ലോക്ഡൗണ്‍... എടിഎമ്മില്‍ പണം ഉണ്ടാകില്ലെന്ന ഭയം വേണ്ടെന്ന് മുഖ്യമന്ത്രി; കുടുംബശ്രീ മുഖേന നല്‍കേണ്ട വായ്പാ പദ്ധതി ഉടന്‍ പ്രാവര്‍ത്തികമാക്കും
കോവിഡ് 19നെ തുടര്‍ന്ന് രാജ്യത്ത് ലോക്ഡൗണ്‍ പ്രഖ്യാപിച്ച സാഹചര്യത്തില്‍ സംസ്ഥാനത്തെ എടിഎമ്മില്‍ പണം ഉണ്ടാകില്ലെന്ന ഭയം വേണ്ടെന്ന് മുഖ്യമന്ത്രി. എല്ലാ എടിഎമ്മുകളിലും പണം നിറയ്ക്കാന്‍ ബാങ്കേഴ്‌സ് സമിതിയുമായുള്ള യോഗത്തില്‍ നിര്‍ദ്ദേശിച്ചതായും കുടുംബശ്രീ മുഖേന നല്‍കേണ്ട വായ്പാ പദ്ധതി ഉടന്‍ പ്രാവര്‍ത്തികമാക്കാന്‍ ആവശ്യപ്പെട്ടിട്ടുണ്ടെന്നും മുഖ്യമന്ത്രി പിണറായി വിജയന്‍ പറഞ്ഞു. ക്ഷേമ പെന്‍ഷനുകള്‍ പിന്‍വലിച്ചില്ലെങ്കില്‍ തുടര്‍ന്നുള്ള ഗഡുക്കള്‍ അക്കൗണ്ടില്‍ വരില്ലെന്ന തരത്തില്‍ നടക്കുന്ന പ്രചാരണങ്ങള്‍ തെറ്റാണെന്ന് ബാങ്കേഴ്‌സ് സമിതി വാര്‍ത്താക്കുറിപ്പില്‍ അറിയിച്ചു.
ക്ഷേമ പെന്‍ഷനുകള്‍ വന്ന സാഹചര്യത്തില്‍ തിരക്ക് നിയന്ത്രിക്കാന്‍ ബാങ്കുകളില്‍ കര്‍ശന നിയന്ത്രണങ്ങള്‍ ഏര്‍പ്പെടുത്തിയിട്ടുണ്ട്. അക്കൗണ്ട് നമ്ബറിന്റെ അവസാന അക്കങ്ങള്‍ നോക്കിയാണ് നിയന്ത്രണം ഏര്‍പ്പെടുത്തിയിരിക്കുന്നത്. ക്ഷേമ പെന്‍ഷനുകളുടെ തുക പിന്‍വലിക്കേണ്ടവരുടെ അക്കൗണ്ടുകള്‍ അവസാനിക്കുന്നത് പൂജ്യം,ഒന്ന് എന്നീ അക്കങ്ങളിലാണെങ്കില്‍ ഇവര്‍ പണം പിന്‍വലിക്കാന്‍ ഏപ്രില്‍ രണ്ടിന് ബാങ്കിലെത്തണം. രണ്ട്,മൂന്ന് അക്കങ്ങളില്‍ അക്കൗണ്ട് നമ്ബര്‍ അവസാനിക്കുന്നവര്‍ മൂന്നാം തീയതി ബാങ്കില്‍ എത്തണം. നാല്,അഞ്ച് അക്കങ്ങളില്‍ അവസാനിക്കുന്ന അക്കൗണ്ട് ഉടമകള്‍ ഏപ്രില്‍ നാലിനും ആറ്,ഏഴ് അക്കങ്ങളില്‍ അക്കൗണ്ട് നമ്ബര്‍ അവസാനിക്കുന്നവര്‍ ഏപ്രില്‍ ആറിനും ബാങ്കിലെത്തണം. എട്ട്,ഒന്‍പത് അക്കങ്ങളില്‍ അവസാനിക്കുന്ന അക്കൗണ്ട് ഉടമകള്‍ ഏപ്രില്‍ മാസം ഏഴിനാണ് ബാങ്കിലെത്തേണ്ടത്.
https://www.facebook.com/Malayalivartha
