ദേശീയ അന്വേഷണ ഏജന്‍സി കഴിഞ്ഞ ദിവസം അല്‍ഖ്വയ്ദ തീവ്രവാദികളെ പിടികൂടിയിരുന്നു. എന്നാൽ തുടർ അന്വേഷണത്തിൽ നടുക്കുന്ന കണ്ടെത്തലുകളാണ് ഇവരിൽ നിന്നും പുറത്ത് വരുന്നത്. ഇവരുടെ വീടിന് സമീപം രഹസ്യഅറ കണ്ടെത്തിയിരിക്കുകയാണ് . പശ്ചിമ ബംഗാളിലെ മുര്‍ഷിദാബാദില്‍ നിന്ന് പിടികൂടിയ ആറ് അല്‍ഖ്വയ്ദ തീവ്രവാദികളില്‍ ഒരാളായ അബുസൂഫിയാന്റെ വീടിന് സമീപത്ത് നിന്നായിരുന്നു രഹസ്യ ചേമ്പര്‍ കണ്ടെത്തിയത്. റായ്‌നഗര്‍ ഭാഗത്തുള്ള വീട്ടില്‍ നടത്തിയ റെയ്ഡില്‍ ആണ് 10*7 അടി വിസ്തീര്‍ണമുള്ള അറ കണ്ടെത്തിയത്.

ഒരു മണിക്കൂറോളം നീണ്ടുനിന്ന റെയ്ഡില്‍ നിരവധി ഇലക്ട്രോണിക് ഉപകരണങ്ങളും ഒരു ബള്‍ബ് ബോര്‍ഡും കണ്ടെത്തുകയും ചെയ്തു. സെപ്റ്റിക് ടാങ്കിന് വേണ്ടിയെടുത്ത കുഴിയാണിതെന്നാണ് സൂഫിയാന്റെ ഭാര്യ മാധ്യമപ്രവര്‍ത്തകരോട് പറഞ്ഞത്. അന്വേഷണ ഉദ്യോഗസ്ഥരോടും ഇക്കാര്യം പറഞ്ഞതായി അവര്‍ വ്യക്തമാക്കുകയും ചെയ്തു . ശനിയാഴ്ചയാണ് ദേശീയ അന്വേഷണ ഏജന്‍സി കേരളത്തില്‍ നിന്നും പശ്ചിമ ബംഗാളില്‍ നിന്നുമായി ഒമ്പത് അല്‍ഖ്വയ്ദ തീവ്രവാദികളെ അറസ്റ്റ് ചെയ്യുകയായിരുന്നു .