പാലാരിവട്ടം പാലം അഴിമതിയില്‍ മുഖ്യമന്ത്രി പിണറായി വിജയന് മറുപടിയുമായി കെ.പി.സി.സി അധ്യക്ഷന്‍ മുല്ലപ്പള്ളി രാമചന്ദ്രന്‍. മുന്‍ മന്ത്രി ഇബ്രാഹിംകുഞ്ഞല്ല, പിണറായി തന്നെയായിരിക്കും വൈകാതെ ജയില്‍ ഭക്ഷണം കഴിക്കുകയെന്ന് മുല്ലപ്പള്ളി ആഞ്ഞടിച്ചു. സര്‍ക്കാര്‍ ചെലവില്‍ മുഖ്യമന്ത്രി ഭക്ഷണം കഴിക്കാന്‍ പോകുന്നത് വരും ദിവസങ്ങളില്‍ കാണാമെന്നും അദ്ദേഹം പറഞ്ഞു.

അഴിമതിയെന്ന് പറഞ്ഞ് മുഖ്യമന്ത്രി പിണറായി വിജയന്‍ ഉണ്ടയില്ലാ വെടിവെക്കുകയാണെന്ന് പ്രതിപക്ഷ നേതാവ് രമേശ് ചെന്നിത്തല പറഞ്ഞു. 374 കോടിയുടെ ലാവലിന്‍ കേസില്‍ ഏഴാം പ്രതിയാണ് മുഖ്യമന്ത്രി. ആരെയും ഭീഷണിപ്പെടുത്തേണ്ടെന്നും അത്തരം നീക്കങ്ങള്‍ കൈയ്യില്‍ വെച്ചാമതിയെന്നും ചെന്നിത്തല വ്യക്തമാക്കി.

അതേസമയം പാലാരിവട്ടം പാലം നിര്‍മ്മാണ അഴിമതിയിൽ പങ്കില്ലെന്ന് മുൻ മുഖ്യമന്ത്രി ഉമ്മൻചാണ്ടി വ്യക്തമാക്കി. ഏത് അന്വേഷണത്തെയും യുഡിഎഫ് സ്വാഗതം ചെയ്യുന്നു എന്നദ്ദേഹം വ്യക്തമാക്കി. അഴിമതി കാണിച്ചവർ നിയമത്തിന് മുന്നിൽ വരണമെന്നും ഒരു തെറ്റും ചെയ്തിട്ടില്ലെന്ന മനസാക്ഷിയുടെ കരുത്തിലാണ് ഇത് പറയുന്നതെന്നും ഉമ്മൻചാണ്ടി കോട്ടയത്ത് പറഞ്ഞു.