മണിക്കൂറുകള്‍ക്കുള്ളില്‍ കോടീശ്വരനായി.... ബാക്കിയുണ്ടായിരുന്ന ഏക ടിക്കറ്റെടുത്ത് ലോട്ടറി സ്റ്റാളില്‍ നിന്ന് പോയി മണിക്കൂറുകള്‍ക്കുള്ളില്‍ ബമ്പര്‍ അടിച്ചു....സമ്മര്‍ ബമ്പര്‍ നറുക്കെടുപ്പില്‍ 10 കോടിയുടെ ഭാഗ്യം കനിഞ്ഞത് കണ്ണൂര്‍ ആലക്കോട് നെടുവോട്ടെ പാറപ്പുറത്ത് കൊടിയന്‍ നാസറിന്.

ഓട്ടോഡ്രൈവറായ ഈ 46കാരനെ ചൊവ്വാഴ്ച രാത്രി എടുത്ത ടിക്കറ്റാണ് മണിക്കൂറുകള്‍ക്കുള്ളില്‍ കോടീശ്വരനാക്കിയത്. ആലക്കോട് ശ്രീ രാജരാജേശ്വര ഏജന്‍സിയില്‍ നിന്ന് രാജു എന്ന സബ് ഏജന്റ് എടുത്ത് വില്പന നടത്തിയതാണ് ടിക്കറ്റ്. ആറുമണിയോടെ കാര്‍ത്തികപുരത്തെ ലോട്ടറി സ്റ്റാളിലേക്ക് കയറിച്ചെന്ന നാസര്‍ ബമ്പര്‍ ടിക്കറ്റ് എടുക്കണമെന്ന് പറഞ്ഞു.

ഇപ്പോള്‍ കാശ് കൈയിലില്ലെന്നും വൈകിട്ട് വരുമ്പോള്‍ കണ്ടുവച്ച ടിക്കറ്റ് ബാക്കിയുണ്ടെങ്കില്‍ എടുക്കാമെന്നും അതിന് ഒന്നാംസമ്മാനം കിട്ടുമെന്നും പറഞ്ഞിരുന്നു. വൈകിട്ട് ഏഴരയായപ്പോള്‍ എത്തിയ നാസര്‍ ബാക്കിയായിരുന്ന എസ്.സി. 308797 നമ്പറിലുള്ള ഏക ടിക്കറ്റ് 250 രൂപ നല്‍കി വാങ്ങി. ഈ ടിക്കറ്റിന് ഒന്നാംസമ്മാനം ഉറപ്പാണെന്ന് നാസര്‍ പറഞ്ഞതായും രാജു വെളിപ്പെടുത്തി.

ബമ്പര്‍ അടിച്ച വിവരം നാസര്‍ തന്നെയാണ് രാജുവിനെ അറിയിച്ചതും.വിദ്യാര്‍ത്ഥികളായ നിസാര്‍,നസില എന്നിവരാണ് മക്കള്‍. ഷീറ്റ് മേഞ്ഞ വീട്ടിലാണ് നാസറിന്റെ മാതാവ് ഉള്‍പ്പെടെയുള്ള ഈ കുടുംബം താമസിക്കുന്നത്. 10കോടി രൂപ ബമ്പര്‍ ലോട്ടറി സമ്മാനമടിച്ചാല്‍ 298,12,500രൂപ നികുതിയും 110,30,625രൂപ സര്‍ചാര്‍ജ്ജും 1633725രൂപ ഹെല്‍ത്ത് ആന്‍ഡ് എഡ്യൂക്കേഷന്‍ സെസും അടച്ച് ബാക്കി 575,23,150രൂപയാണ് കൈയില്‍ കിട്ടുക. ഇന്നലെ ഉച്ചയ്ക്ക് രണ്ടിനായിരുന്നു നറുക്കെടുപ്പ്.

50 ലക്ഷം രൂപയുടെ രണ്ടാം സമ്മാനം എസ്.എ. 177547 എന്ന ടിക്കറ്റിനാണ്. ഒന്നാം സമ്മാനമായി 12 കോടി രൂപ നല്‍കുന്ന വിഷു ബമ്പര്‍ ടിക്കറ്റ് ഇന്നുമുതല്‍ വില്പന ആരംഭിക്കും.