ഈശ്വരനെ പ്രാര്‍ത്ഥിക്കാന്‍ തനിക്ക് പിന്തുണയേകുന്ന പൂജാരി സമൂഹം കണ്‍കണ്ട ദൈവമാണെന്നും മാംസവും ചോരയുമുളള ഈശ്വരന്‍മാരാണ് പൂണൂല്‍ സമൂഹമെന്നും സുരേഷ് ഗോപി പറഞ്ഞിരുന്നു. ഭഗവത് സേവക്കായി അടുത്ത ജന്മത്തില്‍ ബ്രാഹ്മണനായി ജനിക്കണമെന്നാണ് ആഗ്രഹം. പുനര്‍ജന്മത്തില്‍ വിശ്വാസമുണ്ട്. അടുത്ത ജന്മത്തില്‍ എങ്കിലും ശബരിമല ഭഗവാന് അഭിഷേകവും നിവേദ്യവും അര്‍പ്പിക്കാനുളള ഭാഗ്യമുണ്ടാകണം. ആരും നിങ്ങളെ അടിച്ചമര്‍ത്താന്‍ പാടില്ല. ബ്രാഹ്മണ സമൂഹത്തിന് അര്‍ഹമായത് കിട്ടണം. അതിന് രാഷ്ട്രീയ ദുഷ്ടലാക്കുകള്‍ വെടിഞ്ഞ് സമൂഹത്തിന് നന്മ പകരുന്ന രാഷ്ട്രീയത്തിന് പിന്തുണ നല്‍കണമെന്നും സുരേഷ് ഗോപി പറഞ്ഞിരുന്നു.

സുരേഷ് ഗോപിയുടെ ഈ പ്രസ്താവനയ്‌ക്കെതിരെ നിരവധി ട്രോളുകളാണ് സമൂഹമാധ്യമങ്ങളിൽ പ്രചരിച്ചുക്കൊണ്ടിരിക്കുന്നത്. മാത്രമല്ല സുരേഷ് ഗോപിയെ പരിഹസിച്ച് പി.സി. ജോർജ് ഉൾപ്പടെ ഉള്ളവരും രംഗത്തെത്തിയിരുന്നു. ഇത്തരം പരിഹാസങ്ങളും ട്രോളുകളും താരത്തെ പ്രകോപിച്ചിരിക്കുകയാണ്. കുര്‍ബാന കൈക്കൊള്ളാന്‍ ക്രിസ്ത്യാനിയായി ജനിക്കാന്‍ ആഗ്രഹമുണ്ടെന്ന് പറഞ്ഞാല്‍ അത് വര്‍ഗീയതയാകുമോ എന്ന് സുരേഷ് ഗോപി ചോദിച്ചു. ഇല്ല, എന്നാല്‍ ശാസ്താവിനെ പുജിക്കാന്‍ താഴ്മണ്‍ കുടുംബത്തില്‍ ബ്രാഹ്മണനായി പിറക്കണമെന്ന് പറയുന്നത് മാത്രം എങ്ങനെ വര്‍ഗീയതയാകുമെന്നും സുരേഷ് ഗോപി ചോദിച്ചു. വാര്‍ത്താ ചാനലിനോട് പ്രതികരിക്കുകയായിരുന്നു സുരേഷ് ഗോപി.

ഒരു ശബരിമല ഭക്തന്റെ ആഗ്രഹമാണ് താന്‍ തുറന്ന് പറഞ്ഞതെന്നും സുരേഷ് ഗോപി പറഞ്ഞു. തന്റെ പ്രസ്താവന ബ്രാഹ്മണിക്കല്‍ ചിന്തകള്‍ ഊട്ടി ഉറപ്പിക്കുന്നതാണെന്ന് ചിന്തിക്കുന്നവര്‍ക്ക് അങ്ങനെ കരുതാം. പള്ളികളിലും മോസ്‌കുകളിലും പുരോഹിതരുടെ രീതികളും ചിട്ടകളുമുണ്ട്. അതൊന്നും മാറ്റാന്‍ ആരും പറയുന്നില്ലല്ലോ. ഉടച്ച് വാര്‍ക്കല്‍ ഹിന്ദു മതത്തില്‍ മാത്രം മതിയോ എന്നും സുരേഷ് ഗോപി ചോദിച്ചു.

കപടമനുഷ്യ സ്‌നേഹികളാണ് തനിക്കെതിരെ രംഗത്ത് വരുന്നത്. റോഹിംഗ്യന്‍ മുസ്ലീങ്ങള്‍ക്ക് വേണ്ടി വരുന്നവര്‍ കശ്മീര്‍ പണ്ഡിറ്റുകളെക്കുറിച്ച് പറയുന്നില്ലെന്നും സുരേഷ് ഗോപി പറഞ്ഞു. കോടിയേരിയുടെ വിമര്‍ശനത്തെക്കുറിച്ച് ചോദിച്ചപ്പോള്‍ അത് അദ്ദേഹം സ്വന്തം പാര്‍ട്ടിക്കാരോട് പറയട്ടെ എന്നായിരുന്നു സുരേഷ് ഗോപിയുടെ മറുപടി. ഇനി രാജ്യസഭാഗം അമ്പലത്തില്‍ പോകരുതെന്ന് കൂടി പറയുമോ.

വെറുതെ പന്നിക്കൂട്ടങ്ങള്‍ ചിലക്കുന്നു. ഒരു ഭക്തന്റെ ഹൃദയവികാരമാണ് താന്‍ പറഞ്ഞത്. ശബരിമല തന്ത്രിയോടും പറഞ്ഞിരുന്നു. പക്ഷേ ഇപ്പോള്‍ പുനര്‍ജനിക്കേണ്ടതില്ലെന്നാണ് അദ്ദേഹം പറഞ്ഞത്. ഇപ്പോള്‍ താങ്കള്‍ ഇവിടെ വേണം. അടുത്ത ജന്മത്തില്‍ ഈ കുടുംബത്തില്‍ ജനിക്കട്ടെയെന്ന് അദ്ദേഹം അനുഗ്രഹിച്ചിട്ടുണ്ടെന്നും അദ്ദേഹം പറഞ്ഞു.