വള്ളത്തോൾ സാഹിത്യ സമിതിയുടെ ഈ വര്‍ഷത്തെ വള്ളത്തോള്‍ പുരസ്‌കാരം പ്രഖ്യാപിച്ചു. കവിയും ഗാനരചയിതാവുമായ പ്രഭാവര്‍മ്മയാണ് പുരസ്‌ക്കാരത്തിന് അർഹനായത്.

1,11,111 രൂപയും കീര്‍ത്തിഫലകവും അടങ്ങിയ പുരസ്‌കാരം വള്ളത്തോളിന്റെ ജന്മദിനമായ ഒക്ടോബര് 16 ന് നടക്കുന്ന സാഹിതീയോത്സവത്തിൽ വച്ച് പ്രഭാവർമയ്ക്ക് നൽകുമെന്ന് സമിതി അധ്യക്ഷൻ ആർ. രാമചന്ദ്രൻ നായർ അറിയിച്ചു.

മലയാള ഭാഷയുടെ മാര്‍ദ്ദവവും, മനോഹാരിതയും പ്രഭാവര്‍മ്മയുടെ കവിതകളില്‍ നിറയുന്നതായി പുരസ്‌കാര സമിതി വിലയിരുത്തി. ആര്‍ രാമചന്ദ്രന്‍ നായര്‍, പി നാരായണക്കുറുപ്പ്, പ്രൊഫ.സി ജി രാജഗോപാല്‍, ഡോ.എ എം വാസുദേവന്‍ പിള്ള, ഡോ.നന്ത്യത്ത് ഗോപാലകൃഷ്ണന്‍ എന്നിവര്‍ ഉള്‍പ്പെട്ട സമിതിയാണ് പ്രഭാവര്‍മ്മയെ പുരസ്‌കാരജേതാവായി തെരഞ്ഞെടുത്തത്.