നിര്‍മ്മാണ പ്രവര്‍ത്തനങ്ങള്‍ നടക്കുന്നതിന്റെ ഭാഗമായി തിരുവനന്തപുരം നഗരത്തില്‍ നാളെ മുതല്‍ മൂന്ന് ദിവസം ഗതാഗത നിയന്ത്രണം. നഗരത്തിലെ ആല്‍ത്തറ - തൈക്കാട് റോഡ് വെള്ളിയാഴ്ച (മെയ് 10) രാത്രി 10 മണി മുതല്‍ മെയ് 13 രാവിലെ ആറ് മണി വരെ അടച്ചിടുമെന്ന് അധികൃതര്‍ അറിയിച്ചു. ഇതിന്റെ ഭാഗമായിട്ടാണ് ഗതാഗത നിയന്ത്രണങ്ങള്‍ ഏര്‍പ്പെടുത്തുന്നത്.

ആല്‍ത്തറ - തൈക്കാട് സ്മാര്‍ട്ട് റോഡിന്റെ നിര്‍മ്മാണവുമായി ബന്ധപ്പെട്ട് വഴുതക്കാട് - സാനഡു റോഡിലും സാനഡു ജംഗ്ഷനില്‍ കൂടിയും വാഹന ഗതാഗതം പൂര്‍ണ്ണമായും നിരോധിക്കും. ബേക്കറി ജംഗ്ഷന്‍ ഭാഗത്ത് നിന്നും സാനഡു ഭാഗത്തേയ്ക്കും, വഴുതക്കാട് ഭാഗത്ത് നിന്നും സാനഡു ഭാഗത്തേയ്ക്കും, ഡാണാമുക്ക്, ഗസ്റ്റ് ഹൗസ് ഭാഗങ്ങളില്‍ നിന്നും സാനഡു ഭാഗത്തേയ്ക്കും ഡി.പി.ഐ ഭാഗത്ത് നിന്നും സാനഡു ഭാഗത്തേയ്ക്കും വാഹന ഗതാഗതം അനുവദിയ്ക്കുന്നതല്ല.

വെള്ളയമ്പലം ഭാഗത്ത് നിന്നും ശ്രീമൂലം ക്ലബ്, വഴുതക്കാട് ഭാഗത്തേയ്ക്കും കെല്‍ട്രോണ്‍, മാനവീയം, ആല്‍ത്തറ ഭാഗത്തേയ്ക്കും വാഹന ഗതാഗതം അനുവദിയ്ക്കുന്നതല്ല. ശ്രീമൂലം ക്ലബ് ഭാഗത്ത് നിന്നും ആല്‍ത്തറ വെള്ളയമ്പലം ഭാഗത്തേയ്ക്ക് മാത്രമേ വാഹന ഗതാഗതം അനുവദിക്കുകയുള്ളൂ.മേട്ടുക്കട ഭാഗത്തേയ്ക്ക് പോകേണ്ട വാഹനങ്ങള്‍ ആല്‍ത്തറ - തൈക്കാട് റോഡ് ഒഴിവാക്കി വെള്ളയമ്പലം, പാളയം, പനവിള, മോഡല്‍ സ്‌കൂള്‍ വഴി പോകേണ്ടതാണ്.

തിരുമല-പൂജപ്പുര ഭാഗത്ത് നിന്നും വരുന്ന കെ.എസ്.ആര്‍.ടി.സി ഉള്‍പ്പെടെയുള്ള വലിയ വാഹനങ്ങള്‍ തിരുമല പള്ളിമുക്കില്‍ നിന്നും തിരിഞ്ഞ് പാങ്ങോട്, ഇടപ്പഴിഞ്ഞി, ശ്രീമൂലം ക്ലബ്, ആല്‍ത്തറ, കെല്‍ട്രോണ്‍, മ്യൂസിയം, പാളയം വഴി പോകേണ്ടതാണ്. പൂജപ്പുര, ഇടപ്പഴിഞ്ഞി ഭാഗത്ത് നിന്നും തമ്പാനൂര്‍, പാളയം ഭാഗത്തേക്ക് പോകേണ്ട ചെറിയ വാഹനങ്ങള്‍ ജഗതി, ഡി.പി.ഐ, ഡാണാമുക്ക്, ഗസ്റ്റ് ഹൗസ്, സംഗീത കോളേജ്, മോഡല്‍ സ്‌കൂള്‍ വഴി പോകേണ്ടതാണ്.

ജഗതി ഭാഗത്ത് നിന്നും ശാസ്തമംഗലം വെള്ളയമ്പലം, പട്ടം ഭാഗങ്ങളിലേക്ക് പോകേണ്ട വാഹനങ്ങള്‍ ജഗതി, ഇടപ്പഴിഞ്ഞി, കൊച്ചാര്‍ റോഡ്, ശാസ്തമംഗലം, വെള്ളയമ്പലം വഴി പോകേണ്ടതാണ്. വെള്ളയമ്പലം ഭാഗത്ത് നിന്നും ജഗതി, പൂജപ്പുര ഭാഗങ്ങളിലേയ്ക്ക് പോകേണ്ട വാഹനങ്ങള്‍ വെള്ളയമ്പലം, ശാസ്തമംഗലം, കൊച്ചാര്‍ റോഡ്, ഇടപ്പഴഞ്ഞി വഴി പോകേണ്ടതാണ്.വഴുതക്കാട്, ശ്രീമൂലം ക്ലബ്, ആല്‍ത്തറ, ടാഗോര്‍ തീയേറ്റര്‍, തുടങ്ങിയ ഭാഗങ്ങളിലേയ്ക്ക് പോകേണ്ട വാഹനങ്ങള്‍ റിസര്‍ബ് ബാങ്ക്, ബേക്കറി ജംഗ്ഷന്‍, വഴുതക്കാട് വഴി പോകേണ്ടതാണ്.