ആത്മഹത്യാ പ്രതിരോധവും മാനസികാരോഗ്യവും; മെന്റല്‍ ഹെല്‍ത്ത് എക്‌സിബിഷന്‍ മന്ത്രി കെ.കെ. ശൈലജ ടീച്ചര്‍ സന്ദര്‍ശിച്ചു
ലോക മാനസികാരോഗ്യ ദിനാചരണത്തിന്റെ ഭാഗമായി 'ആത്മഹത്യാ പ്രതിരോധവും മാനസികാരോഗ്യ പരിപോഷണവും' എന്ന വിഷയത്തെ ആസ്പദമാക്കി തിരുവനന്തപുരം പ്രസ് ക്ലബ്ബില്‍ സംഘടിപ്പിച്ചുവരുന്ന മെന്റല്‍ ഹെല്‍ത്ത് എക്‌സിബിഷന്‍ ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര്‍ സന്ദര്‍ശിച്ചു. എന്‍.എച്ച്.എം. സ്റ്റേറ്റ് മിഷന്‍ ഡയറക്ടര്‍ കേശവേന്ദ്രകുമാര്‍, ആരോഗ്യ വകുപ്പ് ഡയറക്ടര്‍ ഡോ. ആര്‍.എല്‍. സരിത, ആരോഗ്യ വിദ്യാഭ്യാസ ഡയറക്ടര്‍ ഡോ. എ. റംലാബീവി, ജോ. ഡയറക്ടര്‍മാരായ ഡോ. ശ്രീകുമാരി, ഡോ. അജയകുമാര്‍, മാനസികാരോഗ്യ പരിപാടി സ്റ്റേറ്റ് നോഡല്‍ ഓഫീസര്‍ ഡോ. കിരണ്‍ പി.എസ്. എന്നിവര്‍ മന്ത്രിയോടൊപ്പമുണ്ടായിരുന്നു. ഒക്‌ടോബര്‍ 9, 10 തീയതികളിലാണ് മെന്റല്‍ ഹെല്‍ത്ത് എക്‌സിബിഷന്‍ നടക്കുന്നത്.
എല്ലാ വര്‍ഷവും ഒക്‌ടോബര്‍ 10 ലോക മാനസികാരോഗ്യ ദിനമായി ആചരിച്ചുവരികയാണ്. ആത്മഹത്യ പ്രതിരോധവും മാനസികാരോഗ്യ പരിപോഷണവുമാണ് ഈ വര്‍ഷത്തെ വിഷയം. കേരളത്തില്‍ ആത്മഹത്യ നിരക്ക് കുറഞ്ഞുവരുന്നുവെങ്കിലും യുവജനങ്ങള്‍ക്കിടയിലും കുട്ടികള്‍ക്കിടയിലുമുള്ള ആത്മഹത്യ നിരക്ക് കൂടുതലായി തുടരുന്നു. അതുകൊണ്ടുതന്നെ ആത്മഹത്യ പൊതുജനാരോഗ്യ രംഗത്ത് പ്രധാന പ്രശ്‌നങ്ങളിലൊന്നാണ്. ഇതിനായി പ്രത്യേക കര്‍മ്മപദ്ധതികള്‍ സര്‍ക്കാര്‍ ആവിഷ്‌കരിച്ച് നടപ്പിലാക്കി വരുന്നു. ഇതിന്റെ ഭാഗമായി കമ്മ്യൂണിറ്റി ഗേറ്റ് കീപ്പേഴ്‌സിനുള്ള പരിശീലന പരിപാടികള്‍ സംസ്ഥാനത്തൊട്ടാകെ നടപ്പിലാക്കി തുടങ്ങുകയാണ്. തൊടുപുഴയിലെ കുട്ടിയുടെ കൊലപാതകവും കൂടത്തായി കൊലപാതക പരമ്പരയും നമ്മുടെ കണ്‍മുമ്പില്‍ തന്നെയുണ്ട്. ഈ പശ്ചാത്തലത്തില്‍ മാനസികാരോഗ്യത്തിന് വളരെയേറെ പ്രസക്തിയുണ്ട്.
https://www.facebook.com/Malayalivartha
