കെഎസ്ആര്ടിസി ഡ്രൈവര് യദുവിന്റെ പരാതിയില് മേയര് ആര്യാ രാജേന്ദ്രനും സച്ചിന് ദേവ് എംഎല്എയ്ക്കുമെതിരെ കേസെടുക്കാന് കോടതി
കെഎസ്ആര്ടിസി ബസ് തടഞ്ഞസംഭവത്തില് ഡ്രൈവര് യദുവിന്റെ പരാതിയില് മേയര് ആര്യാ രാജേന്ദ്രനും സച്ചിന് ദേവ് എംഎല്എയ്ക്കുമെതിരെ കേസെടുക്കാന് തിരുവനന്തപുരം ഫസ്റ്റ് ക്ലാസ് ജുഡീഷ്യല് മജിസ്ടേറ്റ് കോടതി ഉത്തരവിട്ടു.മേയര് ആര്യാ രാജേന്ദ്രന്, ഭര്ത്താവ് സച്ചിന്ദേവ് എംഎല്എ, മേയറുടെ സഹോദരന് അരവിന്ദ്, ഭാര്യ ആര്യ, കണ്ടാലറിയാവുന്ന ഒരാള് എന്നിവര്ക്കെതിരെയായിരുന്നു യദു പരാതി നല്കിയത്.
കന്റോണ്മെന്റ് പൊലീസിനോടാണ് കേസെടുക്കാന് കോടതി നിര്ദേശം നല്കിയിരിക്കുന്നത്. ഔദ്യോഗിക കൃത്യനിര്വഹണം തടസപ്പെടുത്തല്, അന്യായമായി തടങ്കലില് വയ്ക്കല്, അസഭ്യം പറയല് എന്നീ പരാതികളാണ് ഹര്ജിയില് ആരോപിച്ചിരിക്കുന്നത്. ഈ പരാതി കോടതി പൊലീസിന് കൈമാറി.
ആര്യാ രാജേന്ദ്രനും ഭര്ത്താവും എംഎല്എയുമായ സച്ചിന് ദേവിനുമെതിരെയും പൊലീസില് പരാതി നല്കിയിട്ടും കേസെടുക്കാത്ത സാഹചര്യത്തിലാണ് കെഎസ്ആര്ടിസി ഡ്രൈവര് യദു കോടതിയെ സമീപിച്ചത്.
ബസ്സിലെ സിസിടിവിയുടെ മെമ്മറി കാര്ഡ് കാണാതായതില് പോലീസ് അന്വേഷണം തുടരുകയാണ്. പാപ്പനംകോടുളള കെഎസ്ആര്ടിസി വര്ക്ക്ഷോപ്പില് വെച്ചാണ് ക്യാമറകള് സ്ഥാപിച്ചത്. ഇവിടെ നിന്നുള്ള രേഖകള് പൊലീസ് ശേഖരിച്ചിട്ടുണ്ട്.യദുവിനെ കൂടാതെ ബസിലുണ്ടായിരുന്നവര് കണ്ടക്ടര്മാര് എന്നിവരുടെ മൊഴി പൊലീസ് വരും ദിവസങ്ങളില് രേഖപ്പെടുത്തും.
https://www.facebook.com/Malayalivartha