കുട്ടനാട്ടിലെ വനിതകൾ കൂട്ടത്തോടെ രാജ്ഭവനിലേക്ക്...! വനിതാസംരംഭകർക്ക് രാജ് ഭവനിൽ നൽകിയത് വൻ ആദരം...! കുട്ടനാട്ടിലെ കേറ്ററിംഗ് സംരംഭക ഷീല ദേവരാജിനെയും സഹപ്രവർത്തകരെയുമാണ് ഗവർണറും പത്നി രേഷ്മ ആരിഫും ചേർന്ന് ആദരിച്ചത്. ചെറുകരയിലെ രുചി കാറ്ററിംഗ് യൂണിറ്റിന് നേതൃത്വം നൽകുന്നയാളാണ് ഷീലാ ദേവരാജ് .

35 അംഗ വനിതാ കാറ്ററിംഗ് ടീമും ഗവർണറുടെ ക്ഷണപ്രകാരം എത്തി. ഈ കൂട്ടായ്മയിലുള്ളത്, കുട്ടനാട്ടിലെ നീലംപേരൂർ ഗ്രാമപഞ്ചായത്തിലെ ചെറുകരയിലും പരിസരത്തുമുള്ള കർഷക തൊഴിലാളി കുടുംബങ്ങളിലെ വീട്ടമ്മമാരാണ്.

വനിതകൾക്ക് തൊഴിൽ നൽകുന്നതോടൊപ്പം അവരിൽ സമ്പാദ്യശീലം വളർത്താനുള്ള പരിശീലനവും നൽകുന്നുണ്ട്. ഈ പ്രവർത്തനവും കുട്ടനാട്ടിലെ പരമ്പരാഗത രുചികളെയും കരകൗശല ഇനങ്ങളെയും ജനങ്ങൾക്ക് പരിചയപ്പെടുത്തുന്നതിലുള്ള ഉത്സാഹവും അഭിനന്ദനാർഹമാണെന്ന് ഗവർണർ വ്യക്തമാക്കി.

രാജ്ഭവനിലെത്തിയപ്പോൾ അവർക്ക് ഉച്ച ആഹാരം വിളമ്പാൻ ഗവർണറും ചേർന്നു. പത്നീസമേതം അവർക്കൊപ്പം ഫോട്ടോയും എടുത്തു. ഗവർണറുടെ അഡീഷണൽ ചീഫ് സെക്രട്ടറി ഡോ. ദേവേന്ദ്രകുമാർ ധോദാവതും ചടങ്ങിൽ സംബന്ധിച്ചു. കുട്ടനാട്ടിൽ നിന്ന് പ്രത്യേക ബസ് പിടിച്ചാണ് സംഘം രാജ്ഭവനിൽ എത്തിയത്.രാജ് ഭവനിലെത്തിയ കുട്ടനാട്ടിലെ രുചി കേറ്ററിംഗ് യൂണിറ്റിലെ അംഗങ്ങൾക്ക് ഗവർണർ ആരിഫ് മുഹമ്മദ് ഖാൻ ആഹാരം വിളമ്പിക്കൊടുക്കുത്തു.