അനധികൃത സ്വത്ത് സമ്പാദന കേസില്‍ മുന്‍കൂര്‍ അനുമതിയില്ലാതെ ഇന്ത്യ വിട്ടുപോകരുതെന്ന വ്യവസ്ഥയില്‍ ഇളവ് തേടി മുന്‍ ഡിജിപി ടോമിന്‍ ജെ.തച്ചങ്കരി ഹൈക്കോടതിയില്‍. താന്‍ ഷാര്‍ജയില്‍ ഒരു ജ്വല്ലറി ഗ്രൂപ്പിന്റെ ഓപ്പറേഷന്‍സ് മാനേജറാണെന്നും ഉടന്‍ ജോലിയില്‍ പ്രവേശിച്ചില്ലെങ്കില്‍ തൊഴില്‍ നഷ്ടപ്പെടും. യുഎഇയിലേക്ക് യാത്ര ചെയ്യാനും ജോലി ചെയ്യാനും അനുമതി നല്‍കുക, അല്ലെങ്കില്‍, ഒക്ടോബര്‍ 26 മുതല്‍ 2027 മാര്‍ച്ച് 31 വരെയുള്ള സമയത്ത് യുഎഇയിലേക്ക് പോകാന്‍ അനുമതി നല്‍കുക എന്നാണ് ഹര്‍ജിയില്‍ പറഞ്ഞിരിക്കുന്നത്.

അനധികൃത സ്വത്ത് സമ്പാദന കേസില്‍ കോട്ടയം വിജിലന്‍സ് സ്‌പെഷല്‍ കോടതി തച്ചങ്കരിയെ 4 വര്‍ഷം തടവിനും 30.84 ലക്ഷം രൂപ പിഴയടയ്ക്കാനും ശിക്ഷിച്ചിരുന്നു. പിന്നാലെ ഹൈക്കോടതി അദ്ദേഹത്തിന്റെ ശിക്ഷാവിധി മരവിപ്പിച്ച് ജാമ്യം അനുവദിച്ചു. കോടതിയുടെ മുന്‍കൂര്‍ അനുമതിയില്ലാതെ രാജ്യത്തിനു പുറത്തുപോകരുതെന്ന ജാമ്യ വ്യവസ്ഥ ഭേദഗതി ചെയ്യണമെന്നാണ് തച്ചങ്കരിയുടെ ആവശ്യം. താന്‍ ഷാര്‍ജയില്‍ ഒരു ജ്വല്ലറി ഗ്രൂപ്പിന്റെ ഓപ്പറേഷന്‍സ് മാനേജരായി ജോലി ചെയ്തുവരികയാണെന്നും ഒപ്പം ദുബായിലെ ഐടി കണ്‍സള്‍ട്ടന്‍സി സ്ഥാപനത്തില്‍ പങ്കാളിയാണെന്നും ഹര്‍ജിയില്‍ പറയുന്നു. ജോലിയില്‍ ഉടന്‍ പ്രവേശിച്ചില്ലെങ്കില്‍ തൊഴില്‍ നഷ്ടപ്പെടുമെന്നും ഇത് തന്റെ ഉപജീവനമാര്‍ഗത്തെ സാരമായി ബാധിക്കുമെന്നും തച്ചങ്കരി പറയുന്നു.

വിചാരണാ വേളയില്‍ വിദേശത്തായിരുന്നെങ്കിലും കോടതി ആവശ്യപ്പെട്ട എല്ലാ ദിവസങ്ങളിലും താന്‍ മുടങ്ങാതെ ഹാജരായിട്ടുണ്ടെന്നും കോടതി നിര്‍ദേശിച്ച ജാമ്യവ്യവസ്ഥകളെല്ലാം പാലിച്ചിട്ടുണ്ടെന്നും ഹര്‍ജിയിലുണ്ട്. വിദേശയാത്രാ അവകാശം ഇന്ത്യന്‍ ഭരണഘടനയുടെ ആര്‍ട്ടിക്കിള്‍ 21 ഉറപ്പുനല്‍കുന്ന വ്യക്തിസ്വാതന്ത്ര്യത്തിന്റെ ഭാഗമാണ്. താന്‍ ഒളിവില്‍ പോകാന്‍ സാധ്യതയുള്ള ആളല്ലെന്നും ഹര്‍ജിയില്‍ പറയുന്നു. ഒക്ടോബര്‍ 26 മുതല്‍ ഡിസംബര്‍ 31 വരെയുള്ള കാലയളവിലും തുടര്‍ന്ന് 2027 ജനുവരി 2 മുതല്‍ മാര്‍ച്ച് 31 വരെയുള്ള കാലയളവിലുമായി യുഎഇയില്‍ തുടരുന്നതിനുള്ള താല്‍ക്കാലിക യാത്രാവിവരങ്ങളും താമസസ്ഥലത്തിന്റെ വിലാസവും കോടതിയില്‍ സമര്‍പ്പിച്ചിട്ടുണ്ട്. തച്ചങ്കരിയുടെ ഹര്‍ജിയില്‍ കോടതി സര്‍ക്കാരിന്റെ വിശദീകരണം തേടി. ഹര്‍ജി നവംബര്‍ രണ്ടിന് വീണ്ടും പരിഗണിക്കും.