കയ്യേറ്റം തെളിഞ്ഞാല്‍ രാജിവയ്ക്കുമെന്ന് മന്ത്രി തോമസ് ചാണ്ടി. ആരോപണങ്ങള്‍ക്കുപിന്നില്‍ ഗൂഢസംഘമുണ്ടെന്നും അദ്ദേഹം മാധ്യമങ്ങളോടു പറഞ്ഞു. മുഖ്യമന്ത്രി പറഞ്ഞാൽ മാറിനിൽക്കാമെന്നും അദ്ദേഹം പറഞ്ഞു.ജില്ലാ കലക്ടറുടെ ഇടക്കാല റിപ്പോര്‍ട്ടിൽ കായല്‍ മണ്ണിട്ട് നികത്തിയെന്ന് വ്യക്തമാക്കിയിട്ടുണ്ട്, ഭൂനിയമങ്ങളുടെ ലംഘനമുണ്ടായെന്നും വിശദമായ പരിശോധന ആവശ്യമുണ്ടെന്നും റിപ്പോർട്ടിൽ പറയുന്നു

മന്ത്രി തോമസ് ചാണ്ടിയുടെ ലേക് പാലസ് റിസോര്‍ട്ടിന് അനുവദിച്ച നികുതി ഇളവ് ആലപ്പുഴ നഗരസഭ നേരത്തെ റദ്ദാക്കിയിരുന്നു . ഇതുവരെ ഇളവായി ലഭിച്ച തുക തിരിച്ചടയ്ക്കാനും ഇന്നുചേര്‍ന്ന കൗണ്‍സില്‍ യോഗം തീരുമാനമെടുത്തു. നഗരസഭയില്‍നിന്ന് ഫയല്‍ കാണാതായ സംഭവത്തില്‍ നാലു ഉദ്യോഗസ്ഥരെ സസ്പെന്‍ഡ് ചെയ്തതായി ചെയര്‍മാന്‍ കൗണ്‍സിലിനെ അറിയിച്ചു. കയ്യേറ്റത്തെക്കുറിച്ച് ഇടക്കാല റിപ്പോര്‍ട്ട് ആലപ്പുഴ കലക്ടര്‍ റിപ്പോര്‍ട്ട് റവന്യൂമന്ത്രിക്ക് നല്‍കി

ലേക് പാലസിലെ അഞ്ചു കെട്ടിടങ്ങള്‍ നിയമവിരുദ്ധമാണെന്ന് കണ്ടെത്തി എന്നായിരുന്നു മുനിസിപ്പല്‍ എന്‍ജിനീയറുടെ റിപ്പോര്‍ട്ട്. എന്നാല്‍ മുനിസിപ്പല്‍ സെക്രട്ടറിയുടെ റിപ്പോർട്ടിൽ എല്ലാം നിയമപരമാണെന്നും പറഞ്ഞു . ഈ വൈരുദ്ധ്യം ചര്‍ച്ചക്ക് വന്നതോടെ ബഹളമായി. ബിജെപി അംഗങ്ങള്‍ യോഗത്തില്‍നിന്ന് ഇറങ്ങിപ്പോകുകയും ചെയ്തു. മൂന്നുമണിക്കൂറോളം യോഗം നീണ്ടു നിന്നു.