മൂന്നു വര്‍ഷത്തെ പ്രണയത്തിനൊടുവില്‍ വിവാഹിതരായി.... രണ്ടുവര്‍ഷത്തിനു ശേഷം സൗമ്യ ഇസ്രായിലേക്കു പോയി, ആറുമാസം കൂടി കഴിഞ്ഞ് നാട്ടിലെത്തി ഒരുമിച്ച് കഴിയാമെന്ന സ്വപ്നം ബാക്കിയായി......സൗമ്യയുടെ മൃതശരീരം അവിടുത്തെ ഇന്ത്യന്‍ എംബസി ഉദ്യോഗസ്ഥര്‍ ഏറ്റുവാങ്ങി, എത്രയും വേഗം നാട്ടിലെത്തിക്കാനുള്ള നടപടി തുടങ്ങി
മൂന്നു വര്‍ഷത്തെ പ്രണയത്തിനു ശേഷമാണ് സൗമ്യയും സന്തോഷും വിവാഹിതരായത്. രണ്ടു വര്‍ഷത്തിനു ശേഷം സൗമ്യ ഇസ്രയേലിലേക്കു പോകുകയായിരുന്നു. ആറു മാസം കൂടി കഴിഞ്ഞ് നാട്ടിലെത്തി ഒരുമിച്ചു കഴിയാമെന്ന സ്വപ്നമാണ് ബാക്കിയായത്.
ഇസ്രേയലില്‍ കെയര്‍ടേക്കറായാണു സൗമ്യ ജോലി ചെയ്തിരുന്നത്. അവസാനമായി നാട്ടിലെത്തിയത് രണ്ടു വര്‍ഷം മുമ്ബാണ്. നാട്ടില്‍ സ്ഥലം വാങ്ങി വീടു വച്ച് കുടുംബത്തോടൊപ്പം കഴിയാന്‍ തീരുമാനിച്ചിരുന്നു. ആറു മാസത്തിനു ശേഷം നാട്ടിലേക്കു പോരുമെന്നാണു സൗമ്യ അറിയിച്ചിരുന്നത്.
അതേസമയം ഇസ്രയേലില്‍ റോക്കറ്റാക്രമണത്തില്‍ കൊല്ലപ്പെട്ട ഇടുക്കി കീരിത്തോട് കാഞ്ഞിരന്താനം സന്തോഷിന്റെ ഭാര്യ സൗമ്യയുടെ മൃതശരീരം അവിടുത്തെ ഇന്ത്യന്‍ എംബസി ഉദ്യോഗസ്ഥര്‍ ഏറ്റുവാങ്ങി.
എത്രയും വേഗം നാട്ടിലെത്തിക്കാനുള്ള നടപടി തുടങ്ങിയെന്നും വിദേശകാര്യ സഹമന്ത്രി വി. മുരളീധരന്‍ അറിയിച്ചു. ചൊവ്വാഴ്ചയോടെ നാട്ടിലെത്തിക്കാനാകുമെന്നാണു സൂചന.
ഇസ്രയേലിലെ അഷ്‌കലോണില്‍ ഹോംനഴ്സായ സൗമ്യ (31) ചൊവ്വാഴ്ച വൈകിട്ട് നാട്ടിലുള്ള ഭര്‍ത്താവ് സന്തോഷുമായി വീഡിയോ കോളില്‍ സംസാരിക്കുന്നതിനിടെയാണു റോക്കറ്റാക്രമണമുണ്ടായത്. 10 വര്‍ഷമായി ഇസ്രയേലിലുള്ള സൗമ്യ കഴിഞ്ഞ അഞ്ചു വര്‍ഷത്തോളമായി ഇതേ വീട്ടിലാണു ജോലി ചെയ്യുന്നത്.
80 വയസുള്ള ഇസ്രയേലി വയോധികയെ പരിചരിക്കുകയായിരുന്നു. ആക്രമണമുണ്ടായപ്പോള്‍ മുന്നറിയിപ്പായി സൈറണ്‍ മുഴങ്ങിയെങ്കിലും സുരക്ഷിത സ്ഥാനത്തേക്കു മാറാന്‍ സമയം കിട്ടിയില്ല. വീഡിയോ കോള്‍ അപ്രതീക്ഷിതമായി മുറിഞ്ഞപ്പോള്‍ സന്തോഷ് തിരികെ വിളിച്ചെങ്കിലും പ്രതികരണമുണ്ടായില്ല.
സന്തോഷിന്റെ സഹോദരി ഷേര്‍ളിയും ബന്ധുവായ ജോമോനും ഇസ്രയേലില്‍ ജോലി ചെയ്യുന്നുണ്ട്. അവരാണു മരണവിവരം നാട്ടിലറിയിച്ചത്. ഒന്‍പതു വയസുള്ള ഏകമകന്‍ അഡോണിനെ നെഞ്ചോടടുക്കി കരയുകയാണു സന്തോഷ്. രണ്ടു വര്‍ഷം മുന്‍പ് സന്തോഷിന്റെ ഇളയ സഹോദരി ബിന്ദുവിന്റെ വിവാഹത്തിനാണ് സൗമ്യ ഒടുവില്‍ നാട്ടിലെത്തിയത്.
വിവരമറിഞ്ഞ് മന്ത്രി വി. മുരളീധരന്‍, മുഖ്യമന്ത്രി പിണറായി വിജയന്‍, മുന്‍ മുഖ്യമന്ത്രി ഉമ്മന്‍ ചാണ്ടി, രമേശ് ചെന്നിത്തല, ഡീന്‍ കുര്യാക്കോസ് എം.പി, റോഷി അഗസ്റ്റിന്‍ എം.എല്‍.എ. തുടങ്ങിയവര്‍ സൗമ്യയുടെ കുടുംബാംഗങ്ങളുമായി ബന്ധപ്പെട്ടു. മൃതദേഹം എത്രയും വേഗം നാട്ടിലെത്തിക്കാന്‍ നേതാക്കള്‍ ഇടപെടുന്നുണ്ട്.
സൗമ്യയുടെ നഷ്ടപരിഹാരം നേടിയെടുക്കാനായി മുഖ്യമന്ത്രിയുടെ നിര്‍ദേശാനുസരണം നോര്‍ക്ക ഇടപെട്ടിട്ടുണ്ട്. ഇസ്രയേല്‍ എംബസി ഉദ്യോഗസ്ഥരും സൗമ്യയുടെ ബന്ധുക്കളുമായി സംസാരിക്കുന്നുണ്ട്.
"
https://www.facebook.com/Malayalivartha
