സംസ്ഥാനത്ത് വീണ്ടും ട്രഷറി നിയന്ത്രണം.കടുത്ത സാമ്പത്തിക പ്രതിസന്ധിയെ തുടര്‍ന്ന് നേരത്തെ തന്നെ ട്രെഷറി നിയന്ത്രണം ഉണ്ട്.സാമ്പത്തിക വർഷത്തിന്റെ തുടക്കത്തിൽ തന്നെ ട്രഷറിയിൽ സംസ്ഥാന സർക്കാർ നിയന്ത്രണം ഏർപ്പെടുത്തി. ഇതാദ്യമായാണ് ഏപ്രിലിൽ തന്നെ ട്രഷറിയിൽ നിയന്ത്രണം ഏർപ്പെടുത്തുന്നത്. ഒരുലക്ഷം രൂപയ്ക്ക് മുകളിലുള്ള ബില്ലുകൾ മാറാൻ ധനവകുപ്പിന്റെ മുൻകൂർ അനുമതി വേണമെന്നാണ് നിർദ്ദേശം. ഇതുസംബന്ധിച്ച് ഇതുവരെ ഔദ്യോഗിക അറിയിപ്പ് ലഭിച്ചിട്ടില്ലെന്നാണ് ട്രഷറി ഉദ്യോഗസ്ഥർ പറയുന്നത്. ഏപ്രിൽ ആദ്യംതന്നെ 5 ലക്ഷം രൂപയ്ക്ക് മുകളിലുള്ള ബില്ലുകൾ മാറാൻ ധനവകുപ്പിന്റെ അനുമതി വേണ്ടിയിരുന്നു.ശമ്പളവും പെൻഷനും മുടങ്ങാതിരിക്കാനാണ് നിയന്ത്രണമെന്നാണ് ധനവകുപ്പിന്റെ വിശദീകരണം.വായ്പാനുമതി സംബന്ധിച്ച് കേന്ദ്രത്തിൽ നിന്ന് അറിയിപ്പൊന്നും ഇതുവരെ ലഭിച്ചിട്ടില്ല.

ഡിസംബർ വരെയും അതിനുശേഷവും എടുക്കാവുന്ന വായ്പയുടെ കണക്കുകളാണ് വരേണ്ടത്.മൊത്ത ആഭ്യന്തര ഉത്പാദനത്തിന്റെ 3%വരെ വായ്പയെടുക്കാമെന്നാണ് വ്യവസ്ഥ. അതനുസരിച്ച് 37,​000 മുതൽ 41,​000കോടി രൂപവരെ വായ്പയെടുക്കാനാകും. ഇതിൽ നിന്ന് കിഫ്ബിയുടെയും സാമൂഹ്യസുരക്ഷാമിഷന്റെയും വായ്പകൾ അടക്കം എത്ര തുക കുറയ്ക്കുമെന്ന അറിയിപ്പും കിട്ടിയിട്ടില്ല. തൽക്കാലം 5,​000കോടിയുടെ താൽക്കാലിക വായ്പാനുമതി സംസ്ഥാനം ചോദിച്ചെങ്കിലും കിട്ടിയത് 3,​000കോടിയാണ്.അത് 30ന് എടുക്കും.കേന്ദ്രം വായ്പാനുമതി നൽകുന്നതിൽ കടുംപിടിത്തം സ്വീകരിക്കുന്നതിനെതിരെ കേരളം സുപ്രീംകോടതിയെ സമീപിച്ചിരുന്നു.കേന്ദ്രത്തിൽ നിന്ന്‌ കിട്ടാനുള്ളതിന്റെ 50 ശതമാനം ലഭിച്ചാൽ ട്രഷറി നിയന്ത്രണം പിൻവലിക്കുമെന്ന്‌ ധനമന്ത്രി മുൻപ് പറഞ്ഞിരുന്നത്.

ബ്രാൻഡിങ്‌ പാലിച്ചില്ലെന്ന കാരണമുയർത്തി വിവിധ കേന്ദ്രാവിഷ്‌കൃത പദ്ധതികൾക്ക്‌ സഹായം അനുവദിക്കാനാകില്ലെന്നാണ് കേന്ദ്രനിലപാട്. സ്വച്ഛ്​ഭാരത്‌ മിഷൻ (ഗ്രാമീൺ), ആയുഷ്‌മാൻ ഭാരത്‌ ഹെൽത്ത്‌ ആൻഡ്​ വെൽനെസ്‌ സെന്ററുകൾ, പ്രധാൻമന്ത്രി ആവാസ്‌ യോജന (അർബൻ), പോഷൺ അഭിയാൻ, ദേശീയാരോഗ്യ പദ്ധതി എന്നിവയിൽ ബ്രാൻഡിങ്‌ സംബന്ധിച്ച നില കേന്ദ്രത്തിനെ അറിയിച്ചെങ്കിലും ഇക്കാര്യത്തിൽ അനുകൂലമായ തീരുമാനമുണ്ടായിട്ടില്ല. മൂലധന ചെലവുകൾക്കായുള്ള പ്രത്യേക സഹായ പദ്ധതിയുടെ വിവിധ ഭാഗങ്ങളിലായി അനുവദിക്കേണ്ട ഒരു തുകയും നടപ്പുവർഷം കേന്ദ്രം അനുവദിച്ചിട്ടില്ല. ഏകദേശം 3000 കോടി രൂപയുടെ പലിശരഹിത വായ്‌പ സഹായമാണ്‌ ഇക്കാരണത്തിൽ നഷ്ടമായത്‌.കിഫ്‌ബിയും പെൻഷൻ കമ്പനിയുമെടുത്ത വായ്‌പകൾ കൃത്യമായി തിരിച്ചടയ്‌ക്കുന്നുണ്ട്‌. കരാറുകാർക്ക്‌ 15,000 കോടി രൂപ കുടിശ്ശികയുണ്ടെന്ന പ്രചാരണം വസ്തുതവിരുദ്ധമാണ്‌.

ചൊവ്വാഴ്‌ചയിലെ കണക്കനുസരിച്ച്‌ 1021 കോടിയേ കരാറുകാർക്ക്‌ നൽകാനുള്ളൂ. ആളോഹരി വരുമാനം കൂടുതലാണെന്ന കാരണം ചൂണ്ടിക്കാട്ടി കേരളത്തിനുള്ള വിഹിതം വെട്ടിക്കുറച്ച ധനകമീഷൻ നടപടി ദൂരവ്യാപക പ്രത്യാഘാതമുണ്ടാക്കും.1971ലെ സെൻസസ്‌ അനുസരിച്ചാണ്‌ മുൻ കമീഷനുകൾ ശിപാർശകൾ തയാറാക്കിയിരുന്നത്‌. എന്നാൽ, കഴിഞ്ഞ കമീഷൻ 2011 ആണ്‌ അവലംബമാക്കിയത്‌. ഈ ജനസംഖ്യ മാനദണ്ഡം പാർലമെന്റ്‌ സീറ്റുകളുടെ കാര്യത്തിൽ ബാധകമാക്കിയാൽ കേരളത്തിൽ നിലവിലുള്ള 20 ലോക്‌സഭ സീറ്റുകൾ പന്ത്രണ്ടോ പതിമൂന്നോ ആയി ചുരുങ്ങുമെന്നും മന്ത്രി ചൂണ്ടിക്കാട്ടി.