ശാസ്ത്രം വളര്‍ന്നിട്ടും നില നിന്ന അനാചാരങ്ങള്‍ യോശുദാസിന് വേണ്ടി പുഴുതെറിഞ്ഞു. ശ്രീപത്മനാഭസ്വാമി ക്ഷേത്രത്തില്‍ ദര്‍ശനം നടത്താന്‍ ഗാനഗന്ധര്‍വന്‍ യേശുദാസിന് അനുമതി നല്‍കി. വിജയദശമി ദിനത്തില്‍ ക്ഷേത്രദര്‍ശനത്തിന് അവസരം നല്‍കണമെന്നു കാട്ടിയുള്ള യേശുദാസിന്റെ കത്തില്‍ ജില്ലാ ജഡ്ജി കെ. ഹരിപാലിന്റെ അധ്യക്ഷതയില്‍ നടന്ന ക്ഷേത്ര ഭരണസമിതി യോഗത്തിലാണ് അനുകൂല തീരുമാനമുണ്ടായത്.

അഹിന്ദുക്കള്‍ക്ക് പ്രവേശനമില്ലാത്ത ശ്രീപത്മനാഭ സ്വാമി ക്ഷേത്രത്തില്‍ ഹിന്ദുമതാചാരങ്ങള്‍ പാലിക്കുന്നവര്‍ക്ക് പ്രവേശനം നല്‍കാറുണ്ട്. ഹിന്ദുമത വിശ്വാസിയാണെന്നും ക്ഷേത്രാചാരാനുഷ്ഠാനങ്ങള്‍ പാലിക്കുന്നുണ്ടെന്നും കാട്ടിയായിരുന്നു യേശുദാസ് കത്ത് നല്‍കിയത്. സുപ്രീംകോടതി നിയോഗിച്ച മേല്‍നോട്ട സമിതി ഭരണമേറ്റെടുത്ത ശേഷം ഹിന്ദുമത വിശ്വാസ പ്രകാരം ജീവിക്കുന്ന അഹിന്ദുക്കള്‍ക്ക് ക്ഷേത്രപ്രവേശനം നല്‍കുന്നുണ്ട്. ശബരിമലയിലും മൂകാംബികയിലും ദര്‍ശനം നടത്തിയിട്ടുള്ള യേശുദാസിന് ശീപത്മനാഭ സ്വാമി ക്ഷേത്രത്തില്‍ ദര്‍ശനം നല്‍കുന്നതില്‍ വിലക്കില്ലെന്ന് ക്ഷേത്രാധികൃതര്‍ മുന്‍പ് തന്നെ അറിയിച്ചിരുന്നു.

പരിചിതരല്ലാത്ത അഹിന്ദുക്കള്‍ അറിയപ്പെടുന്ന ആരുടെയെങ്കിലും കത്ത് ഹാജരാക്കണമെന്നാണ് കീഴ്‌വഴക്കം. എന്നാല്‍ യേശുദാസിന് ഇത്തരം കത്തിന്റെ ആവശ്യമില്ലെന്നും കീഴ്‌വഴക്കമനുസരിച്ച് ദര്‍ശനത്തിന് അവസരം നല്‍കുന്നതില്‍ തടസ്സമില്ലെന്നും എക്‌സിക്യുട്ടീവ് ഓഫീസര്‍ വി. രതീശന്‍ പറഞ്ഞിരുന്നു. ക്ഷേത്രം തന്ത്രിയുടെ അഭിപ്രായവും ഇക്കാര്യത്തില്‍ ഭരണസമിതി തേടും. അതിന് ശേഷമാകും അന്തിമ തീരുമാനം.

വിദേശികളടക്കമുള്ളവര്‍ ഹിന്ദു സമാജങ്ങളില്‍ നിന്നുള്ള കത്ത് ഹാജരാക്കി ക്ഷേത്രദര്‍ശനം നടത്താറുണ്ട്. ഗുരുവായൂര്‍ അമ്പലത്തില്‍ ദര്‍ശനം നടത്തണമെന്ന് ആഗ്രഹമുണ്ടെങ്കിലും യേശുദാസിന് ഇതുവരെ കഴിഞ്ഞിട്ടില്ല. ഈ സാഹചര്യത്തിലാണ് യേശുദാസിന്റെ പത്മനാഭ സ്വാമി ക്ഷേത്ര ദര്‍ശനത്തിനുള്ള അവസരം ലഭിച്ചത്.

കത്തിനൊപ്പം താന്‍ ഹിന്ദുമത വിശ്വാസിയാണെന്ന് രേഖാമൂലം സാക്ഷ്യപ്പെടുത്തിയ സത്യവാങ്മൂലവും യേശുദാസ് അയച്ചിട്ടുണ്ട്. പത്മനാഭ സ്വാമിയെ ദര്‍ശിക്കുന്നതിന് ഹിന്ദു ആചാരങ്ങളും പാമ്പര്യവും പിന്തുടരുമെന്നാണ് ഇതില്‍ പറയുന്നത്. കഴിഞ്ഞ ദിവസമാണ് ശ്രീപത്മനാഭസ്വാമി ക്ഷേത്രത്തിന്റെ മതിലകം ഓഫീസില്‍ സത്യവാങ്മൂലം ലഭിച്ചത്. സ്വാതിതിരുനാള്‍ രചിച്ച പത്മനാഭശതകം ക്ഷേത്ര കല്‍മണ്ഡപത്തിലോ നവരാത്രി മണ്ഡപത്തിലോ ഇരുന്ന് യേശുദാസ് ആലപിക്കുമെന്നും സൂചനയുണ്ട്. ക്ഷേത്രം എക്‌സിക്യൂട്ടീവ് ഓഫീസര്‍ രതീശനാണ് യേശുദാസ് അപേക്ഷ സമര്‍പ്പിച്ചത്.

ഇതിനിടെ യേശുദാസിന്റെ ശ്രീപത്മനാഭ സ്വാമിക്ഷേത്ര പ്രവേശനത്തെ അനുകൂലിച്ച് ദേവസ്വം മന്ത്രി കടകംപള്ളി സുരേന്ദ്രനും സുരേഷ് ഗോപി എംപി യും രംഗത്ത് എത്തിയിരുന്നു. വിശ്വാസികള്‍ക്ക് എല്ലാം ആരാധനക്ക് അവസരമുണ്ടാകണമെന്നും മന്ത്രി പറഞ്ഞു. ഭക്തരുടെ വികാരം വൃണപ്പെടുത്തി അഭിപ്രായം പറയുന്നില്ല. എങ്കിലും യേശുദാസ് ക്ഷേത്രത്തില്‍ കയറുന്നതില്‍ താല്‍പ്പര്യകുറവില്ലെന്നായിരുന്നു സുരേഷ് ഗോപിയുടെ പ്രതികരണം. എല്ലാവര്‍ക്കും ശരിയാണെന്ന് തോന്നുന്നുവെങ്കില്‍ അത് നടക്കും സുരേഷ് ഗോപി പറഞ്ഞു.