ട്രെയിനുകളിലെ ജനറല്‍ കോച്ചുകളില്‍ യാത്ര ചെയ്യുന്നവര്‍ക്കായി പ്ലാറ്റ്ഫോമില്‍ ന്യായവിലയ്ക്ക് നല്ലഭക്ഷണം ഒരുക്കി റെയില്‍വേ. 20 രൂപ, 50 രൂപ എന്നിങ്ങനെ രണ്ടുനിരക്കിലുള്ള ഉച്ചഭക്ഷണമാണ് ഒരുക്കുന്നത്. ഐ.ആര്‍സി.ടി.സി.യുമായി ചേര്‍ന്നാണ് കൗണ്ടറുകളുടെ പ്രവര്‍ത്തനമുള്ളത്.

പൂരിയും ബാജിയുമുള്ള ജനതാ ഖാനയ്ക്ക് 20 രൂപയാണ്. ലെമണ്‍ റൈസിനും തൈര്‍സാദത്തിനും ഇതേ വിലതന്നെ. വെജിറ്റേറിയന്‍ ഊണിന് 50 രൂപയാണ് നിരക്ക്. സ്റ്റോക്കുണ്ടെങ്കില്‍ മസാലദോശയും ഈ നിരക്കില്‍ കിട്ടും. 200 എം.എല്‍. കുടിവെള്ളവും കിട്ടും. വില മൂന്നു രൂപ.

തിരുവനന്തപുരം സെന്‍ട്രല്‍, കൊച്ചുവേളി, നാഗര്‍കോവില്‍, എറണാകുളം ജങ്ഷന്‍, എറണാകുളം ടൗണ്‍, വര്‍ക്കല, ആലപ്പുഴ, കോട്ടയം, ആലുവാ, തൃശ്ശൂര്‍ എന്നിവിടങ്ങളില്‍ കൗണ്ടര്‍ പ്രവര്‍ത്തനം തുടങ്ങി.

ജനറല്‍ കോച്ചുകള്‍ വന്നുനില്‍ക്കുന്ന സ്ഥലത്താണ് കൗണ്ടറുകള്‍ ഒരുക്കുന്നത്. വെസ്റ്റേണ്‍ റെയില്‍വേ 150 കൗണ്ടറുകള്‍ 50 സ്റ്റേഷനുകളില്‍ ഇതിനകം ഒരുക്കി. രാജ്യത്തെ പ്രധാനപ്പെട്ട 100 സ്റ്റേഷനുകളിലാണ് ഈ സംവിധാനം ഏര്‍പ്പെടുത്തിയിട്ടുള്ളത്.