കുമ്ബളങ്ങി ചെല്ലാനത്ത് ദുരിതം അനുഭവിക്കുന്നവര്‍ക്ക് പൊലീസ് നല്‍കിയ ഭക്ഷണ പൊതിയില്‍ 100 രൂപ വച്ച കുമ്ബളങ്ങി സ്വദേശി മേരിയെ അഭിനന്ദിച്ച്‌ മുഖ്യമന്ത്രി പിണറായി വിജയന്‍.

മനുഷ്യന്റെ അപരനോടുള്ള കരുതലും സ്‌നേഹവുമാണ് ഏതു പ്രതിസന്ധിഘട്ടത്തെ മറികടക്കാന്‍ ഒരു സമൂഹത്തിന്റെ കരുത്തായി മാറുന്നത്. ചെല്ലാനത്ത് ദുരിതമനുഭവിക്കുന്നവര്‍ക്കായി പൊലീസ് ശേഖരിച്ചു നല്‍കിയ ഭക്ഷണപ്പൊതിയില്‍ തനിക്ക് തൊഴിലുറപ്പിലൂടെ ലഭിച്ച 100 രൂപ വച്ചുകൊണ്ട് കുമ്ബളങ്ങി സ്വദേശിനി മേരി സെബാസ്റ്റ്യന്‍ നമുക്ക് കാണിച്ചു തന്നത് ഈ മാതൃകയാണെന്നും മുഖ്യമന്ത്രി പറഞ്ഞു.

തന്റെ അധ്വാനത്തിന്റെ ഒരു പങ്ക് അവര്‍ കഷ്ടപ്പാടനുഭവിക്കുന്നവര്‍ക്കായി മാറ്റി വയ്ക്കുകയായിരുന്നു. മനുഷ്വത്വത്തിന്റെ നിഷ്‌കപടമായ ഈ ആവിഷ്‌കാരങ്ങള്‍ നമുക്ക് ഏവര്‍ക്കും പ്രചോദനമായിത്തീരട്ടെയെന്നും മുഖ്യമന്ത്രി പറഞ്ഞു.

ചെല്ലാനത്ത് വിതരണം ചെയ്ത പൊതിച്ചോറിലൊന്നില്‍ നൂറു രൂപ കൂടി കരുതി വെച്ച മേരിയെ തേടി അഭിനന്ദനങ്ങളുടെ പ്രവാഹമായിരുന്നു. തൊഴിലുറപ്പിന് പോയി കിട്ടിയ പണത്തില്‍ നിന്നും നൂറ് രൂപയും ചേര്‍ത്തായിരുന്നു മേരി ഭക്ഷണപ്പൊതി തയ്യാറാക്കിയത്.

കോവിഡ് വ്യാപനത്തിന് പിന്നാലെ മേരിയുടെ ഭര്‍ത്താവിനും ജോലിയില്ലാത്ത സ്ഥിതിയായിരുന്നു. ഈ അവസ്ഥയിലും സമാന നിലയിലുള്ള വീടുകളിലേക്ക് തന്നെക്കൊണ്ട് കഴിയുന്ന ചെറിയ സഹായമെത്തിക്കാന്‍ ശ്രമിച്ച മേരി ഇതിനോടകം സോഷ്യല്‍ മീഡിയയിലെ താരമായി മാറിയിരുന്നു.

കണ്ണമാലി പൊലീസ് ഇന്‍സ്‌പെക്ടര്‍ പി എസ് ഷിജുവിന്റെ ഫേസ്ബുക്ക് പേജില്‍ വന്ന ഒരു കുറിപ്പിലൂടെയാണ് മേരി സെബാസ്റ്റ്യന്റെ സ്‌നേഹവും കരുതലും ലോകം അറിഞ്ഞത്. കൊവിഡ് വ്യാപനത്തിനിടയിലാണ് എറണാകുളം ചെല്ലാനം മേഖല കടലാക്രമണ ഭീഷണിയിലേക്കും എത്തുന്നത്.

ഇവര്‍ക്കായി കണ്ണമാലി പൊലീസ് സ്റ്റേഷനിലെ പൊലീസുകാര്‍ ശേഖരിച്ച ഭക്ഷണപ്പൊതികളിലൊന്നില്‍ നിന്നാണ് നൂറുരൂപ ലഭിച്ചത്. ഊണ് പൊതിഞ്ഞ കവറില്‍ കറികള്‍ക്കിടയില്‍ പ്ലാസ്റ്റിക് കൊണ്ട് ഭദ്രമായി പൊതിഞ്ഞ നോട്ടായിരുന്നു അത്.

വിവരം കണ്ണമാലി പൊലീസ് ഇന്‍സ്‌പെക്ടര്‍ പിഎസ് ഷിജു തന്റെ ഫേസ്ബുക്ക് പേജില്‍ പങ്കുവച്ചു. ഒരു പഴം കൊടുത്താല്‍ പോലും അത് ഫോട്ടോയെടുത്ത് സോഷ്യല്‍ മീഡിയയിലും പത്രത്തിലും കൊടുക്കുന്ന ഇക്കാലത്ത്, വാങ്ങുന്നവന്റെ ആത്മാഭിമാനത്തെ വ്രണപ്പെടുത്താതെ ആ പൊതിച്ചോറില്‍ 100 രൂപ കൂടി കരുതി വെച്ച ആ മനസിന് മുമ്ബില്‍ നമിക്കുന്നു എന്ന് അദ്ദേഹം കുറിച്ചു.