നഴ്സുമാരുടെ സംഘടനയായ യുനൈറ്റഡ് നഴ്സസ് അസോസിയേഷന്‍ നേതാവ് ജാസ്മിന്‍ഷായ്ക്ക് നേരെ വധഭീഷണി. ഫോണിലൂടെ അജ്ഞാതനായ വ്യക്തി വധഭീഷണി മുഴക്കിയ വിവരം ജാസ്മിന്‍ഷാ തന്നെയാണ് ഫേസ്ബുക്ക് പോസ്റ്റിലൂടെ അറിയിച്ചത്.

തിരുവല്ലയിലെ ഒരു ആശുപത്രിയില്‍ നഴ്സുമാര്‍ നടത്തുന്ന സമരം ചൂണ്ടിക്കാട്ടിയായിരുന്നു ഭീഷണി. +3612345677 എന്ന നമ്പറില്‍ നിന്ന് വിളിച്ചായിരുന്നു ഭീഷണിപ്പെടുത്തിയതെന്ന് ജാസ്മിന്‍ഷാ ഫേസ്ബുക്ക് പോസ്റ്റില്‍ പറയുന്നു.

ഫേസ്ബുക്ക് പോസ്റ്റ് ഇങ്ങനെ

ഭീഷണി വേണ്ട... ധാർഷ്ട്രം വേണ്ട...
നീതിക്ക് വേണ്ടിയുള്ള സഹന സമരം തുടരും..

+3612345677 എടാ ഭീരൂ ധീരന്മാർക്ക് ഒരു മരണമേയുളളൂ... കേട്ടിട്ടുണ്ടോ ... ഉണ്ടാകാൻ വഴിയില്ല..

എന്നെ പൂളാൻ ഒരുത്തൻ (വിഭാഗം) തീരുമാനിച്ചിട്ടുണ്ടെങ്കിൽ അതങ്ങ് ചെയ്തു പോയേക്ക്...
ധീരതയോടെ തന്നെ അത് വരിക്കാൻ തയാറാണ്. ഒരാൾ പോയാലും ഈ പ്രസ്ഥാനത്തെ നയിക്കാൻ ആയിരങ്ങൾ ഉണ്ട്. വൃകതികേന്ദ്രീകൃതമായ ഒരു പ്രസ്ഥാനമല്ല യുഎൻഎ.

തിരുവല്ലയിൽ ഇനിയും വരും, ഒരു ഭയവുമില്ല. കഴിഞ്ഞ ദിവസം വന്നിരുന്നു.എന്റെ അറിവിൽ താങ്ങൾ പറഞ്ഞ സ്ഥാപനത്തിൽ നിലവിൽ ചില കരാറും ഉറപ്പും മാനേജ്മെന്റ് നൽകിയിട്ടുണ്ട്. അത് പൂർണ്ണമായും പാലിച്ചിട്ടില്ല. പാലിക്കും എന്നാണ് എന്റെ വിശ്വാസം.ഇല്ലായെങ്കിൽ ഇടപെടും. വളരെ ശകതമായി തന്നെ. അതിന്റെ പേരിൽ പൂളുമെങ്കിൽ അതങ്ങ് ചെയ്യ് ബ്രോ...

എന്റെയും നിന്റെയും ശ്വാസം അഞ്ച് മിനുട്ട് നിലച്ചാൽ തീരുന്നതാണ് ജീവിതം. നമ്മളിരുവരും പോകേണ്ടത് ആറടി മണ്ണിലേക്കും. അത് കുറച്ച് നേരത്തേയായാലും എന്നെ സംബന്ധിച്ച് പ്രശ്നമല്ല.

അത് കൊണ്ട് ഭീഷണി വേണ്ട ബ്രോ...
ബ്രോക്ക് പറയാനുള്ളത് പറഞ്ഞ ഉടൻ കട്ടാക്കിയത് കൊണ്ടാണ് പോസ്റ്റിട്ട് മറുപടി പറയുന്നത്. കേൾക്കാൻ തയ്യാറായിരുന്നുവെങ്കിൽ ഇത് ഒരു സാധാ കോളായി കണ്ടേനെ ബ്രോ... ഇങ്ങനെ ഭീഷണിപ്പെടുത്തും മുൻപ് നമ്മുടെ ചരിത്രം ഒക്കെ ഒന്ന് ചികഞ്ഞു നോക്കൂ ബ്രോ..

അർഹിക്കുന്ന അവജ്ഞയോടെയും, പുച്ഛത്തോടെയും താങ്ങളുടെ കോളിനെ തള്ളിക്കളയുന്നു.