സര്‍ക്കാരിന്റെ നീക്കം.

ഇതുകൂടാതെ കൂടുതൽ നിബന്ധനകളാണ് സർക്കാർ മുന്നോട്ട് വയ്ക്കുന്നത്. ചൈനീസ് ഗായകന്മാർ സൗത്ത് കൊറിയയുടെ സ്വാധീനത്താൽ സ്ത്രൈണത പുലർത്തുന്നതിനെ ചൂണ്ടിക്കാട്ടിയും അധികൃതർ എത്തിയിരുന്നു. എത്തും വരും തലമുറയെ ബാധിക്കുമെന്നതിനാൽ തന്നെ പൗരുഷം പുലർത്തണമെന്നും സർക്കാർ ചൂണ്ടിക്കാട്ടി.