പിണറായി വിജയന്റെ അഴിമതി വിരുദ്ധ ഇമേജ് ഇടിയുന്നു എന്നാണ് പൊതുവെയുള്ള ആക്ഷേപം. ബഹറക്ക് നൽകുന്ന പിന്തുണക്ക് പിന്നാലെ ആരോപണ വിധേയനായ സഭാ അദ്‌ധ്യക്ഷനെ കെട്ടി പിടിച്ച് പിണറായി വീണ്ടും വിവാദത്തിലായി.

സി എസ് ഐ സഭാധ്യക്ഷൻ ധർമ്മരാജ് റസാലം മുഖ്യമന്ത്രി പിണറായി വിജയനെ ആലിംഗനം ചെയ്യുന്ന ചിത്രം സാമൂഹിക മാധ്യമങ്ങളിൽ ട്രെന്റാവുകയാണ്. വ്യാഴാഴ്ച മാതൃഭൂമി പ്രസിദ്ധീകരിച്ച ചിത്രമാണ് വൈറലായത്. നിരവധി ആരോപണങ്ങൾ നേരിടുന്ന സഭാധ്യക്ഷനാണ് ധർമ്മരാജ് റസാലം. കേരള പോലീസ് അന്വേഷിക്കുന്ന പത്തോളം കേസുകളിൽ പ്രതിയാണ് റസാലം എന്ന് വിമർശകർ ആരോപിക്കുന്നു.
അദ്ദേഹത്തെ സഭാ മോഡറേറ്റർ ആക്കിയതിന് നൽകിയ പൗരസ്വീകരണത്തിലാണ് മുഖ്യമന്ത്രി പങ്കെടുത്തത്. പൗര സ്വീകരണത്തിൽ ഒ രാജഗോപാൽ എം എൽ എയും ഉണ്ടായിരുന്നു.

വി എസ് അച്ചുതാനന്ദൻ ആയിരുന്നെങ്കിൽ ഇതു പോലൊരു യോഗത്തിന് പോകുമായിരുന്നില്ലെന്ന് വിമർശിക്കുന്നവർ സി പി എം നേതാക്കൾ തന്നെയാണ്. മുമ്പ് തിരുവനന്തപുരത്തെ പാപ്പനംകോട്ട് ഒരു സഭ തുടങ്ങാനിരുന്ന കാൻസർ സെന്ററിന്റെ ഉദ്ഘാടന ചടങ്ങിൽ അന്നത്തെ മുഖ്യമന്ത്രി ഉമ്മൻചാണ്ടി പങ്കെടുത്തിരുന്നില്ല. സ്ഥലത്തിന്റെ പേരിൽ കേസുണ്ടായിരുന്നതു കൊണ്ടായിരുന്നു അത്. മുഖ്യമന്ത്രി എന്ന നിലയിൽ ഉമ്മൻ ചാണ്ടി പങ്കെടുത്തിരുന്ന പരിപാടികൾക്ക് മുമ്പ് ഇന്റലിജൻസ് അന്വേഷണം നടക്കുമായിരുന്നു. സോളർ വിഷയം ഉണ്ടായതിന് ശേഷമായിരുന്നു ഇത്തരം പരിശോധനകൾ.

പിണറായിയുടെ ഏറ്റവും വലിയ ഇമേജ് അഴിമതിക്കെതിരായ കുരിശുദ്ധമായിരുന്നു. എന്നാൽ വളരെ പെട്ടെന്നാണ് അത്തരമൊരു ഇമേജിൽ നിന്ന് അദ്ദേഹം പുറത്തായത്. ഇ പി ജയരാജനെയും തോമസ് ചാണ്ടിയെയും മന്ത്രിസഭയിൽ നിന്നും പുറത്താക്കിയപ്പോൾ പിണറായിക്കുണ്ടായിരുന്ന ഇമേജാണ് ഇല്ലാതായത് .

സംസ്ഥാന പോലീസ് മേധാവിയെ സംരക്ഷിക്കാനുള്ള വ്യഗ്രത തകർത്തത് മുഖ്യമന്ത്രിയുടെ ഇമേജ് തന്നെയാണ്. അത് പക്ഷേ അദ്ദേഹം തിരിച്ചറിയുന്നില്ലെന്ന് വിമർശകർ ആരോപികുന്നു. ലാവ്ലിൻ കേസിൽ പ്രതിയായപ്പോൾ പോലും പിണറായിയെ ആരും അഴിമതികാരനെന്ന് വിളിച്ചില്ല. എന്നാൽ ഇപ്പോൾ അതല്ല അവസ്ഥ.